[حياة_التميز]

أحبائي تحية طيبة و بعد

حبيت أحط موضوع يشملنا كلنا أصحاب الاورين سواء تورينج سياحي أو جراندي نتشارك فيها أمور مهمة بينا و قضايا قد تواجهنا من شخص لاخر

الامور قد تشمل الاتي ( مع ذكر أهمية عرض القضية أو الامر )

1. مثلا أسعار الصيانة عند 5,10,15,20,25 الف حتى لا نكتشف أن فرع أزود من فرع أخر و طبعا هذا الشيء راح يفيدنا في معرفة الفروع الي مزايدة في أسعار الصيانة الخ .
2. أهم المشاكل التي واجهتك او متخوف منها أو لاحظتها في السيارة
3. تجربة ميكانيكية حصلت معاك و تتمنى تحذر منها الشباب
4. شيء جديد أكتشفته بالصدفة بالسيارة و حاب تدلنا عليه
5. أهم افكارك المستقبلية للسيارة من تغيير شكل او اضافة لمسات ووو الخ

طبعا الامور والقضايا غير محصورة بالي ذكرته بس هذا من باب اعطاء امثلة حية

إن شاء الله بعد ما أشوف أول رد راح اشارك كمشارك عادي معاكم و يعلم الله غرضي أن الفائدة تعم وأتمنى من قلبي الكل يشاركنا بقضاياه و همومه و مخاوفه و تجاربه ألخ

دمتم سالمين

[المكيانيكي]

مشكور اخوي وما قصرت على هالموضوع ومشاركاتك جيدة
انا سويت الصيانة عند 1000 و5000 بس بدون ما اغير عندهم ولا شي لاني ادري ان صيانة عبد اللطيف ما عندك احد وطبعا كلها مجاني انا سويت كذا بس عشان يدخلون بيانات سيارتي بالجهاز عندهم عشان لو صار لها شي بعدين لا سمح الله تكون بياناتها موجودة (الصيانة فرع عنيزة)
الشي اللي لاحظته على السيارة اليومين هذي هو انه في اليل بس اذا صار المكيف شغال ضغط المكينة يطلع وينزل من 600 الي 900 ثلاث مرات متتالية واذا فصل المكيف يستقر على 600 واذا شبك يطلع وينزل بطريقة شبة سريعة ثلاث مرات ويستقر وبشيك عليها بنفسي قبل ما اوديها للصيانة اللي ما من وراهم الا حوسة السيارة
ما ادري هل احد عنده نفس المشكلة او لا... تراها تبغى واحد يدقق على ضغط المكينة والمكيف شغال سيارتي الحين ماشية 12000 والمشكلة هذي ما تطلع عندي الا من بعد المغرب اذا صار المكيف شغال بس وفي النهار ما تطلع عندي ويكون ضغط المكينة ممتاز جدا والمكيف شغال
اعتقد انها تكون مشكلة باحدى حساسات الهواء اذابرد المكيف في الليل يمكن فيها تراب او غبار بشيك عليها واشوف وعطيكم خبر
شي ثاني ما عندي اي مشاكل بالسيارة ولله الحمد

[ابوصعب]

الميكانيكي انا عندي نفس المشكلة ؟؟

[الليفر]

انا رحت صيانه الـ 1000 كيلو وكانت مجانية
لكن الباقي بصراحه انا مشكلة مدري هي بكل الاوريون
ولا بس حقتي وهي اذا دعست البنزين على آخر شي يعلق .!!!

امس كنت بالفجر وجربت الدعسه وعلق واشوف السرعه قدامي تزيد
ولا اقدر اسوي شي حاولت اني افرمل كم مرة عشان اخفف السرعه
وحطيتها على S واخفف السرعه والحمدلله ربك ستر وهذي ثاني مرة يعلق
علي البنزين والمشكلة انها ماتصير معاي الا اذا كانت السيارة واقفه ودعست على البنزين
بأقوى شي .!!

اتمنى ان احد يفيدني بهالشي لاني متخوف منها بصراحه ..

[حياة_التميز]

مشكورين اخواني على المشاركة و اخواني الميكانيكي و ابو صعب مشكلتكم ما قد لاحظتها بس لازم اشيك ممكن يكون عندي نفس الشيء . بالنسبة للصيانة
كلفتني صيانة 5000 = 120 ريال
صيانة 10000 = 340 ريال
صيانة 15000 = 120 ريال

والان وصلت 18900 و باقي شوي على صيانة ال 20000

اهم الاشياء الي واجهتها

بعض الاحيان لمن تكون الدرجة الخارجية اعلى من 46 ما يبرد المكيف حتى لو حطيتها على اقل شيء و دفع الهواء على أعلى شيء

مشكلت اخوي الليفر واجهتني 4 مرات في أخر مرة شفت الموت علقت الدعسة على 200 وامامي اشارة و ما حبيت احطها على الجير التتابعي بس ربي ستر مع محاولات مستمرة فتحت التعليقة

مشكلتك اخوي راح تضحك لو عرفت سببها

بعد ما شيكت في الوكالة و لفيت يمين يسار اكتشفت ان الفرشة ( الدعاسة ) الي تحت رجلك وانت بكرامة تدخل فوق دواسة البنزين و تخلي البنزين يعلق بسبب ثقل حجمها ( طبعا لو تلاحظ إن ارضية السيارة جدا ناعمة مما يجعل الفرشة تتحرك باستمرار .

