[ابوفيصل]

السلام عليكم ومبارك عليكم الشهر جميعا

طبعا يا اخوان الجميع يعرف ان الافالون تجي من غير بلوتوث اصلا

ويقوم الوكيل عندنا ويركبلها بلوتوث بمبلغ 900 ريال على ما اظن ، والبعض يرفض تركيبه لتكلفته او لعدم ضرورته

ولكن في كثير من المواقف يتمنى الواحد وهو يكلم بالجوال وسط الزحمة انه مركب بلوتوث

ومريح عمره من مسكة الجوال باليد واليد الثانية مهي ملحقة تلف الدركسون ولا تضرب بوري ولا تشغل الفلشر يسار

وهذا الشي حسسني باهمية البلوتوث في السيارة وبديت افكر ، واللي شجعني على التفكير هو الكاسيت

اللي وجوده كعدمه في السيارة بالنسبة لي واللي هو بالاصل مكان لوحة التحكم لشاشة الملاحة اللي حرمنا منها وكيلنا الله ..................... يسامحه

واهتديت اخيرا الي طريقة والهادي رب العالمين ، راح تخلي اللي مركب بلوتوث يندم انه مركبه

نقول بسم الله وركزو معاي وحده وحده

اول شي تشتري كاسيت لتشغيل ( MP3 )



هذا الكاسيت هو اصلا لتشغيل السي دي بلير او MB3 على مسجل السيارة وفيه منه الرخيص والغالي

على حسب الجودة انا شاري من الرخيص من محل ابو عشرة لكن راح يكون له استخدام ثاني بس طولو بالكم شوي

الشي الثاني سماعات الجوال



طبعا يا شباب انا مجرب بسماعات النوكيا لان جوالي نوكيا لكن والله ما جربت نوع ثاني اترك التجربة لكم

الان جينا للجد يالله خلي قلبك قوي وقول بسم الله وقص السماعات الثنتين من طرفها ، وروح للشريط وقص طرف السلك من جهة الراس المعدني

بعد القص والقطع صارت الشغلة واضحة وصل اطراف السلكين المقطوعة ببعض

واذا الشغلة صعبة عليك شفلك اي كهربائي مسجلات يوصلك اياها وانت واقف بخمس ريال

الان بعد التوصيل صار الشريط مع سلك الجوال قطعة وحدة .

خلاص انتهت القصة

الان حط الكاسيت بمكانه في المسجل في السيارة



وتقدر تسكر الغطا على السلك بدون مشاكل



بعد كذا مشي السلك من ورا الديكور البلاستيك



حتى يوصل للعلبة الصغيرة اللي بين المقعدين



خلاص اشبك السلك بالجوال مكان السماعات وحط الجوال على حامل الجوال بالعلبة



وتمتع بصوت الجوال على سماعات السيارة

طبعا للرد على المكالمات او لاجراء اتصال حول المسجل على الكاسيت

بالضغط على زر ( TAPE ) والتحكم بالصوت من مسجل السيارة والدركسون

وبهذه الحركة تقدر تشغل اي ملف عندك بالجوال على سماعات السيارة لكن اذا تبغى الصوت يكون ممتاز

لابد تشتري كاسيت من الغالي حتى تطلع جودة الصوت ممتازة اما لاجراء المكالمات مثل حكايتي فالرخيص يؤدي الغرض

ان شاء الله يا اخوان الحركة اعجبتكم ، وطبعا هي تصلح لاي سيارة فيها كاسيت ولكنها اهداء خاص مني لحبايبي اعضاء منتدى الافالون

وسامحوني اذا في قصور في الشرح وتقبلو سلامي واحترامي

اخوكم ومحبكم / ابو فيصل

[((ابومحمد))]

حركة حللوة

مشكور وماتقصر وماشاء الله عليك دائما مبدع والله يخليك لنا

[تركي الطيار]

أبو فيصل ماشالله عليك أحس المفروض نسميك ابو فيصل تاكاهارا,,,

الظاهر خوالك يابانيين,,,

يعطيك العافيه وراح أجربها,,,


تحياتي,,,,

[ابوفيصل]

المشاركة الأصلية كتبت بواسطة ((ابومحمد))

