[@أبوفيصل@]

بسم الله الرحمن الرحيم

السلام عليكم...

أنا صراحة محتار بين كم سيارة

بس ابي اسالك عن الهايلكس دفرنسين من نايحة العزم والقوم والوزن لاني راعي تطعيس

ابي واحدن مجرب الهايلكس الدفرنس والدفرنسين يجاوبني ولا يهونون الربع

أخوك / أبوفيصل

[أبوحمد]

الهايلكس الدفرنسين بالنسبة للعزم لك عليه شوي مقارنة بالدفرنس الواحد ,, بحكم أنك مطعس
وإلا لو استخدام طبيعي بيكون تمام وموّفي .

بالنسبة للقوة ,,, مره ما يحتاج وأنا محمله طن وسافرت فيه ومشيت بأماكن وعره وما شاء الله قوي وصلب .. ولا كأنك محمله يعني لا أصوات ولا عجز ..

الوزن أكيد أنه أثقل من الدفرنس بس للصراحه من تجربتي له راسي راسي بمعنى الكلمة وعكس الموديلات اللي قبله حتى على سرعات عالية ,, أشوفه ممتاز ..

وأخيرا الهايلكس السعودي أفضل من الخليجي من ناحية منضره والاكسسوارات اللي عليه ,, وبتوفير قير الاوتو عليه هذي السنه ,, خلاص كملت وإن شاء الله في 2009 أو مع تغيير الشكل في 2010 بيوفرون محرك 6 سلندر أو نفس المحرك 4 سلندر بسعة 3 ليترات بدل 2,7 ,,

[@أبوفيصل@]

الله يعطيك العافية أبوحمد

صراحة موّفي في شرحك

ههههه

صراحة شكل الدفرنسين قوي

بس صراحة خيبت ضني فيه يوم قلت ان عزمه مش ولابد

على العموم ماقصر

الله يرزقك الجنة

[أبوحمد]

يعافيك يا أبو فيصل

وللأمانه الهايلكس قعد معي سنه ماحسيت براحه مثل ماهو - كان قوي بالنسبة لأستخدامي واقتصادي وصلب يعني ما سمعت منه قربعه أو أصوات تكدر تفكيرك وتجيب لك الشكوك !!
وكان لكل شي ديره - عائلي - نقل - بر - تحميل


أنا أشهد أنه موتر ,, بس ما بعته الا بسبب أنه مايجيب الفصله وتوقعت أن الخلل في المحرك ,, بس الظاهر أنه مني لأنه قعد معي سنه ومشيت به 20000 كيلو فقط وماكنت أتعدى 120 كم بسبب طبيعة المنطقة ,, وبعدها قررت أني أصفط الطبلون وخذ لك يا خط وأنا يادوس على البنزين !! وما طلعت بأكثر من 160 كم وتعقدت منه وقلت هذا الموتر تعبان ,, والسالفة كلها أني فاجئته المسيكين ,, لو أنا معوده تمحيط في ذي الخطوط كان أنه يطبق الطبلون سلام سلام !!

الحين أنا مفكر بجيب صغير - فورتشنر 2008 إن شاء الله - والهايلكس يمكن اذا عدلوا العيب اللي فيه من وجهة نظري في القير الاوتو اللي هو عدم وجود رموز القير في الطبلون مثل السيارات الاخرى ؟؟ أبشتريه إن شاء الله ..

[عاشق الدبل]

