[ثـــــــــــامر]

مرحبا شباب .. انا اليوم وديت سيارتي للوكالة لصيانة 10 الاف .. السيارة ماخذت الى 30 دقيقة تقريبا شي حلو بس الحساب طلع 400 ريال حسيت انه كثير ولما سالت قالوا ماغيرنا الا الزيت والسيفون !! انا بسال كم تكلفة الصيانات الجاية لايكون بالغلاء هذا .. وبعدين وش رايكم متى الواحد يوقف الصيانة عند الوكالة برأيكم

[هلالي شقراوي]

يخوي السعر غالي بعدين اذا كنت ماتبي ادلع موترك وقف بعد صيانة 1000 اصلن مايظر الموتر اذا وقفت الصيانه عنه اهم شي وده صيانة 1000 عشان مايكون في الموتر عيب مصنعي ولا اذا شكيت في شي في الموتر موهب عاجبك وده الوكاله

[المكيانيكي]

وقف الصيانة عند 1000 او 5000 بدون ما تغير عندهم شي تشييك فقط بدون غيار زيت وسيفون
واذا بتستمر بالصيانة قلهم لاتغيرون ولامسمار تشييك فقط لا غير وقلهم تراني منيب دافع ولا ريال لاي شي تغيرونه وانتم بكيفكم
وغيرالزيت عند البناشر

[روحي أفالون]

المفروض الواحد يودي سيارته بعد الـ 1000 كيلو بس عشان ان كان فيها عيوب وإلا شي وعقبها لاتشوف سيارتك الوكاله أبد
حافظ عليها زي ماتحافظ على عيونك ولايجيها إلا العافية إن شاءالله
وإذا استنكرت شي في السيارة ذاك الوقت ودها للوكالة يشوفونها
وجهة نظري
دمت بخير عزيزي

[أمير الرمال]

أخوي ثامر أنا أنصحك تسأل الوكالة إذا كان الضمان يلغى إذا وقفت الصيانة عندهم،
فيه صيانة مهمه لسيارة وهي (1000 و 10000 و 20000 و 40000 و 60000 و 80000 إذا كان الضمان يستمر إلى 80000).
لو تلاحظ يا ثامر كل صيانة يكون فيها جدول بتشييك أو التغيير لكل صيانه، من الأفضل أنك تعرف الموجود فيها عشان تعرف إذا كان من الممكن عملها برى الوكاله ولا لا.

أنا صار لي موقف في الوكالة (الحمراني) ما شيكت ال (20000) وجيتهم على (40000) وكان عندي مشكلة في الكلتش وقالي المهندس ليش ما جيت على صيانة العشرين عشان نغيرلك الكلتش كامل على الضمان.

إنشاء الله أفدتك يا ثامر

مع التحيه للجميع

أخوكم أمير الرمال