[أبـــو عـــزام]

بسم الله الرحمن الرحيم

يا أخوان من خلال تجربتي للكفرات في الطرق المعبدة والبر وجدت أنها قاسية جداً

أو ما شريت السيارة وضعت في الكفرات 25 ومع ذلك مطبها قوي في المدينة.

ذهبت من أجل أن أطعس بها فوضعت في الكفرات 15 ومع ذلك كأنك يا أبوزيد ماغزيت مع أن السيارة تمشي من أحسن مايكون لكن واضح الكفرات مأثرة عليها ومجهدتها بزيادة.

سألت أحد الأخوان وشاف الكفرات وقال هذي كفرات جبلية ولاحظ أنك إذا نقصت الهواء حقها تحصلها قاسية نفس الشيء.

اللي تجي مع السيارة طبعاً هي برجستون تايلندي جبلية.

سوف أغيرها في أقرب فرصة بإذن الله وأشتري دنلوب فهو لين ويصلح للرمال ولايصلح للصخور أبداً

الله يوفقكم جميعاً.. سلام

[الخاطوف]

والله يا اخوي ابوعزام انا حاط في الكفره60 ولا لاحظت شي بس انا مااسرع مع المطابات
والله هاذا الي عندي

تقبل تحياتي اخوك:::::الخاطوف

[أبـــو عـــزام]

أخوي الخاطوف 60 كثيرة

35 أفضل شيء

شاكر مرورك

[قويدارد]

من خلال تجربه مع كفرات الفورشنر كان ضغط الهوا 35 ولاحظت انها جدا عاليه على السياره يعني السياره اصبحت جدا خفيفه لكن قاسيه جدا على المطبات والحفر خاصه في جده لان معدل الحفر والمطبات 5 في كل نص متر!!!!
وفي صيانة ال 35000 الوكاله غيروها ل32 ولاحظت ان الدركسون ثقل شوي بس السياره صارت اخف على المطبات
واللي ساكن في الرياض او الشرقيه الافضل 35 يريح السياره

[أبـــو عـــزام]

حتى الرياض مليان حفر

يا جماعة الواضح من كلامي أن الكفرات (حجرية) ومعروفة بالقساوة والتحمل يعني ما تشقها الصخور بسهولة

لكن الراحة فيها (صفر) للأسف

اللي خايف على السيارة تتكسر ينقص هوا الكفرات أكثر أو يغيرها وهذا ما سأفعله بعد موسم الصيف القادم إن شاء الله


الله يوفقكم

[مجنون الفورتشنر]

السلام عليكم جميعا
انا معك في ذلك ان كفرات برجستون قاسية وليست لينة
واذا نقصت هواء الكفرات يثقل معك الدركسون ويقل عزم السيارة ويزيد من صرف البنزين ( وهذا كلام احد المهندسين المكانكين ) وانا جربت كفرات ( يوكوهاما )في سيارتي سابقا ( داتسون و كامري ) فلاحظت الفرق بينها وبين البرجستون وانا إنشاء الله سوف اغيرها بعد فترة
وتقبلوا تحياتي

[أبـــو عـــزام]

شاكر لك مرورك أخي مجنون فورتشنر أنت وقويدارد والخاطوف

البرجستون أنواع وصحيح يوكوهاما ألين منها

لكن النوع اللي في سيارتي وكالة برجستون تايلندي (جبلي) يعني نوعه جبلي وهو أقسى حتى من كفرات برجستون التي ليست جبلية.


حتى لاحظه في سيارتك حاول تضربه برجلك أو بيدك قاسي مره مع أن الهواء 25 خمسه وعشرين!!


يعطيك العافية

[أبوحمد]

غير إلى دنلوب نفس المقاس ويجي مكتوب بالابيض ,,

ممتاز جدا ولين وينفع للخط والرمله ..

[أبـــو عـــزام]

المشاركة الأصلية كتبت بواسطة أبوحمد

غير إلى دنلوب نفس المقاس ويجي مكتوب بالابيض ,,

ممتاز جدا ولين وينفع للخط والرمله ..

الله يعطيك العافية يا أبو حمد.. فعلاً هذا اللي بسويه إن شاء الله

تصدق الحين الكفرات حقت شد بلد حطيت فيها 20 أبي أريح للسيارة،، طبعاً السفر يختلف لازم 35 أو 40

ومع ذلك مو لذيك الدرجه الراحه

شكراً لمرورك

سلام

[أبو عبدالرحمن خ]

أخوي ابو عزام لا تنسى إنك توك تارك الفورد

طبعا هناك فرق شاسع بين انه يكون معك فورد ثم تنتقل الى جيب فورتشنر

فلا تنس ذلك فلا بد انك تاخذ وقت حتى تقدر تتغير

علما إني لنا لم أحس بفرق كبير بعد التغيير نه كام معي كامري

لكن الكفرات داخل المدينة من 25 - 30- كأقصى حد

بالسفر 35- 40-

وفعلا برجستون فيه قساوة شوي لأن دنلوب أفضل وألين

تحياتي

[أبـــو عـــزام]

جعلك تسلم يا أبو عبدالرحمن،، عاد تصدق الماركيز مركب له كفرات شبح عريضة مره ولاهوب مريح مثل الفورتشنر وأنا مهدي لكن الشهادة لله بعد الـ 100 كم وأنا ماسك خط الماركيز يصير ثابت ومريح ولا تدري عن الخط.