مع إحترامي الشديد يا أبو أحمد ما توقعت ردك يكون بهذا الشكل لأنه في الحقيقة الهلي دبل اللي عندنا في الخليج والسعودية والهلي الدبل 4 سلندر vtt-i 2700 عزمه بايخ جداً تخيل أن الهلي غمارة دفرنس مكينته مثل الهلي غمارتين دفرنسين هذا بحد ذاته يقهر يا أخي أنا ما أقول لك من فراغ أنا أقوله من واقع تجربة 3 أشخاص أعرفهم معرفة شخصية وطلعت معهم وشفته وسألتهم الصراحة عزمه بايخ تخيل أنه طلعة رملية بسيطة وقف حاول يطلعها ما قدر يوم وقف في نصها ويبي يطلع ما طلع وطلعت ريحت الكلتش تخيل طلعة طولها 2 متر طبعاً وهو مطفي الدبل وثانياً إذا أنت راعي كشتات ولا أنتب راعي تطعيس ينفع أما إذا أنت راعي تطعيس فما ينفع لو تحلم ما ينفع لازم تلعن والدين المكينة وهذا يضرها أنا ما أقول أنه ما يرقى نهائيا أنا أقول ينفع لراعي الكشتات واللي يبي يرقى طعيس بسيط أما واحد راعي تطعيس وحط تحتها عشرين خط ماينفع يعني ممكن ينفع بس يبيله فجر أو تفجير تفجر أمه ولو فجرته مهوب مثل الدفرنس وبعدين لو فجرته يمكن بل بنسبة 70 % تخرب الكارونة ، الدفرنس خفيف حق طعوس بس تحمل إذا غرزت وعلى طاري التغريز أعرف لك واحد معه هلي دفرنسين 2007 دخل خرارة اللي المزاحمية ويمشي مشي عادي وغرز وهو دفرنسين يعني هي بعد تعتمد على السواق بنسبة كبيرة وبعدين خل كل هذا وتعال لسعره سعره فوق 85 ألف والله حرام على إيش 85 ألف ولا ويقولون وصل 89 ألف والله حرام مكينته بايخة مرة أنا أنصحك إذا أنت راعي كشتات خذلك ددسن درفرنسين سعره 70 ألف مع أنه كان بـ 62 ألف بس إرتفعت أسعار السيارات في السعودية وأكررها إذا أنت تبي كشتات ولا أنتب راعي تطعيس وهبال عز الله أن الهلي والدقس يقومون بالواجب في الكشتات ماهنا أزين منهم . ولكن سعر الهلي دفرنسين عالي على إيش مدري . أتمنى أني كفيت ووفيت أخوي .

[@أبوفيصل@]

الله يعطيك العافية ابوحمد

شكل استخدامك له نضيف ماشاء الله

غريبه ماتعدى الــ160 لكن صدقني اذا مسكت به الخط خمس مرات يبي يجيب الطبلون ان شاء الله

على العموم الفورتشنر ربما اني اشريه قريب لكن صراحة

سعره غالي على غير سنع

انا ان خذته خذت السته سلندر

اما ارعه مافيه امل افكر فيه : )

على العموم الله يعطيك العافيه

[@أبوفيصل@]

المشاركة الأصلية كتبت بواسطة عاشق الدبل

مع إحترامي الشديد يا أبو أحمد ما توقعت ردك يكون بهذا الشكل لأنه في الحقيقة الهلي دبل اللي عندنا في الخليج والسعودية والهلي الدبل 4 سلندر vtt-i 2700 عزمه بايخ جداً تخيل أن الهلي غمارة دفرنس مكينته مثل الهلي غمارتين دفرنسين هذا بحد ذاته يقهر يا أخي أنا ما أقول لك من فراغ أنا أقوله من واقع تجربة 3 أشخاص أعرفهم معرفة شخصية وطلعت معهم وشفته وسألتهم الصراحة عزمه بايخ تخيل أنه طلعة رملية بسيطة وقف حاول يطلعها ما قدر يوم وقف في نصها ويبي يطلع ما طلع وطلعت ريحت الكلتش تخيل طلعة طولها 2 متر طبعاً وهو مطفي الدبل وثانياً إذا أنت راعي كشتات ولا أنتب راعي تطعيس ينفع أما إذا أنت راعي تطعيس فما ينفع لو تحلم ما ينفع لازم تلعن والدين المكينة وهذا يضرها أنا ما أقول أنه ما يرقى نهائيا أنا أقول ينفع لراعي الكشتات واللي يبي يرقى طعيس بسيط أما واحد راعي تطعيس وحط تحتها عشرين خط ماينفع يعني ممكن ينفع بس يبيله فجر أو تفجير تفجر أمه ولو فجرته مهوب مثل الدفرنس وبعدين لو فجرته يمكن بل بنسبة 70 % تخرب الكارونة ، الدفرنس خفيف حق طعوس بس تحمل إذا غرزت وعلى طاري التغريز أعرف لك واحد معه هلي دفرنسين 2007 دخل خرارة اللي المزاحمية ويمشي مشي عادي وغرز وهو دفرنسين يعني هي بعد تعتمد على السواق بنسبة كبيرة وبعدين خل كل هذا وتعال لسعره سعره فوق 85 ألف والله حرام على إيش 85 ألف ولا ويقولون وصل 89 ألف والله حرام مكينته بايخة مرة أنا أنصحك إذا أنت راعي كشتات خذلك ددسن درفرنسين سعره 70 ألف مع أنه كان بـ 62 ألف بس إرتفعت أسعار السيارات في السعودية وأكررها إذا أنت تبي كشتات ولا أنتب راعي تطعيس وهبال عز الله أن الهلي والدقس يقومون بالواجب في الكشتات ماهنا أزين منهم . ولكن سعر الهلي دفرنسين عالي على إيش مدري . أتمنى أني كفيت ووفيت أخوي .

