[متعب الليل]

السلام عليكم ورحمة الله وبركاته

باركولي بعد طول عنااااء افالونتي بتطلع ان شاء الله يوم الإثنين القادم

واعتبروني من اليوم افالوني جديد

عندي سؤال مهم جدا جدا وهي مشكلة بصراحه


ان شاء الله بستلم السيارة يوم الإثنين القادم من الرياض (( عذبوني الوكالة وماطلوا فيني بسبب اللون اللؤلؤي ))
وطلبتها مع التظليله والبلوتوث


طيب انا لازم أمشي يوم الثلاثاء للشرقية بعد العشاء بإذن الله ومعي عروستي (الأفالون) لأن دوامي يوم الأربعاء يبدأ ((توها مخلصه اجازتي))

الحين الشباب هنا ماقصروا قالوا لازم ماتتعدى 100 كلم في الساعه ولازم ماتكون سرعتك وحده ولاتثبت على نفس السرعه اكثر من ساعه
الحين اللي بيمسك خط من بكره يوم الثلاثاء وش يسوي ..؟ ووش تنصحوني فيه يعني لو بمشي 100 والله يبيلي 5 ساعات وزياده ماوصلت


وعندي سؤال ثاني وابي مشورتكم برضه في خلال يوم وش اقدر اضيف على السياره قبل ما اسافر فيها
((أدري انه مايمديني اسوي شي))

شوركم ياجماعه وفكوني من ازمتي بديت اوسوس

[ابوفيصل]

اخوي متعب الليل

اولا الف مبروك السيارة والله يعطيك خيرها ان شاء الله

بالنسبة للسؤال الاول انت جاوبت عليه

التمرين ضروري للسيارة اول 1000 كلم

ولازم ما تتعدا المية

وهذا الشي مكتوب في دليل المالك

ما ادري اذا انت تقصد شي ثاني

اما بالنسبة للسؤال الثاني

فنصيحتي لك انك تفصل برقع للسيارة حتى ما تنعدم عليك وجيهة السيارة

وتنقهر عليها وهي توها جديدة خاصة اذا انت كثير سفر للرياض

او على الاقل حطلها تغبيرة الين توصل للشريقة وبعدين فصلها برقع براحتك

وتقبل تحياتي

[& ابو فارس &]

اخوي متعب الليل

من جد اسمك يخوف ( احس انه اسم رئيس عصابة )


امزح معاك !


الف مبروك وعسى الله يعطيك خيرها ويكفيك شرها


اما بالنسبة للتمرين فهو ضروري جدا مثل ماقال ابو فيصل

وما عليك من الي يقولك السيارة ممرنة في المصنع

صحيح هي ممرنة لكن على سرعات منخفضة والسيارة واقفة

ووش تنصحوني فيه يعني لو بمشي 100 والله يبيلي 5 ساعات وزياده ماوصلت

خذلك شريط قرآن مع محاضرة او محاضرتين من الي يحبها قلبك

وما تدري الا وانت في الشرقية

وبالسلامة ان شاء الله

[السهم الاسود]

الله يعطيك خيرها ويكفيك شرها
ومبروك عليك الافالون
صحيح للحين ماعندي افالون (( قاعد ينتظر 2008 )) :d
التمرين ضروري للسياره الجديده بأول مشوارها
اسمحلي اضيف سؤالين بما اني موسعودي
ممكن ياشباب صوره لبرقع السياره ؟؟ طبعا يلي يملكه
ثاني سؤال ياترى ضروري الواحد يحر السياره قبل لاتمشي ؟؟ وشو السلبيات ؟
السموحه متعب الليل

[ابوفيصل]

المشاركة الأصلية كتبت بواسطة السهم الاسود

..................
ثاني سؤال ياترى ضروري الواحد يحر السياره قبل لاتمشي ؟؟ وشو السلبيات ؟
السموحه متعب الليل

اخوي السهم الاسود

بالنسبة للافالون فلا تحتاج تسخين طويل والسيارة واقفة لانه يضربالمحرك

ولكن بعد تشغيل السيارة بقليل وصعود الزيت للمكينة ممكن تمشي بالسيارة بهدوء

حتى ترتفع الحرارة للوضع الطبيعي

وهذه التعليمات من دليل المالك

تحياتي لك

[غريب المكان]

بكم اخذت السياره كاش ام اقصاد

و1000مبروك

[السهم الاسود]

المشاركة الأصلية كتبت بواسطة ابوفيصل

اخوي السهم الاسود

بالنسبة للافالون فلا تحتاج تسخين طويل والسيارة واقفة لانه يضربالمحرك

ولكن بعد تشغيل السيارة بقليل وصعود الزيت للمكينة ممكن تمشي بالسيارة بهدوء

حتى ترتفع الحرارة للوضع الطبيعي

وهذه التعليمات من دليل المالك

تحياتي لك

اشكرك عزيزي بوفيصل على الرد

[مجنون الأفالون]