حركة حللوة

مشكور وماتقصر وماشاء الله عليك دائما مبدع والله يخليك لنا

العفو اخوي العزيز ابومحمد وهذا من ذوقك

وشرفني مرورك يالغالي

[ابوفيصل]

المشاركة الأصلية كتبت بواسطة تركي الطيار

أبو فيصل ماشالله عليك أحس المفروض نسميك ابو فيصل تاكاهارا,,,

الظاهر خوالك يابانيين,,,

يعطيك العافيه وراح أجربها,,,


تحياتي,,,,

هههههههههههههه

تسلملي اخوي تركي الله يعافيك ويخليك

بس والله للاسف الوالد ما سواها والا كان اقلها اخذنا الجنسية

وانا بانتظار تجربتك

[بنت الخران]

الحاجه ام الاختراع


مخترع وعبقري منتديات تويوتا العربيه

الطريقه بسيطه وانت سهلت علينا

الله يسهل عليك ان شاء الله

بنجربها ان شاء الله

مشكوور وما تقصر

[& ابو فارس &]

ما شاء الله عليك يا بوفيصل

الفكرة رائعة وعملية واقتصادية في نفس الوقت

بس يا ويلك من عبد اللطيف جميل

الصراحة ضربت سوقهم


اخوي ابو فيصل


احيي فيك حس الابداع والابتكار

ولاهي غريبة على اعضاء هذا المنتدى الرائع

[ابو كيموو]

الله يعطيك الف عافية ابو فيصل وانت انسان مبدع

تحياتي

[سفاري الكويت]

ابو فيصل ما تقصر ....
بس احس ان معداتك ناقصة!!!!!!!!!!معلش

وين المايكروفون؟
انا اللي عندي يوجد ادابتر حق المايك اللي يتعلق في الدشداشة
يمكن انا عندي نوكيا ميوزك...تركيبته غير!

انا افضل تحط الصور بعد قص وتلحيم السلك عشان نكون بالصورة

[أبـو خـالـد]

فكره ممتازة .. وتستاهل التجربة ...
الف شكر على مشاركتها معنا ..

[متعب الليل]

السلام عليكم

مشكووور اخوي (( تاكاهارا)) فكرة راائعه
وشرح أروع

------
انا مع أخوي ( سفاري الكويت) بالنسبة للمايك
وبرضه في كاسيت يجي جاهز عند محل الجوالات مايحتاج له قص وسعره معقول 30 ريال تقريبا
يعني (( طرف شريط والطرف الثاني يتركب في الجوال ويوجد فيه مايك بمشبك ))
-----------------


تقبل احترامي ابوفيصل

اخوك متعب

[عاشق منصور]

وين المايكروفون؟

انا افضل تحط الصور بعد قص وتلحيم السلك عشان نكون بالصورة

انا بعد اقول نفس الشي ..

والله يعطيك العافيه يا ابو فيصل على هذا الجهد..

وتقبل شكري ...

[الفرهود]

ما شاء الله

[ابوفيصل]

المشاركة الأصلية كتبت بواسطة بنت الخران

الحاجه ام الاختراع


مخترع وعبقري منتديات تويوتا العربيه

الطريقه بسيطه وانت سهلت علينا

الله يسهل عليك ان شاء الله

بنجربها ان شاء الله

مشكوور وما تقصر

الف شكر لك عزيزتي بنت الخران على الكلام الحلو

ومرورك دائما يسعدني

وبانتظار تجربتك يا سفيرة الامارات

[ابوفيصل]

المشاركة الأصلية كتبت بواسطة & ابو فارس &

ما شاء الله عليك يا بوفيصل

الفكرة رائعة وعملية واقتصادية في نفس الوقت

بس يا ويلك من عبد اللطيف جميل

الصراحة ضربت سوقهم


اخوي ابو فيصل


احيي فيك حس الابداع والابتكار

ولاهي غريبة على اعضاء هذا المنتدى الرائع

الف شكر لك عزيزي الغالي ابوفارس والله ما ارتاح الا لما اشوف ردك

وعبد اللطيف جميل ما يقدر عليه الا رب العالمين الرجال اكبر مساهم في الشركة والله ما دري عني

تحياتي لك ولتشجيعك الدائم