صراحة اختي طلبك غريب
يعني راح تتعدد الخيارات على حسب الغاية من السيارة
مثلا الجيوب و الجمسات للاغراض العائلية ووسيعة و برحة
السيارات الصغيرة مثل الاكسنت هونداي و الكورولا و الالنترا واليارس اقتصاديه و ما تتعب و حتى السواق الهندي لو كان غشيم ما راح يدقدق بيها واجد ( لا قدر الله ) اما لو كان اخوك ربي يحفظه راح يسوقها بحكم انه وصل ال 18 فانصحك بالسوناتا و الكامري رغم اني اميل و بقوة للكامري بحكم انها ما راح تتعبكم بنزين و تغيير زيت و بس
لازم قبل ما تفكري في شراء اي سيارة تحطي امام عينك الامور التالية
1. الغرض من شرائها ( هل يوجد اغراض اخرى غير التوصيل للمدارس مثلا اغراض البيت مشاويركم ....... الخ )
2. فترة الخدمة ( مثلا ودك تعيش معاكم سنوات عدة او بمجرد ما يكبر اخوانك تبيعونها )
3. حدود السعر يعني على حسب الميزانية فيه خيارات مناسبة
4. الفئة العمرية للشخص الي بيسوق السيارة و على حسب استخدامه ( مثلا سواق مستحيل اسلمه سيارة غالية . ولد مراهق مستحيل اسلمه سيارة قوية . اطفال لازم السيارة تكون كبيرة لراحتهم وامنة لسلامتهم
طبعا الاستخارة مستحبة في مثل هالشغلات بس فيه اسس علمية لاتخاذ القرارات واهمها ( ركزي عدل في الي راح اقوله لانه راح يفيد باذن الله )
للجودة ثمانية ابعاد تساعد و بشكل كبير على اختيار سلعة ما او سيارة معينة
1. الغرض و الاداء للمنتج
2. السمعة ( مثلا هونداي لا تقارن بتويوتا و حتى في وقت بيعها راح تحافظ تويوتا على السعر
3. الاعتمادية ( والمقصود بها فترة الخدمة للسيارة حتى ظهور اول خلل او بما معناه بالعامية كثرة خراباتها )
4. الخدمة ( و تشمل اسعار الصيانة و سهولة الصيانة و اسعار قطع الغيار مثلا قطع غيار بعض الماركات مثل الاوربية اغلى بواجد من الياباني و صيانة هوندا اغلى من تويوتا و صيانة كامري اسهل بواجد من صيانة بي ام دبيليو
5. المطابقة للمقاييس العالمية ( لا تعيري هذا البعد اي اعتبار بحكم انه خاص بالمواصفات المتفق عليها عالميا )
6. الشكل الخارجي ( و هذا بحكم طبيعتنا البشرية تميل انفسنا لاشكال بعض السيارت اكثر من اخرى و نقول مثلا والله سيارة فلان حلوة سيارة فلان واسعة ,,,, )
7. المواصفات الاضافية ( و تشمل كل ميزة بالسيارة تشجع المشتري على شرائها ( مثلا والله السيارة فيها
مسجل يشغل 6 سيديهات . السيارة فيها تحكم مزدوج للمكيف . السيارة فيها بلوتوث .... ألخ )
8. الديمومة ( ولا دائم الا وجهه عز وجل ) ولكن يقصد فيها الفترة العمرية للسيارة مثلا فيه سيارات ما شاء الله تخدم 15 سنة واكثر مثل الامريكي و الياباني بس الكوري حدة 7 سنوات بالكثير
شوفي بالضبط انتي ويش ودك فيه واستندي على المعلومات الي كتبتها و ان شاء الله راح توصلي لحل
دمتم سالمين
ههههه
ولا أنا غلطانة؟
