[بن مطر]

السلام عليكم ورحمة الله


بما ان هاي اول مشاركة لي حبيت اخذ رايكم لاني اعتقد ان عندكم الخبره الكافية

انه الله يسلمكم عندي ميزانيه تقريبا 130000 الف ريال

ومحتار بين انتي اخذ نيسان باترول سفاري الي سعره 135000 مو سوبر سفاري يعني سفاري عادي

وكالة موديل 2005

ولا بين كروزر مستعمل موديل 2003 يعني الكروزر المستعمل مابي اقط عليه اكثر من 110000 ريال

لاني بحط فوقها 20000 واخذ باترول وكالة على الزيرو


انتوا اشرايكم؟؟؟؟
وانه اتكلم عن السيارات في البحرين

فيدوني الله يخليكم

[ملك الصحراء]

اخوى لا تحتار ولاشي انا انصحك انك تاخذ باترول يكفى انه نيسان ........ والباترول 2005 فية فخامة غيرطبعية ..




اما الاند انا انصحك انك ماتخذه علشانة مافية عزم ....اساْل مجرب والباترول معروف فى قوتة ويكفى انة ملك .....

[المسواك]

عليك بالفتك 2005 فيه فخامة مو طبيعية أقوى وأشرس وأنشط من هذا الاند

[أبو عائض]

بالنسبة لموضوعك هذا ما أدري وش أقولك وحيرتنا يوم تقول السيارات في البحرين أنا مدري تقصد إنك عايش في البحرين وإلا في منطقة ثانية .

لكن بقولك شي ، إذا كنت عايش في البحرين أو منطقة زيها يعني مناطق مستوية زي الشرقية والرياض وغيرها فأنا أنصحك بالباترول لأنه في المناطق اللي زي هذي سيارة لا يعلى عليها آخر كلام ، وهذا حسب الفلوس اللي عندك على قولتك ، أما لو عندك فلوس واجد يعني حول 160000 أو 180000 وأنت عايش في مناطق مرتفعة زي جنوب المملكة فأنا أقولك خذ لاندكروزر لأنه له سوق في المناطق هذي ويعيش فيها أكثر .

والسيارتين ما عليها كلام حلوه ومتساوي في جميع المزايا تقريباُ لكن الشركات عندنا يلعبون في الأسعار لعب على كيف كيفك وطايحين لك صلخ في هذا الزبزن الصادق المسكين ، وعلى أيش ، على حديد وبلاستيك وقماش مغطى بديكورات .

لكن ما نقول إلا الله يهديهم وينزلون هذي الأسعار الخيالية ... قولوا آمين .

تحياتي للجميع ،،،

[عاشق لاند كروزر]

والله اللي يتكلم ويقول خذلك نيسان علشان على قد حالك قد فلوسك يعني

أما إذا عندك زياده لا خذلك لاند ولا يغرك كلام بعض الناس

وبعدين بسأل ليش ما تبغا تدفع باللاند الـ 2003 أكثر من 110000 لا ادفع ولو 140000 لأن قيمته فيه وما يطيح سعره

أما الباترول إذا شريت مثل ما قلت 2005 عالزيروووووووو من أول ما تمشي أول كيلو يطيح أول عشرين ألف من سعره والكيلو بعد كيلويبدا يطيح ألف ريال ألف ريال

لهذا نصيحتي وهذه وجهة نظري فقط ولا ألزمك بها

إذا بتشتري خذ لك لاند كروزر إلا إذا كان الباترول أعجبك ومستعد أنك تخسر وراه أنت حر

وشكراً

[كروزر قطر]

خوي تعل شوف قطر كلها كروزرات و لو تبي اتبيع في دقايق الشراين على باب بيتك بس غير الكروزر مافي لاان الفتك يقرقع و في الحصى مب شي

[ابو عبيدان]

انا امشي مع كلامك ياكروزر قطري