[بارد القلب]

السلام عليكم يا جماعه الخير
باركولي
الافالون وصلت
خلوني انتظر 5 شهور
بس الحمدالله اخيرا وصلت
بس حبيت اسأل الشباب من الامارات اذا يعرفون مكان اقدر اركب في حساسات و بلوتوث
في الافالون بس يكون شغلهم نظيف
و اذا يقدرون يقولون لي كيف الاسعار بعد يكون احسن
و مشكورين و ما قصرتوا
والسموحه

[غيرموجود]

تقدر تركب بلوتوث في الوكالة بس شغلهم غالي بس نضيف 1600 درهم هذا انا سألتهم
و اعتقد انك تقدر تركب حساسات و نافيجيشن ايضا في الوكالة بس ما سألتهم عن السعر

[لكزس]

البلوتوث عند عبداللطيف جميل يكلف مع التركيب 1100 ريال

اما الحساسات مش متاكد من سعرها بس ما اتوقع تزيد عن 1000 ريال

اما الاسعار في الامارات ماعندي علم بها

[باصليب]

احسن شي الوكاله انا سألت و انشالله الاسبوع هذا بركب الحساسات تقريبا بين ال 1200 و ال 1500 طبعا السعر الي بيقوله الفلبيني غير و وقت الدفع غير لانهم بيعطونك خصم و البلوتوث 1500 انا انصحك الزكاله لانه اذا ركبت برع و خربولك اشيء ترا الضمان بيروح !!! و عن النافيقيشين انا سألت بس قالو ما انركب

[بارد القلب]

مشكورييين و ما قصرتوا
بس بغيت اسأل بالنسبه للحساسات ب 1500 خلفي بس ولا امامي و خلفي و هل يوصلونها بالشاشه
يعني تطلع معلومات الحساسات في الشاشه
و نفس الشي بالنسبه للبلوتوث ولا بس زرين تضغط عليهم وبس
يعني هل مثلا تطلع معلومات مثلا انه في حد يتصل على الشاشه
يعني لو مشغل البلوتوث و التيلفون على السايلنت
هلا اقدر من الشاشه اعرف انه حد يتصل
ولا بس اسمع رنه التيلفون و عقب اضغط زر الرد
و السموحه اذا تعبناكم

[م.أنس]

لا اخوي مايطلع الرقم بالشاشة ... ولكن لو كان المسجل يشتغل فسوف يتوقف تلقائياً ... ورح تسمع المتصل من سماعة واحدة فقط وهي اليمين الأمامية ...

ولكن السؤال يقول هل استطيع تشغيل كل السماعات ... او السماعه الي على اليسار لكن اللي فوق تحت مكن الإيرباق

[بارد القلب]

مشكور اخوي م.أنس و ما قصرت

[باصليب]

الشاشه لا شوف الشاشه هذا اذا السياره يايه من يلادها و فيها حساسات بيكون فيها شاشه ؟ و اب 1500 حساسات جدام و و را شغل وكاله
و على البلوتوث طبعا مب في الشاشه لانه البلوتوث و الحساسا تركيب محلى مب من المصنع فهمت

[البروفسيور]

الف مبروك يعطيك خيرها ويكفيك شرها وياليت شباب الامارات يصورون الحساسات الي تتركب عندهم وينزلونها في المنتدى ونشوف زي حقت وكيل السعودية عبداللطيف جميل او مختلفة

[بارد القلب]

خخخخخخخخ
مشكور اخوي باصليب
فهمت طال عمرك
بس ليش معصب انته؟؟
هدي شويه

[باصليب]

ههه مب معصب ^_*

[بنت الخران]

مراااااااااااااااااااااحب اخواني فى كل مكان


الحساسات

النفقيشن

الهاتف مع جمييع السماعات

باب الشفط كله

فى مكان واحد غير الوكاله وارخص

بخبركم وين بس على شرط

ابا تاكييد على كلامكم ان مثل ما خبروني الحساسات بس خلفيه وغاليه والبلوتوث شى بسيط مبسط مثل ما يقولون بس سماعه وحده

يعنى ماشى فايده من الوكاله

الحساسات من الخلف والامام

مع الهاتف والبلوتوث نظام اي سياره فارهه وانتم عارفينه جميع السماعات من جميع الاتجتهات معه ميكروفون مخفي فى جسم السياره الى هاتف نوكيا مع نظام التحدث


والكثير الكثير

مب بس دعايه

السياره بعد الريحه والصوت

مليت منها بس الوكاله

عدلى ياها

يا حلاتها


اتعرفون ( الكابري )

الى فى الشارقه

المنطقه الصناعيه مقابل وكاله المستبيشي بعد اشارات المرورر


وهذا هو الحل



شو رايكم


100%

معاومات بيبلاش

ههههههههه



ولكم جزيل الشكر


ولا شباب ولا شى ما اتعرفون شى بالسيارات

ههههههههههههههههههههه

[باصليب]

الغاليه الكابري نعرفه و محل ولد عمتي احسن من الكابري و هو الي نصحني اركب في الوكاله و بقولج ال اسباب
1- حساسات = بيلعب في الكهربا ؟ نفيقيشين نفس الشي يعني اذا شي في الكهربا اخترب ضمان الكهربا يروح و السياره كلها كهربا فهمتي ولا لا ^___^ الكابري بس حق كيت لانه محد يبا ضمان لل بودي

[بارد القلب]

مشكورة بنت الخران و ما قصرتي
بس انتي متأكده من الكلام هذا
و اذا تقدرين تجيبين لي رقمهم بيكون احسن
و اذا تعرفين الاسعار و تذكرينها بعد بتوفرين علي وايد
و هل أنتي جربتيهم
و اذا جربتيهم ممكن تحطين صور الاضافات الي ركبتيها على السياره
و هل سيارتك افالون؟؟
والسموحه

[بارد القلب]

مشكور أخوي باصليب على النصايح الغاليه
شكله الاخ يشتغل عند الفطيم( خخخخخ)
بس صدقك انه السياره يوم ايديده لازم تحافظ عليها و تخلي كل شي من الوكاله
بس المشكله انه الوكاله ما يوفرون لك شي
يعني مثلا انته تتكلم عن الحساسات
تصور يوم سألت مندوب المبيعات قالي ليش هيه ما فيها حساسات
وبعدين حدهم اذا وفرولك شي بس الحساسات و البلوتوث
يعني لو مثلا ابا بيبان شفط
او ابا نفيقيشن
ما بقدر اركبه عند الوكاله
نتمنى انه وكلاء تيوتا يعيدون النظر في مواصافت الافالون اليمتيد الي يجيبونها
او حتى يوفرون لك هاي الاشياء
بس لا حياه لمن تنادي
و السموحه

[باصليب]

بن عمي فديت خشمك اول شي الحساست الي في الكابري اب 800 حلو و هاي الحساسات لو تشتريها انت بروحك بتكلفك 100 حساسات تايونيه يعني عقب اسبوع بتشوط ههههه خلك عل وكاله و لا مكان محترف ^_*

[مستشار العين]

انا ركبتهم خارج الوكالة