[لا تنسى ذكرالله]

أرغب في شراء فور شنر 4 سلند أيهما افضل :-
1)- الدفاع الثانئي 4×2 توماتيك

2)- الدفع الرباعي 4×4 توماتيك وهل يتحمل هذا التطعيس أو البر ؟؟؟؟؟؟؟؟؟؟؟؟؟؟؟؟؟؟؟

الرجاء الاجابه خاصه الذي جربوا هذا النوع وفقكم الله
عاجلا جداً جزاكم الله خيراً وجعله في موازين حسناتكم

[أبوالدرداء]

أسأل الله أن يوفقك في شراء السيارة المناسبة

تعليق بسيط خارج الموضوع...لا الناهية جازمة للفعل الذي يأتي بعدها، وعلامة جزم الفعل تكون حذف حرف العلة

فيكون الصحيح: لا تنس ذكر الله

آسف على الفلسفة!

ولعل الخبراء يجاوبونك بما يثلج صدرك

[قويدارد]

اخي العزيز من تجربتي لل 6 سلندر اعتقد انه انسب كثير من ال 4 حتى لو شريت مستعمل والسبب ان الفورشنر سياره عائليه من 3 صفوف يعني لوكان معك ركاب وش تسوي بال4 سلندر! اعتقد بيكون جدا ثقيل

[محمد بن عمر]

خذ ستة سلندر قير تماتيك كانك تبي العزم والبر

[أبوحمد]

أخوي بغض النظر وش اللي مناسب !!!!

أنا بجاوبك على سؤالك مع أني لست مجرب ,, يعني لا تعتمد على وجهة نظري كوجهة نظر صائبة أو أساسية ..

إذا أنت ناوي تكشت وتطعس بالموتر يعني حق طلعات بر فأكيد أنك تاخذ 4×4 .. حتى لو كان 4 سلندر وقير أوتو بس اللي بتلاحظه

1 / فزة السياره ضعيفه ,, فقط لما تقارنه مع 6 سلندر ..
أما كأول استخدام لك بتلقاه جيد خاصة إذا سواقتك رزينه يعني ماتحب تتحدى أو تجاكر أو تكون أول واحد بعد ما تفك الاشاره !!
2 / الاربعه سلندر 4 × 4 صعب يجيب طبلونه وأقصى شي 165 كم ..

إذا أنت مو حول البران والكشتات الا على خفيف وما تتوغل للمناطق الرملية الشديدة فخيار الدفع الثنائي بيكون جيد جدا
وبمحرك الاربعه سلندر فزته بتكون مقبوله وايضا بيجيب معك سرعه ماتقل عن 170 كم ,, لأن الموتر بيكون بتعليق أمامي مستقل وبدوره بيقل الحمل عن المحرك .. بعكس الدفع الرباعي ..

أخيرا إختيارك يعتمد على طلبك

إذا أنت رزين وحريص على الموتر وتحب الكشتات - 4×2
إذا أنت رزين وحريص على الموتر وتحب التطعيس - 4×4 محرك 4 سلندر
إذا أنت شبابي وبعض المواقف تتطلب منك أنك تبيع الموتر مع اللي قدام واللي وراء ( بايعها على غفله ) فلا تتردد عن محرك الستة سلندرات ..

والله يعينني أكيد الشباب كلهم بينزلون علي لأن أغلبهم ما شاء الله Vx بس هم شباب ولا يعني أنهم بايعينها !!

أرجو أن أكون سهلت عليك أمر الاختيار ,, ولا يزعلون أخواني الافاضل تراني ما أقصد الا الخير ..

[أبـــو عـــزام]

والله ما قصر أبو حمد الله يعطيه العافية

وأنا بزيد عليه بكلام أساسي

جيب بدون 6 سلندر ليس بجيب

لكن 4 سلندر أكيد يفك أزمه ويمشي حاله بس مافيه مقارنه وإن كان على البنزين تراها متقاربه

4 سلندر بدون دبل خيار مناسب

6 سلندر دبل خيار قوي وممتاز

الله يوفقك ويرزقك اللي في بالك.. سلام

[مجنون الفورتشنر]

السلام عليكم : اذا انت تبي النصيحة لا تشتري الا 6 سلندر واعتمد ؟ لاني مثلك ونصحوني اكثر من شخص واشتريت 6 سلندر 2008 توماتيك

[دفع رباعي]

والله أخوي أبو حمد ماقصر كفى ووفى زي ماقال ، ومشورتي عليك لا تأخذ غير الستة سلندر لأنه لايعتبر جيب ، ويعتبر وانيت ، السيارة كبيره وبثلاث صفوف مقاعد وغير إذا بتحمل عفش وخلافه فالمكينة هنا تلعب دور فالأربعة ضعيف وعزمه ماش ، لكن الـvx هو المطلوب ، والله يحقق لك اللي تتمناه ، تحياتي .

[لا تنسى ذكرالله]

جزاكم الله خيراً على مروركم الكريم
وبالنسبه لستة سلندرات فلا أقدر على تقسيطه وعلى العموم ترى ياشباب السياره بالتقسيط ولا أقدر إلا على نوع 4سلندرات
وبالنسبه للسؤال فأني أتكلم عن الاربع سلندرات الذي جربوا هذه السياره خاصه
نوع 4سلندر 4×4 قير توماتيك هل هيى تتحمل ذلك لمن جرب هذه السياره ؟؟؟؟؟؟؟؟؟؟؟؟؟

أرجو من عنده هذه السياره يجاوبي على سوالي هل يتحمل البر أم لا
وجزاكم عني خير الجزاء وعن الذين يرغبون في شراء سيارة فور شنر أن يحقق لهم الله ذلك لهم .
والله يوفقكم

[أبـــو عـــزام]

اليوم سألت واحد في حينا معه فورتشنر 4*4 قير اتوماتيك (طبعاً صاحبها شباب)

يقول عزمها ماش لك عليه لكنه يمشي حاله طبعاً هذا في الطرق المعبدة والمسفلته

ويوم سألته كيفها في الرمال قال والله مشيت مع أماكن ما توقعتها ورقيت بها طعس ومشت نفسها

بس أنت يا أخوي أحسبها صح.. هل ترضى تدخل البر أو الطعوس وتكرف الموتر وتدعس على البنزين وتشيل هم الموتر يقوى يمشي أو بيغرز.. حتى خارج البر في الطلوع القوي مثل (القديه) اللي في طريق مكة وأنت داخل الرياض قبل التفتيش وغيرها من الطرق السيئة.

أشوف أنه دمار للموتر أنك تدعس عليه وتطلع مافي بطنه بنمره قويه أو دبل ثقيل وأشوف أنها نفسيه من ناحية أنك تبي تدخل الرمال أو الشعبان وأنت معتمد على الله ثم على سيارة نشيطه.

(على العموم إذا الدعوة مادية وأنا أخوك ترا الفرق 13 ألف أو أقل بينه وبين vx1 اتوماتيك)
حاول تتدينها دين من أحد أو تدبر نفسك لأنه بصراحه قهر تأخذ (جيب 4 سلندر)

كان أفضل لي مادياً أن أشتري 4 سلندر ولكني ضغطت على نفسي ببعض التمويلات الإسلامية والدين من هنا وهناك حتى أستطعت أن أشتري 6 سلندر.

(وترى الزيادة في العزم حتى لو منت محتاجها حالياً نعمة)

الله يوفقك