بعض المقتطفات من الشعر النبطي في مجال الحكمه
أعجبتني كثيرا فأحببت أن تشاركوني قراءتها ...
أتمنى أن ترقى لذائقتكم ,,
راكان بن حثلين العجمي يقول:
ما قل دل وزبدة الهرج نيشان
والهرج يكفي صامله عن كثيره
الذم ما يهفي للاجواد ميزان
والمدح ما طول ايدينن قصيره
تركي بن حميد
اخير منها ركعتينن بالاسحار
لا طاب نوم اللي حياته خساره
* * * * * *
بندر بن سرور
دنيا" نبي تقزيرها ضحك حجان
ولا ترا سيورها مستقيله
والرجل غاية ملحته قلب ولسان
وألا أن باقي جثته حنضليله
عبدالله بن عون
الادمي لولا المكارم والاخلاق
كالحنظله من عرقها لا ورقها
سعد جدلان الاكلبي
ما كل رجال لو طالن اشانيبه
يقضي لزوم الرياجيل وتعناله
عيد بن سمير الحربي
الله ستر خلقه بلبس الهدومي
والناس تفرق بالفعايل والاطباع
بركات الشريف:
احفظ رثك اللي عن الناس يغنيك
اللي الى بان الخلل فيك يرفاك
اجعل دروب المرجله من معانيك
واحذر تمايل عن درجها بمرقاك
أدب ولدك كان تبغيه يشفيك
واستسفعه من بعد مرباه يالاك
وهذا الشاعر: سليمان بن شريم من بني زيد يقول
وربعك الى بان الخلل فيك عافوك
اقرب قريب لك من الناس يشناك
ان كثر مالك اصدقولك وطاعوك
وان قل ما بيدك شانت حلاياك
لو تطلب الماء عندهم كان ما اسقوك
ابعد مزارك عن وطنهم ومرباك
وان طاب حظك اصدقولك وحبوك
وان بار كل ما يبي غير فرقاك
وهراجة المجلس الى جيت وروك
منازل تطرب نظريك بدنياك
والى قضوا منك اللوازم وخلوك
تفرقوا وانت احتمل لحل ما جاك
كنك سراج البيت للنور شبوك
واللي انقضى اللازام حد الربع طفاك
الى ان قال
واصحى لخلان الرخا لو تغالوك
اعرف ترى اطيبهم الى احتجت يجفاك
كنك خوي مقيط دهووك واغووك
وحقك عطاك رشاك واقفى وخلاك
واحذر عن العيلة ترى الحق مدروك
مثل العمل يدركك ما منه فكاك
وان كان عدوانك على الضيق حدوك
فاخصم طلابتهم بعجفاك وقداك
وان كان هم لمشرف الحق ما شوك
ناظر مطاليع الفرج قبل مبداك
واحلم على الجاهل ترى الحلم مبروك
وقم للضعيف اللي من الضيم ينخاك
وادمح خطا جيران بيتك الى اوذوك
ترى القصير وحرمة الجار بحماك
وقم للضيوف اللي لفولك وضافوك
اغلا كرامتهم حجاجك وبشراك
ابو التميمي
احرص عن الزلات في كل الاحوال
لا تنخدع باللي يعلج اللبانه
ما يفتري ويشين الناس رجال
راع الحكي بالناس خله وشانه
عليك باللي بالمهمات سردال
ليث مثل من حط قوسه رهانه
انت وانا نبعد عن القيل والقال
كم واحدٍ يا ذيب ضره لسانه
غازي بن دخيل الله بن عون العتيبي
الرفقه اللي مالها ساس ووصول
اتلى تلياها تروح بسهوله
مثل الذرور اللي على راس غرمول
اول مهب يعترض له يزوله
والفعل ما يطلع على مستوى القول
يقول قول ما يطبق فعوله
والفرق في الافعال,, ماهوب في الزول
والا ترى اطيب ما من الثور زوله
لو غرّهم زوله,, وحطوه مسئول
صاروا مثل راع الغنم ومخيوله
ثوب على جسم على شبه مخيول
ودايعه يفرسهن الذيب حوله
عبدالعزيز الحسن
بعض البشر مثل النجوم المراهيش
انوارهم تزهي بالافراح بشه
افكارهم ري العقول المعاطيش
في الدين والدنيا للاخيار هشه
وبعض البشر عقله من التبن والخيش
لوزان شكله داخل الراس عشه
تركي بن حميد العتيبي
ترك عشير عشرته يوم او دون
ثم يبدل بك عشير وينساك
شف لك قطامي على السد مامون
درع القفا ما ينهض الراس لحذاك
اللي الى اوحى الناس فيكم يهرجون
حامي على عرضك ويدمح خطياك
عبدالله اللويحان التميمي
الشور ما ينفع قلوب المهابيل
كالزند وان حرك تطاير شراره
لو تأمره بالعدل يعرض على الميل