مساء الخير جميعا


إستفسار بسيط للاخ أبو فيصل

ونقوله مسائك ورد


لكن ما تتوقع إن الأخ متعب لو يستمر روحه للشرقية وبـ 100 كيلو متر راح يتعب السياره

أقصد إن الأفالون تمشي فيها 100 كيلو متر بالساعه واحتمال يوصل خلال 5 إلى 6 ساعات


اتوقع انه يضرر السياره وتظل شغالة السيارة .... وتوها جديده حتى ماكينتها ما سمع حنتها


انا نصيحتي لك اخوي متعب

حاول بقدر المستطاع انك تستأذن من الدوام يوم الأربعاء ... والسبت داوم ( إذا كان دوامك حكومي )


وحاول انك تمشيها بالرياض وتدربها


لان حرام والله سياره جديده وبرقع وحالتك حالة وتمشي 100 وتتعبها كثير وهي توها مولودة (:


واتوقع لو مشيت فيها الـ 1000 كيلو بالرياض

راح تنبسط وانت رايح للشرقية لان مكتوب بكتيب المالك تمشي فيها بعد الطبلون كله لو تبي ويفضل بعد 1000 كيلو للتدريب


هذي نصيحتي لك

والله يوفقك فيها وتشوف بوجهها الرزق والخير والعافية يا رب


لا اوصيك الصيانة واضب عليها


اخوك


احمد

[نــــاصر]

ووش تنصحوني فيه يعني لو بمشي 100 والله يبيلي 5 ساعات وزياده ماوصلت

اشترك في موبايلي انترنت واشحن بطارية لاب توبك ووو خذ اهم شي براد شاهي بالطريق

على العموم الف الف مبرووووك السيارة وبالتوفيق يارب

[متعب الليل]

السلام عليكم

أشكركم جميعا على مروركم وتفاعلكم معي وجزاكم الله الف خير

والشكوى لله بمشي فيها 100 الين ما اوصل


-------------
اخوي ابوفيصل بالنسبة للبرقع انا سمعت من الشباب انه مضر اكثر من انه مفيد
وكذلك التغبيره اللي تكلمت عنها

فيه رشة عند كار كير اسمها عندهم ((رش وامش)) وهي شفافه تستخدمها مرتين او ثلاث والله ناسي
بس ممتازه جدا
ترشها على الأجزاء اللي تبيها واذا وصلت يا تقشعها عادي او ترش مويه وتروح
اذا تبون اي معلومات عنها انا حاضر
-----------------------------

اخوي مجنون الأفالون ::
خلها على ربك بس المفروض مستلمها من بدري ومدربها وراجع فيها بس بهذلوني الوكاله (( كل يوم ياحمد باتسر))

ومضطر امشي يوم الثلاثاء والله يعينني بس


------------------------------

اللي عنده اي تعليق ياشباب يضيفه
الهدف هو الفايدة للجميع

والسلام عليكم

[وااوأفالون]

ألف مبرووووووووووووووووك على للعروسه للجديده

والله أخوي أمشي 200 كيلو ورايح للسياره وارجع كامل وتوصل بسلامه إن شاء الله

ولا حول تمشي سياره في للرياض لو 200 كيلو عشان تريح للمكينه على الإقل

وعلى وجهية سيارة أنا من ناحيتي أدهن وجهية سيارة فيري وأمشي 220


والله يوفق للجميع

[متعب الليل]

المشاركة الأصلية كتبت بواسطة وااوأفالون

ألف مبرووووووووووووووووك على للعروسه للجديده

والله أخوي أمشي 200 كيلو ورايح للسياره وارجع كامل وتوصل بسلامه إن شاء الله

ولا حول تمشي سياره في للرياض لو 200 كيلو عشان تريح للمكينه على الإقل

وعلى وجهية سيارة أنا من ناحيتي أدهن وجهية سيارة فيري وأمشي 220


والله يوفق للجميع

ياخي انت رهيب

بردت قلبي بردك
شكلي بسوي مثل ماقلت واتوكل على الله
بمشيها يوم الاثنين 200 او 300 كيلو عقبها بشد ان شاء الله وامشي من 100 الى 120 ماراح اتعداها
والله يعين ان شاء الله

[الحـ(درب)ـب]

الف مبروووك على السياره بس ياريتك انتظرت 2008

يالله مالك نصيب بالتغيرات الحاصلة


وتقبل مروري

[بورغد]

يعطيك خيرها ويكفيك شرها كان انتظرت ال2008