[حنون]

بسم الله الرحمن الرحيم

هل الوكالة تعطي سيارة بديلة عند إدخال السيارة للصيانة ...

لأني مرة قد صارت سيارتي ينزل ال rpm وتطفى والشكمان يطلع دخان أسود !! المهم دخلتها الوكالة وقالوا لي يبغالها برمجة فقط وصلحوها وأخذت يوم وخلوني أستأجر على حسابي ورفضوا يعطوني سيارة ؟

[أبـو خـالـد]

ما اظن انهم يعطون سيارة بديلة ...
ولا اذكر احد قد اخذ منهم سيارة بديلة ..!!!

[غريب المكان]

قبل شهر تقريبا جانا مندوب للعمل (التامين الشامل ) وكان احد الشباب يستفسر عن توفير سياره في حالة الحادث او الصيانه

وكان رد الزول ان الخدمه موجوده عندهم بس فيها رسوم زيادة حوالي 250( +قيمة التامين الشامل) = في السنة

[متعب الليل]

السلام عليكم

أنا مره حطيت سيارتي (( مشكلة في تكييف المراتب )) وقالوا بتاخذ يومين

وطلبت منهم سياره بديلة

طبعا رفض الموظف وقال نعطيك في حالة السيارة تجلس في الصيانة اكثر من 3 أيام

(( هذا الكلام في الرياض مع الفرع اللي في البديعة الواقع في شارع عائشة ))

[الله يعين]

((( حنوون )))

اسعد الله اوقاتك بكل خير ،،

عزيزي لمن تروح لآي مركز صيانه بتويوتا تلقي كشك صغيررررررر وفيه واحد وقدامه اوراق وكرسين

الرجال هذا حق تآجير سيارات .... يعني وقف سيارتك بالصيانه وتعال استآجر من عندي ...

والي يقول لك نعطيك سياره بس اذا السياره راح تجلس اكثر من 3 ايام .. قول له اسمح لي انت كذاااب

والله لايخليك لاتحتاج لاصيانتهم ولاتشوف خلقهم الا بكل خير ...

تحياتي لك

[ابوفيصل]

انا راح اجيب من خلا تجربة شخصية وكتبت عنها هنا في المنتدى في مواضيع سابقة

المرة الولى كانت والسيارة ما شية 15 الف خرب في السيارة منظم البنزين واحتاجت قرابة الثلاثة اسابيع

لتوفير القطعة واعطوني كورولا واستمرت عندي حتى الا نتهاء تماما من اصلاح المشكلة .

المرة الثانية كانت والسيارة ماشية 77 الف تقريبا خرب الكمبريسر وقررو يغيروه على الضمان

لاني مشترك في خدمة الضمان الممتد وكانت مدة الاصلاح المقدرة ثلاثة ايام فطالبتهم بسيارة بديلة

فوافقو وخيروني بين كامري 2005 او كورولا 2007 واخترت الكورولا لانها كانت انظف واجدد

واللي احب ااكد عليه ان اصلاح السيارة اذا اتجاوز 3 ايام فمن حق العميل ان يوفروله سيارة بديلة

لكن هذا الحق مع الاسف في معظم الاحيان يحتاج مطالبة قوية من قبل العميل

تحياتي للجميع .

[وااوأفالون]

لكن هذا الحق مع الاسف في معظم الاحيان يحتاج مطالبة قوية من قبل العميل



هذا هـــــــــــــــــــــــــو لكلام للصحيح

[مجنون الأفالون]

انا حصلت معي مشكلة تبديل لون الصدام مع بدي السيارة

وعطوني سيارة بديلة لكزس

لأني نشبت بحلوقهم شوي وأسوي لهم فلم أكشن أو هندي


وجاني المصري وقالي حنديك يافندم دايهتسو .. اما إيه دايهتسو حتديك عزم أوي قدا وراحة كويسة

قلت له لا يكثر يا جوهر بس ... وعطني مفتاح اللكزس والا والله لا أسوي لكم إزعاج هههههههههههههههههه

والله احسهم كرهوني أول ما ادخل يحسبون لي ألف حساب

تقبل مروري

[ياسررر]

السلام عليكم ورحمة الله وبركاته . . .
البير وغطاه أنك تدق على الرقم المجاني وتقوله أن الفرع الي أراجع معه مايعطين سياره بديله وإنهم يتأخرون يعني تقعد السياره عندهم يومين . . .
أنا قبل ما أدق على هذا الرقم دخلت سيارتي قعدة 3 أيام وقلت أبي بديل قال مالك إي أحقيه أبداً . .
يوم دقيت على جده تغيرت الأمور . . .
نفس المهندس قال مالك سياره قلت لا يحبيبي ما تمشي علي أنا داق على جده وقالوا لك بديل قال خلاص نعطيك (شوفوا كيف بدل كلامه في نفس اللحظة) وعطوني بديله . . .
المره الثانيه دق علي الفرع بكبره وقال تعال جب سيارتك نشوفها قلت فيه بديل قال : أكييييييد. . .
هذا كله في فرع الرياض البديعه الجديد...
وشكرً

[ابوصالح]

مشاكلكم واجد حقين الافالون :d
ماعليه اخوي مزوح يجي ويروح

جربت عبداللطيف جميل كانت عندي مشكله بالكامري وكان يعطيني سياره بديله بس مع المطالب طبعا هذا اذا كانت مشكله من نفس السياره اما صيانه دوريه فمايعطونك

لكن لو مشكله بالسياره يعطونك غصب عليهم وهذا ساري بجميع الوكالات
والمفروض يعطونك سياره تقارب سيارتك

انا عطوني نفسها كامري ومره ثانيه تعذرو لي وعطوني كوكو

[حنون]

أشكر الجميع على تفاعلهم

ألا ترون أن الأسلوب المستخدم غير جيد يعني ما يعطونك إلا لما تنشب بحلوقهم ؟ والمشكلة يقولون لك ما فيه أمل سيارة بديلة آخر مرة دخلت السيارة قالي الموظف السيارة البديلة إذا سيارتك فيها عطل فني ونصلحها عالضمان وتكون بتجلس أسبوع وأكثر .. المشكلة كل واحد فيهم له كلام ..

[متعب الليل]

السلام عليكم

اذا كنت تقصد انها للصيانة الدورية مايعطونك سيارة بديلة الا اذا كانت مشكله والضمان يتحملها وتجلس اكثر من 3 أيام ( مثل ماصار معي في تكييف المراتب )

وبعدين أخوي حنون بالذات وكالة تويوتا وصيانتهم مايمشون الا كذا
لازم العين الحمرا

واسألني عنهم وطبختهم زين

(( جرب ودها لفرع عائشة انا متأكد ان الموظف قال لي بنفسه اذا 3 أيام نعطيك سيارة ))