والله شرح وافي اخوي الله يعطيك العافية

لكن سؤال هل ام عزيز <*****الددسن ******** قوي بالطعوس

يعني يمدني اراقي فيه طعوس جامده

؟؟؟!!!

[انتو كذا حلوين]

بسم الله الرحمن الرحيم

لو سمحتو يا اخوان ابي اسألكم عن شغله, انا مقيم في منطقه حائل وابي اشتري سياره عن قريب ومحتار بين هايلوكس دفرنس و دفرنسين ,وابي رايكم اي من ناحيه الفخامه والقوة والتحمل, وللعلم انا مو راعي تطعيس بس راعي كشتات, وابي كم السعر.


انتو كذا حلوين.

[عاشق الدبل]

والله يا أخوي أنت في بين أمرين إتضحت لي من خلال كلامك :

1- إما أن عندك الآن حبة تطعيس ما إنطحنت وناوي تطحنها وبعدين تترك التطعيس.
2- أو أنك راعي تطعيس وتكره التغريز .

على العموم أنا أعرف شخصين عندهم أم عزيز دفرنسين معرفة شخصية ورحت معهم كم مرة .
الأول معه أم عزيز مستعمل موديل 2002 له معه تقريباً سنتين شاريه من واحد راعي مقناص ومودي أم عزيز للسوادن تخيل وشراه خويي منه ماشي معه الآن 260 ألف وفاجر أمه تفجير ويطاعس به مطاعس ما هوب صاحي طبعاً وهو مطفي الدبل هبال لاعن والدين السيارة كارفها كرف ولا تنسى ماخذها من واحد كارفها بعد ومفجره تفجير ومع ذلك يمدح موتره مدح طيره في السماء ولكن إذا تركنا العواطف جانباً أم عزيز دفرنس 2400 ومشهورة بالتغريز ويبلها واحد محترف الصراحة فكيف إذا ماصارت دفرنسين عز الله ما مشت ولكن أم عزيز دفرنسين قلبت التوقعات لأنها خفبفة ورخيصة مقارنة بالهلي وحقت كرف رفيفعة ممتازة ولكن ترا مافيها ذيك الراحة مقارنة بالهلي موديل 2006 وفوق ومع ذلك لا تنفع للتطعيس الصراحة خوي هذا أنا متوقع 100% أنها قد خربت الكارونة عليه كم مرة ولكن هو بايعها ومع ذلك رغم تفجيره ما تطاعس زي الدفرنس نهائيا ولكن الدبل يفك أزمة إذا غرزت تأمن في الرمل إذا مشيت عليه ومع ذلك ماينفع لشخص يريد التطعيس فقط ولكنه ممكن يطعس ولكن لا تثقل عليه .

