[ااالللساااحر]

بسم الله الرحمن الرحيم

أبغى أسأل عن سعر هايلوكس 4*4 دبل الإتوماتيك

كم سعره

وهل الإتوماتيك يجي Gl و Glx

ولا بس Glx

[أبوحمد]

أخوي الاوتوماتيك بمواصفات شركة عبداللطيف جميل يجي نوعين
Glx و S-glx

ويفرق كل نوع عن الاخر فقط بوجود الايرباقات ونظام الفرامل المانع للأنغلاق Abs

وطراز الاوتو ممتاز وهذا عن تجربة بدائية بالنسبة لي شخصيا ,,

والعيب الوحيد هو عدم وجود رموز القير الاوتو في لوحة العدادات ( الطبلون ) وإنما فقط بجانب القير !!

[ابوخليف]

كم سعرها طيب باريال السعودي

[ااالللساااحر]

مشكور أخوي والله يعطيك ألف عافية

[أبوحمد]

السعر في حدود 83000 ريال لطراز السوبر جي ال اكس وهذا السعر له حول الشهر وشوي والى الان ماحدثت الاسعار اللي بذاكرتي لأني ماني ناوي عليه الحين !!

يمكن يكون نقص ويمكن يكون غلى ؟؟؟؟

[العجيب...]

ما تفرق شي عن بدون دبل


لان بدون دبل بـ 79

[أبوحمد]

اللي بدون دبل

Glx سعرها 68000 ريال
S-glx سعرها 71000 ريال

الدبل يفرق حول 10000 ريال !!!

[كحيلان الاصلي]

عند جهينة الخبر اليقين .....

هايلوكس ... 2008 ... 4x4 ... اوتوماتك ... بدون اير باق ... الظاهر مافيها Abs ... طبعاً دبل كبينة ... الاسيات الامامية مفصولة ... وبينهم درج (( هذا كله بـ ... 78000 )) ريال فقط

[أبوحمد]

السعر عند شركة عبداللطيف جميل أغلى شوي

بس تطلع بهايلكس إبداع ..

[ااالللساااحر]

مشكورين على المرور الله يعطيك ألف العافية

[عاشق الدبل]

هاهاها والله ما توقعت أن فيه أحد في العالم ياخذ هلي دبل 4 سلندر 2700 vtt-i أتوماتيك سلامات حتى طلعة الزدية أو القدية ما اتوقع ترقاها <*****< تراني أمزح هاهاهاها

أنت يا أخوي تحب الهلي كشكل وتبي تشتريها علشان كذا؟؟؟ ولا أنت راعي طعوس وبر؟؟؟ ما أتوقع حتى ترقى طعيس صغير مع إحترامي الشديد لا وسعرها 84 ألف الله لا يبلانا أشتري لي ربع نيسان 6 سلندر 4500 أبرك لي

[أبوحمد]

أخوي عاشق الدبل

كل شي لما صنع له

الاجانب ما يستخدمون أكثر شي الا الاوتوماتيك ويحبون روح المغامره وشق الوديان وقطع أماكن ما تتخيلها أبدا ..

وشغلت الشباب في السعودية يجيك صافط 120 وفوق الرمله علشان يطلع الطعس !!
ماهب شرط تطلع الطعس بالطريقة هذي ..

أما عن الهايلكس الاوتو نقص الكفرات أولا
وحطه على رقم 3 وعشق الدبل الثقيل وبتطلع وأنت بسرعة معقوله من 30 الى 40 وماراح يوقف عليك ولا راح يضره شي ..

أما عن ربع النيسان فهذا مضمون حق تطعيس فقط ,, لكن يفرق عن الهايلكس اللي هو لأغلب الاشياء كالديره والعوايل والتحميل ..
أما الربع فهو سياره شبابية وصعبه تصير للعايلات !!

ومافي حد كل يوم مطعس ,, يعني حلاتها مره بالاسبوع أو الاسبوعين ..

[عاشق الدبل]

يا أخ أبو أحمد أدامك الله على طاعته

الأجانب الذين تتكلم عنهم مكاينهم 6 سلندر والأوتو والله ثم والله أنه نكبه إسألني والله نكبه يا أخي أنا رحت للدهناء و خرارة وغيرها من النفود والله جيوب أوتو ما تبيض الوجه زي الجي إكس آر أمس يوم الخميس رايح للدهناء تحدي بين أخوياي واحد معه إكسبلورر 2007 أوتوماتيك والثاني Gx-r موديل 2003 أوتوماتيك والثالث Gx-r موديل 98 عادي .وكان راعي الجي إكس آر 2003 يستهزئ بالإكسبلورر وأنه ضعيف ويمدح موتره فتحدو بعض من بداية دخول النفود وغرز مرتين الـ 2003 الأوتوماتيك ولكن طلع مرة غرز في طلعة وبالرويس طلع ومرة طلع من ردمية على النفود فغرز وبالبل وبالرويس على الردمية وطلع فعندما توقفنا في مكان الجلسة كان أمام الجلسة طعيس عريض وطول وصعيب وليس بذلك الصعوبة ولكن كان آخر زي السيف اللي طالع بزيادة ومن الإستحالة تعدديه فكان التحدي أن يتم رقية الطعس ثم اللف يسار ومسابسة الطعس مسايسة .