أول ما انتبهت لهالمشكلة و صرت دايم قبل ما أدوس انتبة لبعد الفرشة عن الدواسة انحلت المشكلة و من يومها ما علقت معاي الدواسة . جربها و ان شاء الله تطلع هي السبب في التعليقة .

اهم الملاحظ . مسجل السيارة مقارنة بالسيارات الاخرى نوعا ما ضعيف و عرفت ويش هو السبب
قمت بفتح السمعات الخليفة واكتشفت انها ذات قطر جدا جدا صغير ( والله عيب تكون في سيارة و كمان صنع تايلند ) المهم السمعات الخلفية بقوة ضعيفة تقريبا 40 وات و ما تستحمل امبليفاير المسجل قمت بتغيرها واستبدلتها بسمعات 470 وات و الصوت صار جنان ما شاء الله بس للاسف الفني ما شبكها صح و سبب شورت سيركث و فتحت انوار الايرباك و صلحتها في تويوتا بعد ما دفعت 450 ريال
المفاجأة الكبرى ( اكتشفت إن تويوتا عملت ريكول " استدعاء لبعض سياراتها بسبب انوار الايرباك والله اعلم لو كانت مجرد صدفة )

سؤالي الان للاخ الميكانيكي

أخوي انا انسان دعستي مرة ثقيلة على السيارة يعني ما اصدق على الله في أي لحظة اتسارع . حاولت أقراء في النت لو ليها مضار كل المواقع اجمعت ان السيارة ما يضرها الدعس الا لو دخلت في الاحمر و حملت المكينة فوق قوتها أو تسارعت فجأة و توقفت
هل دعستي ممكن تعدم السيارة أو تقصر في عمرها مع مراعات إني ما ادعس الا بعد ما يكون عداد الحرارة مستقر و تكون سخنت 100 % و الصمام الاماني فتح . ارجوك ساعدني لاني من جد مطلع عيونها دعس

[المكيانيكي]

ابو صعب دام المشكلة موجودة عندك اجل خلني اشوف وش السبب واعلمك انت والاخوان وانتبه يحوسون عليك السيارة حقين الصيانة لا تعرض المشكلة عليهم لين نشوف ايش السبب
الليفر التعليق صار معي انا كم مرة اذا عطيتها النار بس اتضح لي انه من فرش الارضية ما حطيت القفل حقه وترتفع فوق وترد دعسة البنزين وتخلي الدعسة تعلق عقبها ركبت قفل الفرش اللي يجي مع السيارة وراح التعليق

[حياة_التميز]

اخوي الميكانيكي ( شفت كيف افكارنا متشابهه خخخخخخخخخخ ) بس حبيت اسألك ويش هو قفل الفرش ووين احصله لاني صرت اسوق بيد و يدي الثانية على الفرشة . و لا تنسى سؤالي في الاعلى الموجه ليك

[المكيانيكي]

حياة التميز شرحك سرا
ابد ما يضرها بس عاد لا تكثر عليها ترا تذبحك بصرف البانزين ودامك كذا لازم انك تواضب على تبديل زيتها كل 3000 كيلو افضل وابد خذ راحتك بس عاد لا تبخل عليها بشي بس انتبه للطريق وانت داعس ترا الموتر قنبلة ما شاء الله تبارك الله ومسك الدركسون زين وانتبه لا يطلع عليك احد
وارجو انك تدقق بمشكلتنا انا وابو صعب ترا في الليل بس اذا برد المكيف وصار يفصل ويشبك لاحظ ضغط المكينة دقق فيه اكثر من دقيقتين خل عينك عليه وقول لنا اذا لاحظت المشكلة

[المكيانيكي]

قفل الفرش يجي بكيس الفرشات يوم كانت السيارة جديدة قطعتين بلاستك تركب بالفتحات اللي تحت مقعد السواق لها مشكوبيتين تركب بفتحتين للفرش تمسك الفرش عشان ما يزحلق للدعسة
على فكرة هذا القفل موجود من ضمن مواصفات السيارة

[حياة_التميز]

مشكور اخوي على الشرح و راح اشوف الكليبسات ممكن احصلها في السيارة او اروح تويوتا و اطلبها .