أما الشخص الثاني فهذا ما مرن سيارته زين لذلك السيارة خلقه عزمها طايح وهو ما مرنها طاح عزمها زيادة ولكن أم عزيز كبرت في عيني لأنه دخل بها نفود الخرارة اللي في المزاحمية بكفرات وجنوط الوكالة النحيفة ومنسمه على 20 فقط تخيل ولا غرز وهو مشغل الدبل الخفيف ولكنه إستعمل الدبل الثقيل كم مرة لأنه بعض الأحيان يوقف وتوقف السيارة ولا تممشي إلا بالثقيل ويالله ومع ذلك كبرت في عيني أم عزيز تخيل عزمها طايح ولا مرنها وكفرات سلق وجنوط الوكالة ومنسم 20 ويدخل نفود الخررارة الصعبة ولا يغرز هذه بحد ذاتها تكفي بس ترا خوينا ماهوب راعي تطعيس .

أتمنى أن كفيت ووفيت لكن إذا راعي تطعيس بنسبة 70 % خذ دفرنس وإذا أنت راعي كشتة بنسبة70% خذ أم عزيز دفرنسين . وأتمنى أنك تعلمني هل أصبت في تقديري لشخصيتك فوق أول الرد

[@أبوفيصل@]

المشاركة الأصلية كتبت بواسطة عاشق الدبل

والله يا أخوي أنت في بين أمرين إتضحت لي من خلال كلامك :

1- إما أن عندك الآن حبة تطعيس ما إنطحنت وناوي تطحنها وبعدين تترك التطعيس.
2- أو أنك راعي تطعيس وتكره التغريز .

على العموم أنا أعرف شخصين عندهم أم عزيز دفرنسين معرفة شخصية ورحت معهم كم مرة .
الأول معه أم عزيز مستعمل موديل 2002 له معه تقريباً سنتين شاريه من واحد راعي مقناص ومودي أم عزيز للسوادن تخيل وشراه خويي منه ماشي معه الآن 260 ألف وفاجر أمه تفجير ويطاعس به مطاعس ما هوب صاحي طبعاً وهو مطفي الدبل هبال لاعن والدين السيارة كارفها كرف ولا تنسى ماخذها من واحد كارفها بعد ومفجره تفجير ومع ذلك يمدح موتره مدح طيره في السماء ولكن إذا تركنا العواطف جانباً أم عزيز دفرنس 2400 ومشهورة بالتغريز ويبلها واحد محترف الصراحة فكيف إذا ماصارت دفرنسين عز الله ما مشت ولكن أم عزيز دفرنسين قلبت التوقعات لأنها خفبفة ورخيصة مقارنة بالهلي وحقت كرف رفيفعة ممتازة ولكن ترا مافيها ذيك الراحة مقارنة بالهلي موديل 2006 وفوق ومع ذلك لا تنفع للتطعيس الصراحة خوي هذا أنا متوقع 100% أنها قد خربت الكارونة عليه كم مرة ولكن هو بايعها ومع ذلك رغم تفجيره ما تطاعس زي الدفرنس نهائيا ولكن الدبل يفك أزمة إذا غرزت تأمن في الرمل إذا مشيت عليه ومع ذلك ماينفع لشخص يريد التطعيس فقط ولكنه ممكن يطعس ولكن لا تثقل عليه .

أما الشخص الثاني فهذا ما مرن سيارته زين لذلك السيارة خلقه عزمها طايح وهو ما مرنها طاح عزمها زيادة ولكن أم عزيز كبرت في عيني لأنه دخل بها نفود الخرارة اللي في المزاحمية بكفرات وجنوط الوكالة النحيفة ومنسمه على 20 فقط تخيل ولا غرز وهو مشغل الدبل الخفيف ولكنه إستعمل الدبل الثقيل كم مرة لأنه بعض الأحيان يوقف وتوقف السيارة ولا تممشي إلا بالثقيل ويالله ومع ذلك كبرت في عيني أم عزيز تخيل عزمها طايح ولا مرنها وكفرات سلق وجنوط الوكالة ومنسم 20 ويدخل نفود الخررارة الصعبة ولا يغرز هذه بحد ذاتها تكفي بس ترا خوينا ماهوب راعي تطعيس .

