[إنتيجرا]

يا إخوان ترى من أسبوع مسيطرة علي فكرة شراء سيارة جيب
في البداية كنت مفكر آخذ سيدان كامري أو أكورد
لكن بعد ما شفت أسعار الفورتشنر القريبة لسعر الكامري و الأكورد صرت أفكر فيه
أبغى تنصحوني بكل أمانة مثل ما عودتونا
وش الأفضل ؟ أشتري فورتشنر 4 سلندر أوتوماتيك ولا أشتري سيدان كامري أو أكورد؟
علماً بأني موظف وأمشي خطوط لكن قليل جداً معظم وجودي داخل المدينة
اللي قالقني من الفورتشنر الـ 4 سليندر أوتو اني خايف يكون مو براحة السيارة السيدان
وأخاف يكون له صوت مزعج ، وما أدري لكن أظن بعد إنو سرعة وتسارع الفورتشنر ممكن يكون أقل
أفيدونا جازاكم الله كل خير
والعذر منكم للإطالة

[أبوحمد]

الفورتشنر تقدر تقول أنها سياره لكل شي يعني وسط الديره ومشاوير وسفر وطلعات بر ..

بس طبعا تتميز السيدان بالراحه والشبابية ..

إذا شكلها دخل مزاجك توكل على الله وخذها ,, بس طبعا اذا أنت متعود على السيارات الصغيره راح يختلف الوضع مع ذي حيث كونها جيب يعني مرتفعه , وماهي مرنه مره مثل السيارات الرياضيه ( أنا قلت مره يعني سواقه طبيعيه ممتازه ) ..

[أبو أحمد نت]

شوف السيارة السيدان في راحة والسيارة الفور تشنر تختلف عن السيدان وهي من نوع الجيوب
والنصحية أن شاء الله هي إذا كنت صاحب عائلة كبيرة اشتري الفور تشنر وخاصة 6 سلندر
وخاصة الان الاسعار تقترب من بعضها الكامري تبدأ 68 الف ريال والفور تشنر تبدأ من 70 الف ريال
والرأي الاتم لكم والاستخارة في بركة
وفق الله الجميع لما فيه الخير

[إنتيجرا]

ما قصرتو إخواني ابو حمد و ابو احمد نت
ترا انا ما عندي عيله كبيرة ولا محتاج المساحة الكبيرة اللي في الجيب
لكن افكر وش الأفضل والأريح
أحب السيارة تكون مريحة وبحياتي ما سقت جيب
أخاف يكون موبراحة السيدان وأندم لأني ما أروح بر ولا غيره
ما أحد من الزملاء جاوبني على موضوع التسارع والسرعة !

[أبـــو عـــزام]

سبق أن رأيت مقطع تسارع للفورتشنر.. بصراحه الموتر نشيط بدون تعديل ولا ترهيم للمكينه وحسب مافهمت أنه يفصل البنزين عند 190 كلم.

بس تبي الصراحه ما دام ماعندك عائلة كبيرة ولا أنت رايح للبر أبداً فيجب عليك إعادة النظر
وحط في بالك أن الجيب له هيبه في الشارع يعني ما يقدر يجي أحد يحدك أو يأذيك بسيارته.

بالتوفيق