بالنسبة للدعس مشكور لاني كنت خايف ولا يهمك ان شاء الله مو دايم بس بعض الاحيان لمن يجيني ازعاج من سيارات اخرى . انا مواضب على غيار الزيت عند كل 5000 تشوف اني احسن اغير ل كل 3000 ؟

و بالنسبة للمشكلة عندكم بالمكيف راح احاول انتبه لها فكرت بشيء ورد في نفسي كسبب علمي والله اعلم لو صح ام لا ( ما تلاحظون ان المكيفات في البيوت تشتغل و بعض الاحيان تفصل و السبب إن الكومبروسر مو دايم شغال أول ما يشتغل يشتغل النور الصغير بالمكيف و اول ما يفصل يطفى النور ) اتوقع ان السيارة نفس الشيء لاني تأكدت ان الكومبروسر مشبوك بالمكينة و لو تلاحظون الامبير يزيد اول ما تشغل المكيف . طبعا تويوتا المفترض تكون لغت هالشيء من قاموسها لاننا صرنا في عام 2007 بس الله اعلم ليش . المهم اتوقع وليس أكيد بان اول ما يشتغل الكومبروسر يزيد الامبير بس برضوا مو اكيد كلامي لانه مجرد استنتاج

[المكيانيكي]

طبيعي انه يزيد ضغط المكينة اول ما تشغل المكيف و اذا شبك المكيف ولكن اللي صاير معي ومع الاخ ابو صعب انه الضغط ينزيل ويرتفع ثلاث مرات ورا بعض اذا شبك المكيف وبحاول اصورها بالجوال وانزلها هنا
واذا ابو صعب بعد يصورها وينزلها عشان نشوف نفس الشي او لا

[الليفر]

اخوي / حياة _ التميز

الف شكر لك وبالفعل مشكلة الدعسه هي من الدعاسات
ومشكلتها ان تزلق وبصراحه انا كنت متخوف انها مشكلة بالسيارة
لكن الحمدلله انها طلعت شي حتى ينضحك منه ..

بس مادري اقدر اثبتها بشكل افضل حيث اضمن انها ماتتحرك ؟؟

[احلى واحد انا]

السلام عليكم

انا سيارتي طلعت من قبل 4 ايام والحين ماشية 1100 كم تقريبا وبويدها صيانة الألف قريبا..

انا بصراحة رجلي مرة قاسية على السيارة

احب ادعس واسرع واكتم

بلا تمرين بلا هم هذا تمريني انا <*****ههههههه

بس صدق الحين لو تعود سيارتك على الدعس والسرعة تصير قوية وقت القومات لانها تمرنت على هذا الشي خلاف السيارات الثانيين ..؟

المهم

انا عندي كم من مشكلة

لمى تكون السيارة واقفة والف الدركسون يمين او يسار يرتفع ضغط الماكينة شوي ليه !؟!؟!

المشكلة الثانية اول مامشي شوي اسمع صوت طقة طخ كاني دست طابوقة مدري وش مشكلة هالصوت خايف !!

المشكلة الثالثة لمى اكون ماشي 120 وفوق وابي اهدي السرعة او اوقف يهتز الدركسون وتبدا السيارة تنفض ؟!؟!<***** مو دايم هالمشكلة تصير قليل ونادر لكن ليه ؟؟!؟

وبس

اتمنى من اخوي الميكانيكي الإجابة على سؤال التمرين..

الرجاء ياخوي اذا عندك اي ملاحظة لطريقة تمريني قلها وعادي اتقبلها بصدر رحب ..

ومشكورين ..

[المكيانيكي]

اخوي الليفر
يوجد بكيس فرش السيارة قطعتين بلاستك اسود(كلبسات) وضيفتها تمسك الفرش حق السواق وتركب بفتحات بالفرش الاساسي للسيارة والفرش الاضافي وهي اللي تمسك الفرش الاضافي انه ما يزحلق ويعلق بالدعسة

[المكيانيكي]

اخوي احلى واحد انا
مرنها على مزاجك وزي ما تبي ولا تخاف دامك تعديت 300 كم ولا تسمع للي يقولون لاتشغل مكيف ولا تسرع ولا تشغل المسجل ولا تفتح النور كلها اوهام وهرج مجالس وعلى مسؤليتي
-------------
اما اذا لفيت الدركسون والسيارة واقفه يزيد ضغط المكينة هذا طبيعي وبكل السيارات لان دركسون السيارة يعمل على ضغط هيدروليكي مربوط بسير مع محرك السيارة وهي ليست مشكلة ولا تخاف الامر طبيعي جدا
------------
صوت الطقة بعد ما تمشي هذا بكل الاوريون وهو ايضا طبيعي وهو جهاز الاي بي اس حق البريك والصوت يدل على انه يعمل بشكل طبيعي ولا تخاف منه نهائي
-----------
مشكلة هزة الدركسون ونفض السيارة اذا هديت السرعة هذي ما تضهر ولله الحمد عندي ولا اقدر احكم عليها لاني لازم اجرب السيارة واسوقها واشوف ايش مشكلتها

[ابوعبودي]

بالنسبه لصوت الطقه هذا حق الabs للفرامل وتعني انو النظام شغال ويطلع لمن تشغل السياره وتمشي حوالي 15-20 km وهذا عايدي جدا.

بالنسبه للطاره اشوف انو عايدي وحتى انا عندي في السياره نفس الشئ واعتقد والله اعلم هذا يساعد في سرعه تدفق زيت الطاره مما يساعد على خفت الطاره والسياره واقفه.

والشباب برضو ما حيقصرو في الردود.