أتمنى أن كفيت ووفيت لكن إذا راعي تطعيس بنسبة 70 % خذ دفرنس وإذا أنت راعي كشتة بنسبة70% خذ أم عزيز دفرنسين . وأتمنى أنك تعلمني هل أصبت في تقديري لشخصيتك فوق أول الرد

اولا الله يجزاك الجنه

ثانيا صراحة انا راعي تطعيس وكشتات 50% كشتات و50% تطعيس

وعلى العموم الكشتات تشمل التطعيس

اذكر مره طلعنا يم الصمان وخذنا احداثيه

دخلنا الطعوس ومرقى حول 30 كيلو طبعا وصلنا لم منطقه سميتها جنة الله في ارضه

الموهم المقصد ان الكشتات تشمل التطعيس

[أبوحمد]

أخوي الغالي عاشق الدبل أشكر ردك وأقتباسك على تعليقي

بس يالغالي أنا بينت النقطه اللي أنت أنتقدتني عليها :

أنا قلت كان قوي بالنسبة لأستخدامي واقتصادي
أخوي الله يديمك أحنا في الجنوب ماعندنا الا جبال وضلعان وصخور والتطعيس هذا اللهم اذا إحنا بندور عليه ,, أما طريقنا ومشاويرنا كلها جبلية وأنا مجرب الهايلكس وكان زين

كلامك صحيح عزمه حتى بالاول مدري وشلون ,, والله يا كم مرات ودي أطلع من فوق طلعه أو حجره مسطحه وليست مثلثه حاده ومع كذا الأحظ أن الكلتش تطلع ريحته ,, المكينه ما تقرقر ولا تطفى بس مدري ليش الكلتش ما يمسك ويحرك الكفرات ؟؟
لدرجة أني كرهت القير العادي بسبب هذا الشي وشكيت أيضا بسواقتي !!
علشان كذا حمدت الله أنهم وفروا القير الاوتوماتيك وتشوفوني مكثر الاسئلة والمواضيع عليه .. ويمكن مشكلة الهايلكس الى الان بالكلتش لأن حتى فحمة الكلتش الكل يشتكي من صوتها كأنها ديزل والى الان 3 سنوات وماحلوا المشكلة !

أما الدبل الثقيل يعني القير على L4 صراحه وعن تجارب وليست تجربة تصير السياره شكل ثاني
يا أخوان قوي قوي قوي قوي قوي قوي قوي قوي بشكل رهيب

من ناحية أن المحرك نفسه على الغماره هذي أنا معك فيها ولدرجة انهم مخربطين القياسات !!
الغماره عليها عزم وسرعه فوق حقها لدرجة أن الشباب يجاكرون الكوامري بها
الدفرنسين ماعليه ذيك الفزه المطلوبه !! شي غريب وكلها بسبب الوكلاء والا معروف ان الدفرنسين يجيك بمحرك 6 سلندر ومكتوب خصائص المحرك بالكتالوج حق السياره وبالعربي واسمه نفس حق الفورتشنر تماما ..

بعدين أخوي الغالي أنت تقول أنه فوق 85000 ريال مدري أنت وش تقصد بأي طريقة دفع بهذا المبلغ ؟
أنا سألت عن الغمارتين 2008 سوبر أحسن شي وقير أوتوماتيك بـ 83000 ريال وهذا اول ماطلع الاوتو ,, وأصبر على بداية عام 2008 يعني بعد شهرين السعر ضروري ينزل , والحين معروف أنه غالي أما القير العادي ومواصفات فل في حدود 79000 ريال ..

[أبوحمد]

المشاركة الأصلية كتبت بواسطة انتو كذا حلوين

بسم الله الرحمن الرحيم

لو سمحتو يا اخوان ابي اسألكم عن شغله, انا مقيم في منطقه حائل وابي اشتري سياره عن قريب ومحتار بين هايلوكس دفرنس و دفرنسين ,وابي رايكم اي من ناحيه الفخامه والقوة والتحمل, وللعلم انا مو راعي تطعيس بس راعي كشتات, وابي كم السعر.


انتو كذا حلوين.

