[كلمات كامري]

الاخوة الأعضاء السلام عليكم

اما رحت معارض النسيم امس وكلن ودي اشتري هايلوكس للوالد.....وحصلت بعض الهايلوكسات اللي ملمعه ومغبره قدام معرض الزيد....
حصلت غمارتين 2001 جي ال اكس مسيومة ب 42 الف ...خذيتها ووديتهاغ للفحص في الغروب..
وكانت النتيجة:
1- تصفية مكينة ( تهريب بسط للكربون )
2- تهريب لزيت القير ولكن القير ما يطلع صوت
3- صدمة من جهة الرفرف الايسر تحت الكفر تقريبا

المكيانيكي يقول ان السايرة طيبة... وخذيتها ب41 الف
تكفون يا اهل الخير اخذها والا اخليها لأني صحيت اليوم الصبح ضايق..
الله يوفقكم نوروني

[ابوفيصل]

والله اخوي كلمات كامري انا مالي خبرة في هذه المسائل

لكن اذا انت مصلي ركعتين ومستخير الله قبل لاتنام واصبحت ضايق

فهذه علامة من الله انك تصرف نظر عن الموضوع

(ما خاب من استخار ولا ندم من استشار )

تمنياتي لك بالتوفيق

[حبيتك يا كامري]

شف انا خوك صل ركعتين من غير فريضة وغير الوقت المنهي عنه وبعد الصلاة قل ((اللهم اني استخيرك بعلمك واستقدرك واسالك من فضلك العظيم فانك تقدر ولا اقدر وتعلم ولا اعلم وانت علام الغيوب اللهم ان كنت تعلم ان هذا الامر ويسميه خيراً لي في ديني ومعاشي وعاقبة امري اوقال (عاجل امري واجله ) يعني اما ان تقول هذا او هذا فاقدره لي ويسره لي وان كنت تعلم ان هذا الأمر شراً لي في ديني ومعاشي وعاقبة امري اوقال عاجل امري واجله فاصرفه عني واصرني عنه واقدر لي الخير حيث كان ثم رضني به ))
تحياتي لك ياالغالي
والله يوفقك ان شالله

[مستعد]

المشكلة اخي في تهريب زيت القير بعدين بهذي القيمة المفروض تأخذ انظف منها رأيي ان تصرف النظر عنها وان تتركد وبإذن الله تحصل انظف وافضل

[الغامدي بوغلا]

مساءالخير
اخوي كلمات كامري
روح في السياره الوكاله وشوف تكلفت العيوب التي ذكرت واخصمها من 40000

[ابو الوليد]

يالغالي انا اقول لاتستعجل
لان عندنا يالشرقيه السعر هذا يجيب لك 2002 glx او 2003 وسط او عايديه
وعلى فكره اسأل مجرب جميع الفحص الي عند المعارض سواءً في الدمام او الرياض وغيرها كلهم نصابين وكلام فاضي الي بتحطه في فحص المعارض ادفعه للوكاله او لشركة سهم او احد الشركات الكبيره لصيانة السياررات

ومثل ماقلت لك 42 غالي جدا جدا

واذا تبي ادور لك انا جاهز
والله اعلم واحكم


واتمنى لك كل التوفيق

[طم طم]

ما أنصحك السعر غالي ..

41.000 تجيب أطيب من كذا

موفق

[هلالي شقراوي]

يخوي نصيحتي دور واحد غيره على العيوب الي فيه سعره غالي والشور لك

[كلمات كامري]

اشكر الجميع على تفاعلهم مع الموضوع....وسافكر في الامر
جزاكم الله خير

[ابوصالح]

غالي خصوصا انه مو نظيف
42 وموديل 2001
كثيره

[عبد المجيد محمد]

ياخوي انا لاقي 2005 وتقريبا عداده شبه زيرو وبـ 64 الف ريال في معارض الشفاء ..
انا ماانصحك تاخذ السيارة اللي قلت انت ام 42 الف لانها غاليه جدا جدا لو كانت نضيفه فما بالك وهي تعبانة ..
انا نصيحتي لك رح لمعارض الشفاء وبتلاقي هايلكسات على كيفك وماتحتاج انت تدور عليها لانها هي اللي بتدورك من كثرها هناك هههههههه.


ونسيت اقول لك اني لقيت ايضا وحدة مستعملة 2005 بـ 54 الف تقريبا .. هذا الكلام قبل 3 شهور فمابالك باللحين اكيد رخصت ..

[زياد التركي]

بالتوفيق ............

[شعولي]

اخوي غاليه جدا جدا انا خالي بايع واحد هايلكس 2004 ماشي 70
قبل 4 شهوووور ب 44 الف يعني الي بتاخذه مره غالي وانت وعقلك فكر وشوف الي يناااسبك