يبتل على رايه بربح وخساره
والطبع ما ينزال غيره بتبديل
مثل الجدي مرساه ليله نهاره
والحنظله لوهي على شاطي النيل
زادت مرارتها القديمه مرارة
غازي بن مهنا الشيباني
ما طار وقع من مطيره ولو حام
والزود مثل النقص ينقص ولو زاد
دنيا تغر الناس في طول الاحلام
ولابد تاصل شرها بين الاجواد
ياماشي بالدرب مسرى ومجهام
لابد من عقب المراويح معواد
احد قضى زامه واحد يمسك الزام
واللي صدر منها يجي غيره اوراد
محمد بن عايض بن هادي الحباني
من رابع الخايب سكن دوم واياه
لبس الدناسه عقب لبس الجدادي
ومن طاوع الشيطان في دينه اغواه
يصبح غريق بين الامواج غادي
ومن عاشر الطيب ترى الطيب شرواه
وبالطيب يرقى نايفات المبادي
خلك مع الطيب وممشاك ممشاه
ورافق على الربع القروم العوادي
عز الفتى دينه وسلمه ومرباه
وربعه عضوده عند قدح الزنادي
تاقف معه وبقدر الامكان تحماه
لا صار باطراف الحبال انعقادي
مرشد بن سعد البذال
لولا الردي ما صار للطيب سمعه
لاشك لهذا ضد ذاك يصير
والناس مثل الماء غدير ومالح
هذا ملاح وذا زلال غدير
والاجواد قربتهم تبيض وجودهم
تنفع ولا من قربهم تأثير
والاشرار نفعتهم مكافاة شرهم
والا ترى قرب اللئيم خطير
الرجل عقل ومرجله وديانه
بلاشك راعي ها الثلاث ظهير
عبدالله العلي الحرير
الى بغيت اتحط كلش على البال
غديت صقار بساقه هداده
تغثك الدنيا ولا ادركت به حال
مثل البعير الى تقلد اشداده
أبيات للشاعر محمد بن احمد بن محمد السديري
قصر يذلك لا تقابل مبانيه
خله عسى شامخ طويله هدامي
خله عسى ما صاب اغادير يفنيه
يودع منازله الطويله رجامي
لو زان مدخاله وطالت حواميه
شيد على الخيبه قليل الرحامي
وحي يوريك المذله وتغليه
انا اشهد انك ميت القلب عامي
من لا يودك لا توده وترجيه
ارفع مقامك يا عزيز المقامي
ارفع مقامك عن عدوك وتوذيه
ويلحقك من تركة رفيقك ملامي
حق الرفيق وواجبه لا تخليه
يلزمك مثل الوالدين الحشامي
اختر عزيز الجار والحق يعطيه
شبل على هرج يقوله يحامي
ومن قارب الاجرب بالامراض يعديه
عدواه تسطي باللحم والعظامي
درب السلامه بينات مماشيه
ودرب العطب يرث عليك اللكامي
ومن قصيدة أخرى يقول فيها
لا خاب ظني بالرفيق الموالي
مالي مشاريه على نايد الناس
لعل قصرٍ ما يجيله اظلالي
ينهد من عالي مبانيه للساس
لا صار ماهو مدهل للرجالي
وملجا لمن هو يشتكي الضيم والباس
بحسناك يا منشي حقوق الخيالي
يا خالق اجناسٍ ويا مفتي اجناس
تجعل مقره دارس العهد بالي
صحصاح دوٍ دارس ما به اوناس
البوم في تالي هدامه يلالي
جزاك يا قصر الخنا وكر الادناس
متى تربع دارنا والمقالي
وتخضر فياض عقب ماهيب يباس
نشوف فيها الديدحان متوالي
مثل الرعاف بخصر مدقوق الألعاس
ومن رائعة اخرى يقول السديري
لا تقرب الأجرب بالامراض يعطبك
يصير جسمك مثل جسمه عليلي
ممشا الخطا من صافي العقل يسلبك
ويصير لك يم الرذيله سبيلي
وعن ما رد الانذال نزه مشاربك
واشرب نظيف لو ورادك طويلي
ولياك تنسى يا ابن الاجواد واجبك
واللي يروم المجد حمله ثقيلي
يالادمي وان كان كبرت مصايبك
ازبن على محي البلاد المحيلي
أزبن على رب بعرشه يراقبك
وناجه وبعد العسر يسره جليلي
محسن بن ناصر المري
قوموا بدين الله ورزوا شعاره
واخشوا نهار فيه تخطيف الابصار
دنياك مرجعها الفنا والقشاره
لا تامن الدنيا ترى الوقت غدار
لابد من قبر وحيش جداره
من مات ياالمسكين خلي على الدار
أتمنى أن تنال اعجابكم
المواضيع المتشابهه للموضوع: مقتطفات من الشعر النبطي 
مقتطفات من الشعر النبطي 
