[أمير الرمال]

السلام عليكم يا شباب

عندي مشكلة في السيارة محيرتني ولا عرفت سببها مع أني غيرت جنزير المكينة مع طرمبة الموية (على حسب نصيحة الميكانيكي) وخسرت 1500 ريال على الفاضي وتمشكلت مع راعي الورشة ولا تصلحت السيارة ولا رجعت الفلوس. خلاصة الكلام المشكلة غريبة إذا مشيت بالسيارة ودورات المكينة نازلة تقريباَ عند 2000 أو 2500 والدعسة ناعمة على المكينة تطلع الطقطقة، إذا صرت أغير على 3000 تقل الطقطقة، وإذا كنت مثبت على 120 كلم ما يطلع أي صوت بس إذا دعست تطلع الطقطقة قوية خاصة إذا كانت الدعسة كاملة.

أرجو تفيدوني ياشباب لأني متحطم وماعرفت المشكلة وخسرت فلوسي وراعي الورشة (الله لا يوفقة) ماعرف المشكلة وقاعد يلفقلي في الكلام.

لا تنسوني من منصيحتكم وإذا كنتم تعرفون ورشة فيها مكانيكية زي الأوادم في الرياض لا تبخلو علي بأسمها وموقعها (في الرياض)

وآسف على الإطالة.

أخوكم أمير الرمال

[عسكـــــريم]

ممكن يكون الجنزير مو مشدود مضبوط

او الديلكو متأخر

ياريت احد الاخوان يفيدك اكثر

[من الخفجي]

ممكن طقطقة بلوف بس انت تسمعها وانتي تمشي 120
لو 8 سلندر يمكن البخاخات يبيلها تصفية
اخوي امير اشرح اكثر نوعية سيارتك وكم موديلها علشان تستفيد من الاخوان

[أمير الرمال]

الأخ عسكريم، الصوت نفسة قبل وبعد تغيير الجنزير، بالنسبة للديلكو كيف أقدر أتأكد منه؟

الأخ من الخفجي، نوع السيارة مكسيما 99 وصوت المكينة عادي وناعم على 120 ، بالنسبة للبواجي أنا أغيرها بشكل دوري ونفس الشي بالنسبة لفلتر البنزين وفلتر الهواء، السيارة تقريبا ماشية 260 ألف.

وإذا كان عندكم يا شباب أي أسئلة أخرى أنشاء برد عليها.

ويعطيكم العافية ياشباب على سرعة التجاوب.

[عسكـــــريم]

اذا كانت الطقطقه والسياره واقفه هذي اعتقد مثل ماقال لك اخوي من الخفجي بلوف

بالنسبه للديلكو اذا كان متأخر

اضغط على دواسة البانزين كلها والسياره في حالة سكون او حتى لو في السرعات المنخفظه مثلا 20 كلم

اضغط على البانزين للاخر واذا سمعت صوت يقول لك (كرررررررررر)

فهذا الديلكو متأخر ويبي له ميزان

[أمير الرمال]

زي ما قلت يا أخ عسكريم يطلع صوت (كرررررررررر) إذا كانت السيارة تمشي على سرعة 20 مثلا ودعست الدعسة قوية أو كامل يطلع الصوت أما إذا كنت واقف ما يطلع أي صوت وصوت المكينة عادي جداً. أعتقد إن المشكلة في الديلكو، ما أدري كم تعتقد أنه يكلف تصليحة وهل يحتاج قطع غيار؟ وذا كنت تعرف ورشة جيدة في الرياض أكون لك شاكر ومقدر ويعطيك ألف عافية على التجاوب السريع.

أخوك أمير الرمال

[المكيانيكي]

صعب تحديد المشكلة بدون سماع الصوت على الطبيعة في السيارة او قيادتها
لازم تروح لورشة كويسة احسن من التكهنات لانك بتخسر فلوس كذا بالفاضي
زي ما سوا فيك راعي الورشة

[صمت المساء]

تأكد من نوع البنزين اللي تستخدمه
لان على ذمة الرواة اللي بيقولون ان البنزين رقم 91 يعمل طقطقه في ماكينة السيارة
لذلك انصحك باستعمال بنزين 95

[عبد المجيد محمد]

اخوي امير الرمال اعرف ورشة مذكورة لي بالخير وملاكها رجالان سعوديان . واحد منهم اسمه فيصل التويجري( ابو سعود ) والثاني مدري وش اسمه وكلهم ميكانيكين . يعني صاحبا الورشة يشتغلون في الورشة ,,
كان عندنا صالون يطلع ريحة فرامل وخسرنا عليه حوالي 800 ريال على الفاضي .. ثمن قال لي خالي عن هذي الورشة ومدحها لي ويقول انه موضب عندهم قير ويقول شغلهم ممتاز .. وانت رح لهم وشف وش يقولك في سيارتك .. وانا الى هالحين عندي مشكله في سيارتي وكل مارحت لهم لقيت عندهم زحمه والى يومك ما دخلتها عندهم ..
واذا كنت تبي الوصف او رقم ابو سعود رد علي ..

[أمير الرمال]

الأخ الميكانيكي، يعطيك ألف عافية على التجاوب.
الأخ صمت المساء، أنا استعمل بنزين 91 من أول ما طلع ولا كان فيه أي مشاكل مع أني أشك في البنزين والديلكو بعد وشكلي بغير إلى 95.
الأخ عبدالمجيد محمد، فضلاً وليس أمراً أبي رقم الورشة إلي ذكرت وأكون شاكر لك ولا يهونون الشباب.

ويعطيكم ألف عافية يا شباب على التعاون معي في حل المشكلة وأنشاء الله تنحل.