فكانت بداية التحدي بين الإكسبلورر و Gx-r الأوتوماتيكوطبعاً Gx-r كسيارة ثقيلة وأتوماتيك فلذلك يرقى الطعس ولكن بصعوبة وخوينا إذا رقى بـ D في نصف الطعس يرجعه لـ D1 علشان يعطيه عزم وكان يهايط بموتره وكان الكل مستحقر الإكسبلورر فعندما رقى الإكسبلورر وطبعاً خفيف الإكسبلور حتى ما هو حديد ألمنيوم فكل هذا ساعد الإكسبلورر رغم أنه أوتوماتيك ورقى بـ D حتى ماهو كل الدعسة يمكن ثلاثة أربع الدعسة طبعاً بعد العديد من الطلعات بين السيارتين إعترف راعي Gx-r الأوتوماتيك أن سيارته في التطعيس بايخة وعزمها ردي وقال : والله ما يرقى Gx-r بالـ D وإعترف الرجل بأنه سيارته ما تنفع وعزمها ثقيل حتى في طريق الذهاب للنفود ما كان يقدر راعي Gx-r الأوتوماتيك أن يسقط ويتعدى راعي الإكسلورر نهائياً المهم جاء راعي Gx-r العادي وكان موديل 98 يعني قديم المهم وأعطى السيارة لـ راعي Gx-r الأوتوماتيك علشان يخليه يرقى مع نفس اللي راح معاه بسيارته الأولى ووالله رقى Gx-r العادي زي السلام عليكم وراح وتعدى فهذه قصة مع جيوب مع لاند كرورز أوتماتيك تخيل موديل 98 يعني مكروف وقديم وأفضل من الجديد 2003 الأوتوماتيك هنا تبين القوة وهذا مثال صغير من واقع تجربة صارت أمس .

طبعاً ميكانيكاً معروف أن السيارة إذا كان منها أوتوماتيك وعادي عدد أحصنة العادي أكثر والعادي في البر أفضل في التطعيس فكييف بهايلوكس دفرنسين مكينته بالعادي سيئة وضعيفة فكيف بالأوتوماتيك أنا يا أخ أبو أحمد ما أتكلم من فراغ أتكلم من وجهة نظر ميكانيكة وعمليه ونظرية أتمنى أنك فهمت ما اغزو إليه

[@أبوفيصل@]

&
&
&

الله يكتب أجرك عاشق دبل

والله انك صادق مافيه ازين من العادي

أنا ابي اقول سالفتي امس طالعين للنفود

وكان معنا 3 سيارات حوض جمس 2002 أوتو ماتيك

ولاند كروزر جي اكس ار عايدي 2002

ولاندكروزر جي اكس ار اتوماتيك 2007

أما البانسبة للحوض الي يسوقه بطل ومشاى بالراحة لكن مهب ذاك الاداء

واما بالنسبة لل2002 جي اكس ار سواقة مهب ذاك الي يعني نص غشيم يمشي في النفود ولا ازين منه

واما بالنسبة لل جي اكس ار 2007 الي يسوقه سواقته حلوه والله على ان سواقته حلوه الا ان اداء 2002 جي اكس

ار أفضل منه اداء ومع ان 2002 جي اكس ار مفجور الا انه بعد افضل

بس حبيت اوضح هذي النقطه وانا مؤيد رأي عاشق دبل

اتمنا اني افدتكم

أخوك / أبوفيصل ...

[أبوحمد]

يا مـــــــــــال العافية

يا عاشق الدبل ويا أبو فيصل

كلامكم كله صحيح ومنطقي

بس اللي ماهو حق طعوس ؟؟؟؟
يعني الاوتو ما ينفع أبد ؟؟ مو معقول يا أخوان الله يسلمكم ..

[عاشق الدبل]

كلامك يا أبو أحمد على العين والراس ولا وأنا معك في رأيك الأوتوماتيك ممكن تطاعس به ولكن أفضل شيء والممتاز للمكينة والتطعيس العادي اللي ماهو راعي تطعيس ووده بسيارة مريحة وتعب من العادي وراعي كشتات ويطاعس على خفيف أو حتى راعي تطعيس الأوتوماتيك ممتاز ولكن في التطعيس والقوة ما يجي جنب العادي العادي رووعة هذا إذا ما تكلمنا عن السيارات والمكاين القوية .

أما الهلي الدفرنسين مكينته صغيرة ولا تناسب حجمه وضعيفه وهو بالعادي ولا ينفع للماعس بالعادي عادي كيف الأوتوماتيك أتمنى انك فهمت قصدي لو فيه ميكنه تشاعد يمكن نقبل برأيك يا أبو احمد .