هلا فيك أخوي

كل ما أحط صورة جديدة أشوفها بتوقيعك ترى حقوق الملكية محفوظة وضروري تقدم خطاب علشان نوافق لك بإستخدام الصورة بالتوقيع

من ناحية استخداماتك أنا أضمن لك أن الدفرنسين بيعجبك وبيغطي وبزياده وتوكل على الله ولا تاخذ الا مواصفات سعودية لأنها فخمه ..

السعر حسب الطراز يا سوبر أو جي ال اكس فقط ؟؟
يا قير عادي أو أوتوماتيك ؟؟
وكلن له سعره أنا ما يحظرني الا أسعار S-GLX
الاوتو 83000
العادي 79000
وأنت لك الاختيار ..

[عاشق الدبل]

إلى الأخ أبو أحمد أقول سلمك الله

يا أبو أحمد أنت قلت في أحد الردود بعدما بعت الهلي بأنه ( عزمه مريض ) أويايخ أو طايح أوشيء من هذا القبيل ولعل هذا الرد يكفي يا أبوأحمد لأنك إنسان جربت السيارة وحكمت عليها ولكن يا أبو أحمد نحن نتكلم هنا عن التطعيس لا عن شق الرمال هناك فرق هناك شخص هوايته التطعيس فهذا ما يناسبه الدفرنسين لأنه ما يشفي غليله بتاتاً ولكن أنا قلت أنه بإمكانه يمشي في الرمل بشكل جيد لكن كون الشخص يريد التطعيس بحد ذاته فالسيارة غير مناسبة له لأن هواية التطعيس هواية جنونية الشخص فيها يريد سرعة تسييف مراقى تنطيل نوفرة يراها كل شخص هؤلاء هواة التطعيس لذلك كل ماذكرت لا يناسب الدفرنسين ولكن بما أن أبو فيصل يريد سيارة للتطعيس وللكشتة مناصفة فأنا أشور عليه بالدقس أو الهلي لأنه الصراحة تحتار بينهم ومع ذلك لك الخيار الدقس معروف عند حقين الكشتات اللي يبون وانيت ما يأخذون إلا هو لأنه رخيص مقارنة بذيك الأيام وعملي وممتاز ورائع ولا يحتاج تقول أرفع الموتر وإلا ما أرفعه والخيار لك أولاً وأخيراً والهلي كمكينة أقوى من الدقس ولكن كوزن الهلي أثقل بحوالي 60 إلى 80 كيلو

[عاشق الدبل]

ويا أخ أبو أحمد خوي رايح وشاري له موتر هلي دفرنسين مستعمل ماشي 24 ألف بـ 72 ألف وعرض عليه أحد أصحاب المعارض هلي دفرنسين 2008 أصفار بـ 79 ألف وبعد بفترة بسيطة سأل عن الهلي في المعارض 2008 وجدته 85 ألف ريال وسمعت من ناس يقولون أنه بياصل أو وصل لـ89 ألف

[أبوحمد]

أخوي عاشق الدبل ,, كلامك كله على العين والراس ,, واعذرني اذا كنت ما فهمت قصدك

بس أنا يوم قلت ان الدفرنسين مريض في رد سابق هذا بسبب القهر يوم أن مكينته 4 سلندر وما وصل الا 160 وطبلونه 200 !!!! يلعبون علينا التايلانديين ؟؟

والله أبو القهر يا أخي ومن حقي وقتها أقول أنه مريض وفاشل وما يأكل عيش ..

لكن إذا جينا للصدق فهو للعاقل والرزين واللي هو حق كشتات بيكون ممتاز ..
وكلامك صح أنا ما أرشحه كموتر تطعيس ,, بحكم وزنه وصغر حجم محركه ..

بالنسبة للسعر ماني متأكد بس أنا سألت عنه أول ما نزل قبل شهرين , وأحتمال تغيرت الاسعار وأنا ماني داري ..

ولا تنسى المرات الجايه نادني بأبو حمد وليس أحمد

وأشكر لك حسن ولباقة حوارك والله لا يحرمنا منك يخوي