وبالنسبه للإضافات التجاريه على السياره كانت هذي أحد مشاركاتي في موضوع سابق عن الغش التجاري لدى وكيل سيارات تويوتا ( عبداللطيف جميل) !!
وهيه شرح بسيط وسريع عن أضرار الإضافات التجاريه على السياره
اقتباس:
|
المشاركة الأصلية كتبت بواسطة شقـــران
مرحبا يا مخاوين شما أنا من الإمارات وإسمحوا لي بهالمداخله البسيطة لي خذت مجراها عن الإكسسوارات الأصلية والتجارية يا شباب الصناعه الصينية معروفه والكواليتي فيها سيئ جدا ً سواء ً في رنجات او تخطيط او جناح أو كشافات .... إلخ
بقول لكم عن الرنجات : الرنجات الأصلية مصنوعه من معدن يتحمل أوزان ثقيلة ودرجة حرارة عاليه وما تأثر على ميزانية الرودات والسيارة بشكل عام لإنها مصنوعه بقطر دائره متساوي تماما ً وما يسوي لك نفضه ف السياره
بس الرنجات التجارية دايما ً وبإستمرار فيها مشاكل ويمكن رنج واحد من بين 100 لي يطلع صاحي في الممشى فقط ولا من ناحية المعدن والصناعه ..
(سلامتها أم حسن)
التخطيط : على حد علمي قبل 8 سنين كنت اتعامل ويا محل في العين إسمه (المهلب) في صناعية هيلي وهالمحل كان المحل الوحيد أيامها لي يفصل تخطيط وستيكرات ويوزعها على جميع محلات الزينة في الإمارات وأكيد أي حد من العين يعرف هالمحل وكنت أفصل عنده تخطيط وستيكرات ولإني زبون دائم عنده كان يركب لي من أحسن أنواع التخطيط اللي كان رقمه 7000 وفيه عنده بو 5000 وعنده بو 3000 وسألته عن الفرق بين كل نوع ونوع قال لي بو 3000 مادته رديئه جدا ً ويتقشر بعد فتره ويتغير لونه ويأثر على صبغ السياره لدرجه إن الخطوط تبين على السياره عقب ما تشلها ومستحيل تنمسح لو تسويلها 10 مرات بوليش
وبو 7000 قال لي هالنوع شبيه تماما ً بالأصلي ومستحيل يتغير لونه لو شو ما تعرضت السياره لأي عامل من عوامل الجو وإذا حبيت تشله عن السياره ما يأثر على الصبغ نهائيا ً
وبو 5000 مادته متوسطه التأثير يعني زينه وشينه في نفس الوقت
بالنسبة للجناح : تدرون إنه أي قطعه إضافيه تقليديه تتركب على السياره تأثر عليها من ناحية الضجيج والثبات ويمكن تكون خطيرة بعض الأحيان لإنها ما تتثبت بطريقه محترفه وتخيل لا سمح الله وانته ماشي بسيارتك ويتبطل هالجناح ويضرب في السياره لي تمشي وراك ..!!!
بالنسبة لمصابيح الإضاءه : لا تستهينون بها نهائيا ً لإني أذكر إنه واحد من خوياي ركب ليتات اعتقد صناعاتها كورية .. والعازل على عليها (السيل) ماكان مركب بطريقة صحيحه من المصنع وبعد ما غسل السياره وطلع فيها شغل الليت العالي اللي هو (زينون) .. وعينك ما تشوف النور راحت عليه الظفيرة الرئيسيه للسياره وقيمتها ف الوكاله 7500 درهم والله ستر ان السياره ما احترقت لإنها كانت إطلع دخان حزة المصيبة !!
يعني إدفع شوي عالإكسسوارات الأصلية واطمن على السياره وعلى سلامتك
( الزين غالي لكن الأزين أغلى .. ولكل شراي ٍ بضاعه وسوقي ) |
ولمشاهدة موضوع الغش التجاري بالكامل إليكم الرابط التالي :
بالدليل القاطع الغش لدى وكيل تايوتا بالسعوديه @ مدعم بالصور @ كروزر 2008