[ولد شقراء]

السلام عليكم و رحمة الله و بركاته
أول شـــي كــل و أنتم بألف خير و عيد مبارك علينا أن شاءالله ،،،،
أخواني أنا متابع للافالون من شهور و كنت أبحث عن سياره تكون مناسبه للشراء و أستقريت الحمد لله على الأفالون و كنت شايل هم الحجز و التأخير قلت بروح بمر الوكاله و بستفسر و قبل أربع أيام مريت الوكاله بالصباح كان ما فيه زحمه مره جلست عند مندوب المبيعات سعودي طبعا قلت انا جاى( [أحجز) أفالون و ركزوا على كلمة أحجز قالى وش تبغى اللون قلت أسود قالى بتدفع كااااش قلت أن شاءالله قال موجود عطنى أوراقك قلت السياره الآن موجوده قال ايه فيه أسود و فيه بحرى وش تبغى أي واحد قلت قلت أكيد الأسود قلت طيب و هاللى نسمعه من حجز و ضغط على السياره قالى عاد حضك ،،،،،،
الحمد لله دفعت له عربون و من بعدها بيومين كملت له المبلغ و كنت قلق من أن السالفه ممكن تطول أو يأخرونى بس الحمد لله اليوم أستلمتها أفالون أسود داخلى بيج ليمتد ،،،،
وقتها ما ناقشت الرجال بس اليوم بعد ما تأكدت أن السياره موجوده دخلت عليه و سألته عن الحجوزات و أنى أسمع أن ناس تنتظر شهور قالى شف هنا كل واحد و شطارته قال السيارات قبل لا توصل هنا تلقى كل موظف حجز سياره برقم سرى أنا حسيت و هو يتكلم أنه راعى الوكاله وشلون يحجز سياره برقم سري و يصرفها على اللى يبغى ما صارت وكاله صارت نهب و اللى فهمته من الموظف أن كل شخص يحجز مجموعه من السيارات بطريقه ماا و محد يقدر يبيعها لانها تكون على الجهاز أصلا مبيوعه شكلا بس و يقول وقتها كل واحد يصرفها على اللى يبغى أما لمعارف أو بمصالح أو بزياده مبالغ ،،،،
يعني شركة فيها تسيب بكل ما تعنيه الكلمه ولا فيها نظام ولا أي شـــي ،،،
فيه سؤال آخر سألته للرجال قلت له هل لو أحجز الآن هنا يكون حجزى شامل كل الفروع يعني لو رحت فرع العليا مثلا اقدر استفسر عنه قال لا قال اصلا لو تحجز عندي و تقوم و تحجز عند الموظف اللى جنبي عادى ،،،،
عموما يا أخوان أنا نقلت لكم اللى صار بالحرف الواحد سواء كان اللى قاله لى الأخ حقيقه أو مجرد فرد عضلات مع أنه كان يحلف لى بين كل جمله و جمله و الله أعلم ،،،،

فمان الله .......

[الأمازون]

خيال ..... الكلام الي تقولة
سامحني تري ما أقصد أكذبك ولكن حتي يطمئن قليبي.

- كم موديل السيارة. (2005 - 2006)
- من أي فرع.
- بكم حسبلك سعرها بالضبط. ( يعني كم دفعت )
- لو تكرمت : اسم الموظف. الله لا يهينك.

(دنيا حظوظ)
وشكرا

[ولد شقراء]

السلام عليكم و رحمة الله و بركاته

أخوي الامازون شكرا على الرد و يا هلا فيك ،،،،
من حقك أخوى انك ما تستوعب الكلام ،، بس هنا جالسين نتكلم عن عبداللطيف جميل يعني توقع أي شي أخوي

و حتى يطمئن قلبك والله أن هذا اللى صار معى بالحرف الواحد و اللى شريتها 2006 طبعا ما فيها بلوتوث ،،،
الفرع من تويوتا اللى بطريق خريص من جهة الشمال ... الموظف اعفنى من أنى أقولك عنه لأنى ما أبغى له أي مشاكل أو أحراجات و شكرا لك ،

[الأمازون]

تسلم يالغالي

وما قصرت
والله يهنيك بالسيارة

و مبروك عليك

[هـ د ب]

يعطيك خيرها ويكفيك شرها يالغالي


بس يا ليت لوو تقول لنا كم سعرها .

ولك التحية

[الافندي]

ياخوان الموضوع ببساطه .......

اللون الاسود عادة يكون متوفر لان الدفع تجي مشكله يعني الوان

والضغط على الون اللؤلؤي وباقي الالوان تقريبا تتوفر خلال شهر اذا ماهي موجوده بالمستودع

وكلام الرجال صحيح 100%

وبالنسبه للرقم السري فكل موظف له رقم سري ولكن لو تعطي اي موظف من الموظفين رقم حجزك يقدر

يطلع على حجزك ويفيدك عن اي معلومات تبغاه ,,,,

فالمشكله الاساسية تكمن في اللون اللؤلؤي ،،،،،،،


والسلام ،،،،،،،،،،،،،الافنـــــــــــــدي

[أبومصطفى]

الأخ العزيز الافندي :
((والضغط على الون اللؤلؤي وباقي الالوان تقريبا تتوفر خلال شهر اذا ماهي موجوده بالمستودع))

أرجو أن يكون كلامك هذا صحيحا لأني حجزت لون أخر غير اللؤلؤي ولحد الأن مضى أكثر من شهرين ولم أستلم السيارة
ودمتم سالمين