[استندر مزيون]

السلام عليكم ورحمة الله وبركاته
شحالكم يالربع عساكم بخير
الصراحه حبيت اتناقش وياكم فموضوع الاستيشن اليديد اعتقد من الي اشوفه انه بينزل جير تماتيك فقط

والاسباب الي خلتني افكر فامكانية انه ينزل جير تماتيك بس انه مبيعات الجير العادي قليله جدا مقارنه بالتماتيك .. وان المكينه كبيره ويمكن ان الجير التماتيك يكون كافي لقوتها والسبب الاخير الي شككني اكثر فالموضوع اني اعرف راعي معرض فبوظبي
ونحن مشترين من عنده توندرا اليديده لانها مب متوفره فالوكاله بس تحصلها وارد
فيوم كنا عنده نشوف المواصفات ونتفق عالسعر قالنا ان مكينتة 5.7 بس جير تماتيك فقط.... قلناله كيف جير تماتيك ماشي عادي قالي ما صنعوا جير عادي بس تماتيك ولو كان فيه كاني جبتها من زمان

انا يوم فكرت فيها قلت الحين التوندرا والاستيشن اليديد مكينتهم وحده 5.7 ... والتوندرا الي هي بيكب وحقة اشغال وما جابو فيها جير عادي هل بيجيبونه فالاستيشن الي هو حق العائله؟؟؟؟؟ الحين يا اخواني يوم الشركة تنزل سيارة او مكينة ما تنزلها ل 100 الف حبه فقط... لانهم يخسرون عليها ابحاث وتصنيع ومهندسين وينزلوها لخطوط انتاج وتنباع فالعالم كله ... انا ماعتقد انهم بينزلون جير عادي عالاستيشن بس ... لو كانو بينزلون جير عادي كانو نزلوه عالتوندرا بعد لانهم نفس المكينه

الرجاء مشاركتكم فهالموضوع وعطونا رايكم

[ولد الاكرام ...]

السلام عليكم ورحمة الله وبركاتة ...

انا اخوي اايدك في هاذا الموضوع .. وفي نفي الوقت اقولك مستحيل ما ينزلون ستيشن كروزر جير عادي

انا معاك في ان الفئة اللي فيها 5700 سي سي تكون جير اتماتيك لكن الفئات الثانيه مثل الجي اكس ار والجي اكس والاستاندر جي لا زم ينزل منهم جير عادي لان هاذي السياره سيارة بر ومستحيل ما يجيبون منه جير عادي ...

[شاري لاند]

ياخي إذا المكينه 5.7 و 381 وعندك قير تبترونك وش تبي بالقير العادي؟؟؟؟؟؟؟؟ اول الناس تبغى القير العادي لانك تتحكم في عزم السيارة لان المكينه كانت ضعيفه فالناس تلجأ للقير وتحكره في 2 لكن الحين صراحة اللي يغرز فيه ما عنده سالفه
شوف اليوكن 355 حصان ما شاء الله وقير تماتيك واربع نمر بعد مو زي الكروزر 5 نمر والتطعيص فيه ولا اروع لان المكينه تعطيييييييييك
شوف الأرمادا 365 حصان وقير تماتيك 5 تعشيقات وفي التطعيص احسن من اليوكن و زي الكروزر واحسن بعد على ان حجمه اكبر !!!!!!
الآن ما بالك بسياره هي اصلا سيارة طعوص وحاطين عليها مكينه اقوى من مكينة اليوكن و الارمادا كيف راح تكووووووووووووووووووون اكيد بتصير بانشي في الطعوص هههههههههههههههههههههههههههههههههههههههههههههههههه هههههههههههههههه

[استندر مزيون]

مشكورين اخواني عالرد
وبالنسبه لرد اخوي ولد الاكرام ...كلامك معقول بس صراحه حرام الفي اكس ار يكون جير تماتيك لانه البدو عندنا يحبون الفي اكس ار جير عادي فالقنص والتطعيس
واخوي شاري اللاند هذا راعي اليوكون والارمادا خله يغرز وشوف من بيطلعه من الرمله ... يوم يكون الجير عادي تعطيه هااف كلتش وتنقز السياره وتطلع بكل سهوله بس الجير تماتيك يبرك تقول ناقه
يمكن عندكم فالسعوديه ما تهتمون لو كان جير عادي او تماتيك بس فالامارات و قطر اهم شي الجير العادي حق الدعاس والتطعيس والمتعه بعد..ماشي احلى من سواقة الجير العادي
وبنشوف انشاء الله فشهر 11 اذا كان بينزل جير عادي ولا لا .. وانا مقهور عالفتره الي انتظرت فيه الاستيشن من 2006 ...شكلي باخذلي كلوزر ولا فتك

[بوشهاب]

في وقتنا هذا وزحمة السير في كل شارع
ماينفع الأوتوماتيك

[ولدالدوحه]

انا اعتقد ان vxr مارح ينزل جير عادي في الموديل الجديد 2008 . لأن في الموديل القديم 2007اكثر المبيعات بالنسبة للجير العادي كانت على ال g وال gxr وبنسبة قليله جداً على ال vxr .

[عسكـــــريم]

لا مستحيل ماينزل قير عادي

ياخي حلات التطعيس بالقير العادي

وهنا طعوسنا الاوتوماتيك يموت خاصة في الرباض