كان معي قبل الفورتشنر سيارة صني2001 كفراتها ميشلان بصراحه فرق في المطب واضح بغض النظر عن أن هذي جيب وهذي صغيرة.. الكفرات اللي في الفورتشنر تكسر الموتر وإلا أنا عارف أن يايات الفورتشنر مريحه ومطبه زين بس الكفرات هي أساس البلاء.

الله يكفينا وإياكم شر البلاء ويوفقنا لما يحب ويرضى

سلام

[دفع رباعي]

صحيح البرجستون قاسية وحقت جبال - غير إلى دنلوب مقاس عريض زي حقت الفكسار 2007 نفس المقاس والشكل مقاسها 275/R16/115T تجي مكتوب بالأبيض ع الكفر DUNLOP مفرغه من الداخل الكتابه وبالأبيض ع الحواف كلمة دنلوب ويجي نوعين 114 T و 115 T ، والأفضل 115 ، دنلوب مريحة جداً سواء زفلت أو رمله . وإذا بتشتري خذ من الشركة نفسها أرخص من المحلات الأخرى وفيه فرق واضح،وعبها نيتروجين أحسن من الهواء العادي أثقل ويدوم في الكفر أطول مدة وع ضغط 35 psi ،
أنا شريتها طقم 4 حبات بـ 1600 مع ضمان سنة .

[أبـــو عـــزام]

جعلك تسلم يا أخوي دفع رباعي وهذا اللي بيصير إن شاء الله

حتى لاحظ الكتابه اللي على الكفر تعطي منظر لسيارات الجيب عموماً وتميزها عن غيرها من السيارات الأخرى

بس ما فهمت معنى 115T؟

بعدين كم الإرتفاع 60 أو 70 أو كم؟

وبسألك هل يحك الكفر مع المطاب أو في حال لفيت الدركسون آخر شيء؟

سؤال آخر مهم: هل هناك خطر في الإنزلاق في الماء يعني تماسكها في الأرض في حال الأمطار أو حرارة الإزفلت غير مرضي؟


الله لا يهينك

[راعــ الاند ــي]

السلام عليكم

اخوي ابو عزام انا اخوي معه فورتشنر وبالنسبه للكفرات البرجستون فعلا قاسيه جدا

ومن التجربه برضو ماتعيش مع الحصا تتقطع

اما بالنسبه للدنلوب فهي فهلا لينه وتنفع للرمله وخذها مني تنفع للحصا 100% ولا تتقطع وتتحمل

لكن فيه كفرات الين منه بواجد لكن ماتنفع للحصا وهي الهنكوك وحدها سنه الا سنه ونص حسب
الاستخدام وشكلها افضل على الفورتشنر من الدنلوب ونصيحه خذ نفس المقاس افضل للشكل

لكن ترى الفورتشنر مقارنه بالاند من ناحية الراحه مافيه مقارنه اركب موتري واركب موتر اخوي

تقول كأني راكب هايلكس الفورتشنر قاسي بسبب خفته وقوة يايه

والدليل انك تقول حاط فيه 25 ومع ذلك قاسي

ترى 25 خطيره يروح عمر الكفر والفرامل يصير ضعيف واللفات شينه

وان شاء الله اني افدك وانا ماتكلفت من فراغ ترى لي خبره في الكفرات ولايهونون الاخوان

من كثر مااجرب لاني بصراحه راعي تتطعيس وطلعات بر وأحرص على الكفرات

من وقت كان معي هايلكس وانا يمكن ركبت عليه خمس اطقم بأنواع مختلفه في سنه ونص

ومشكور على الموضوع

[دفع رباعي]

الارتفاع 70 وتجي نوعين 114 T و115 T ماأدري بالضبط نسيتها قد مر علي جدول مسويته الشركة يشرح كل الكلام اللي مكتوب ع الكفر أتوقع إن له علاقه بالعرض غير متأكد ، 275 عرض الكفر بالملم ، 70 الارتفاع عن الأرض ، R 16 مقاس الجنط ، 115t زي ماقلتك أول ، ولا تحك ولا شئ ، وبالعكس ثباتها للسياره أفضل في المنعطفات أو الأرض الزلقة كونها أعرض من مقاس بلدها بـ 10 ملم .

[أبـــو عـــزام]

أخوي راعي اللاند الله لا يهينك،، أكيد فيه فرق في المطب والعين ما تعلى على الحاجب

لكن عاد الكفرات مسببه أزمه حطيت فيها 20 واشوفها اشوا طبعاً هذا حل مؤقت وعارف أنه خطر وإن شاء الله إني راكد مع انه بعض الاحيان تجيني خمات وادعس.. أما الهانكوك ما أبيه أبداً.

أخوي دفع رباعي عساك سالم على هالمعلومات وفعلاً الدنلوب يستاهل وسعره مناسب.

يا جماعة وش رايكم في ميشلان اللي يجي مكتوب عليه 4*4 هل هو قاسي؟

تسلممون