[فوو سبورت وود]

السلام عليكم ورحمة الله وبركاته ..
بما ان وكيلنا المدعي بـ عبداللطيف جميل ..

هو من يأتي بالسيارات من الخارج (لتويوتا ولكزس) ..
انا فكرت اني اطلب السياره من الخارج وتجيني ..

بجميع المواصفات لا نقص ولا زياده ، فـ ايش رايكم ؟ ..
هل في ضرر للسياره (مثل ارتفاع حراره الماكينه ... إلخ) ..

لان الصراحه نص مواصفات الافالون مفقوده والسبب وكيلنا ...
فـ انتوا ايش رايكم ، مع طلبها من الخارج ام ضد ؟؟ ...

انا لو اعرف كيف اجيبها من الخارج كان ما ترددت ، بس ..
الى الآن انا افكر فيها (اول سبب) وابي اشوف الـ 2008 (ثاني سبب) ..

ننتظر آرائكم حول هذا الموضوع ، وانا بأحر من الجمر على انتظار ردودكم ..


.: فائق الاحترام :.

[بورغد]

المواصفات الخليجيه طال عمرك مجهزه لتستحمل درجه الحراره العاليه وثانيا الضمان مايسري في الخليج وقطع الغيار الخليجي بعض الاحيان مايركب على الوارد من الخارج وتقبل مروري وممكن بوفيصل والشباب يفيدونك اكثر

[المهذب]

اللي اعرف ان الضمان يشمل السيارة سواء شريتها من الوكيل او غيره دامها تويوتا
وش فايدة الانضمام لمنظة التجارة العالمي
لكن الحرارة الله اعلم
بس انا شايف السيارات الاستخدام اللي تجي لكزس وكامري ماشيه زي الحلاوه ولا فيها شي
ولا تنسى تكاليف الجمارك والشحن

[أفالون خاص]

إذا بتشتريها حط في بالك ان النافيقيشن اللي فيها يحتوي على خرائط أمريكا فقط وعشان تستفيد منه لازم تشوف طريقة عشان تركب عليه خرائط المملكة أو الخليج
تأكد من هالنقطة قبل ما تطلبها مع النافيقيشن وتدفع لك مبلغ وقدره وبعدين ما تستفيد منه

[مجنون الأفالون]

عزيزي فورد سبورت

اسعد الله مساك

وموضوعك مهم صراحة لكثير من الأعضاء

بما يهم السيارات الخارجية ومواصفاتها العالية .....


لكن انا ما انصحك


لأن ابو جميل لو تجيب أفالون أمريكية ... ما راح يستقبلها حتى لو تبي تغير الزيت


وبالنسبة للحرارة .... كلام غير صحيح ... اللهم إنك تضيف مروحه للسيارة فقط

لأن السيارات الأمريكية لا تأتي بمروحه لأن بعض المناطق لا تستخدم المكيف أصلا ....


تأكد انك لو جبت السيارة راح تتأثر من ناحية قطع الغيار ... ومن ناحية الصيانة وقلة الإحترام

لانهم يحسون إنك واحد خائن لعبداللطيف بنظرهم


انا كان معي لكزس امريكي .... ومواصفات أمريكية

وكانت اللي معي موديل 98 نوعها 400

وكان فيها شاشة الـ 430 موديل 2006

ونفقيشن ودنيا وعالم ثاني ومكيف ودي في دي وشاشة عرض وكل شي

وصارت لي مشكلة بخصوص الماكينة ... وعبداللطيف لم يستقبلها

وراح إستقبلها العضيب بكل صدر رحب وصلحها لي زي الألف


هذا حبيت أفيدك فيه

وإي إستفسارات انا تحت أمرك

اخوك

احمد

[ابوفيصل]

اخوي احمد كفى ووفى ماشاء الله عليه

وهو صاحب تجربة في الموضوع

ومثل ماقال المثل "اسأل مجرب ولا تسأل خبير"

بس حبيت اوضح بالنسبة للضمان فالوكيل ملزم بضمان وصيانة اي سيارة

سواء كانت من توريده او امريكي او ياباني

لكن الحركات اللي يسويها كلها تطفيش وقلة احترام مثل ما اتفضل اخوي احمد

حتى الناس ما يفكرون بالامريكي والا لو ارسلت شكوى للشركة يصلحها وهو صاغر

والاخ افالون خاص الله يعطيه العافية نبه لنقطة مهمة وهي موضوع الخرائط

تحياتي للجميع

[بنت الخران]

بالنسبه لموضوع الخرائط

اي لكزس امريكي يتبرمج على الخليجي من ناحيه الخرايط على طوول

اما الافلون الوارد فهو نفس النظام بالظبط

اذااا الافلون يتبرمج حاله حال اللكزس

شو رايكم فى الكلام ....

[عبد المجيد محمد]

اشكرك اخي على الموضوع المهم لان فيه ناس يفكرون يجيبونها من برا ..

لكن ياخوان هل فيه شركة في الرياض اقدر اخليهم يجيبونها من برا من دون ما اروح لامريكا .. وش الطريقة بالضبط عشان نقدر نجيبها .؟؟ وكم بتكلف مع تكاليف الشحن والجمارك ؟؟

وانا اتوقع ان كلام بنت الخران صحيح .. لان في اللكزس is مثل ماتعرفون مدخل سري لسيدي الخرايط تقدر تطلع السيدي وتركب بداله سيدي ثاني .. واتوقع ان الافالون نفس الفكرة .. بس وين هذا المكان السري في الافالون ؟؟
هل توافقونني ؟؟

[أفالون خاص]

المشاركة الأصلية كتبت بواسطة عبد المجيد محمد

وانا اتوقع ان كلام بنت الخران صحيح .. لان في اللكزس is مثل ماتعرفون مدخل سري لسيدي الخرايط تقدر تطلع السيدي وتركب بداله سيدي ثاني .. واتوقع ان الافالون نفس الفكرة .. بس وين هذا المكان السري في الافالون ؟؟
هل توافقونني ؟؟

مكان الـ DVD حق الخرايط في الشنطة ورا على اليسار وأنا شايفه في دليل المالك حق الأفالون الأمريكية ( محمله من موقع أمريكي )
لكن هل يتوافق مع السيدي حق اللكزس ما أدري لأن شاشة اللكزس باللمس لكن الأفالون تتحكم عن طريق أزرار خاصة فيه ( مكان مدخل الكاسيت عندنا )

[هلالي الى الابد]

اشكرك اخي على الموضوع المهم لان فيه ناس يفكرون يجيبونها من برا ..
هو اكيد من برا احسن بس من الداخل اريح واسرع تقبل مروري ولك جزيل الشكر

[عبد المجيد محمد]

اعيد واكرر ياخوان اللي يبغى يجيبها من امريكا هل فيه شركة تتكفل ببشرائها وشحنها مقابل مبلغ ما في الرياض ؟؟ وكم هذا المبلغ ؟؟ وكم نسبة الجمارك اللي تاخذها على السيارة ؟؟

تكفون اللي عنده معلومات بهذي الاشياء لايبيخل علينا ونحن بانتضار الردود ..

[مجنون الأفالون]

المشاركة الأصلية كتبت بواسطة عبد المجيد محمد

اعيد واكرر ياخوان اللي يبغى يجيبها من امريكا هل فيه شركة تتكفل ببشرائها وشحنها مقابل مبلغ ما في الرياض ؟؟ وكم هذا المبلغ ؟؟ وكم نسبة الجمارك اللي تاخذها على السيارة ؟؟

تكفون اللي عنده معلومات بهذي الاشياء لايبيخل علينا ونحن بانتضار الردود ..

هلا والله بعبد المجيد


ان شا ء الله تكون بخير وبعافية

بالنسبة لسؤالك

انا سمعت عن شركات أو عن بالضبط أشخاص يجيبون لك السيارة من أمريكا ... ويجمركونها لك وانت نايم بالبيت ... لكن لهم أتعاب وقد تكون ضخمة وقد تكون لأ

يعني لو تعرف لك شخص يعرف له واحد يجيب سيارات خارجية ... هذا عز الطلب

لانه ما راح ياخذ منك أتعاب ضخمة مثل الأشخاص الثانيين او السماسرة

ولو تروح لتويوتا نفسه وتقوله أبي أفالون أو لكزس طلبية ... يمكن يوفرها لك

لكن طبعا يركب لك القطع أتوقع ويجيبها لك ويقولك هذي طلبية (( عدم ثقة الوكيل خلانا نقول هالكلام ))



وبيني وبينك اخوي عبدالمجيد ... ترى قوقل ما يقصر ... إكتب بحث في قوقل باللي تقدر عليه

إكتب مثلا (( طلب سيارة من خارج المملكة )) أو (( تويوتا أمريكي )) أو (( لكزس أمريكي )) أو

(( طلب المواصفات الأمريكية لتويوتا ))

صدقني راح يجيب لك ألف موقع وموقع وتوصيف لمواقع وشركات خاصة لهذا الطلب

وما راح يقصرون معك

لكن تأكد اخوي عبدالمجيد

بيكسرون ظهرك من ناحية الجمارك والأتعاب

يعني الأفالون سعرها 120 ألف

راح تطلع عليك 140 إلى 150 ألف ريال وانت تضحك

تحياتي لك يالغالي

اخوك احمد

[اصبع نمله]

السلام عليكم

انا مايد ابدا انك تجيبها من برا لان سعرها ٢٠٠٨ في امريكا ٣٤٠٠٠تقريبا ممايعادل ١٣٠٠٠٠ ريال حط في بالك الشحن وغيره من التكاليف
انا من رايي انها غير مجديه

[بنت الخران]

من يحتاج الموقع ؟؟

بطرشله على الخاص

موقع خاص للسيارت مع الجمارك وكل شي

بيجيبون لك السياره ليين البيت ...


والي يريد الموقع يتفضل على الخاص بدوون اعلانات له فى المنتدى


ولكم جزيل الشكر

[فوو سبورت وود]

ما شاء الله ، كفيتوا و وفيتوا يالغاليين ..
بس رأيي انها من الخارج تكون افضل من الداخل ..

(لولا اختلاف الآراء لبارت السلع) ..
اختي بنت الخزان ارسلي رابط الموقع على الخاص ..


.: فائق الاحترام :.