[يالله من فضلك]

بإذن الله الانضمام لنادي الفورتشنر قريب
وسؤالي:

لقيت فورتشنر موديل 2006
V6
أبيض
القير أوتو
البدي وردة ما شاء الله
الممشى 9000 كيلو (تسعة آلاف فقط)

حاده علي المعرض 83000 ثلاثة ومانين الف ريال
سؤالي
هل يستاهل هذا المبلغ وحجة المعرض ان السيارة شبه جديدة ما مشت إلا تسعة آلاف؟
طبعاً أنتم تعرفون ندرة هذي السيارة في المعارض بالذات الستة سلندر

أظن شفت في موضوع لأخوي الذوادي يقول فيه سته سلندر بخمسة وسبعين ألف
أتمنى اللي يعرف أحد عندة V6 قير أوتو يعطيني العنوان أو رقم راعيه
وله جزيل الشكر وخالص الدعاء (وإن بغى سعي يبشر به):d

بارك الله فيكم ومشكورين مسبقاً لأني داري بحرصكم على الفزعة لأخ جديد
ودمتم بخير

[الوشق]

هلا اخوي الغالي (( يالله من فضلك )))
انا لقيت يوم الجمعة 3 سيارات 2006 vx بس ما ادري 1 او 2 والحقيقة اني نسيت هل هي اوتو او لا
لكن من باب ذكر الشئ يكمن تستفيد
2 كانوا مسيومين ب 60 الف
لكن ليست نظيفة
والثالث ما شاء الله نظيف وكان مسيوم ب 58 الف
طبعا ما ادري كم وصلوا لاني كنت ماشي بسرعة ولا ركزت كثير
اتمنى اكون ساعدتك في معرفة الاسعار ولو نسبيا
الله يوفقك
دمت بود

[الوشق]

اسف اخوي واحد منهنم كان gx
4 سلندر
وكان مسيوم ب 60 الف وواقف في معرض
وكا اقلهم نظافة
طبعا في الرياض

[يالله من فضلك]

مشكور أخوي الوشق
صحيح gx لقيت عايدي بستين
وتوماتيك 65 الف

لكن سؤالي عن vx أوتو
أتمنى ما حد يبخل علي بمعلومة

[الوشق]

اخي (( يالله من فضلك ))
اذا بتدفع 83
زدها شوي
وخذ 2008 vx1
قير عادي
ب 96 الف
والفل كامل vx2
قير اوتو ب108500

وشاور وفكر واستخر
اتمنى لك التوفيق

[الوشق]

اخي
انا ليقيت ايضا عند معرض في الرياض
2007 vx2
فل كامل قير اوتو مراتب مخمل
ماشي 3000
حد ب100

[محمد بن عمر]

تسلم يا الوشق نفس اللي شفته انا عند معرض جنب البازعي وشكلي ناوي اشريه

[الذوادي نت]

هلا أخوي أنا توني شاري الفورشنر 2006 v6 قير أوتوماتيك ماشي 50.000 75000 ريال

والبدي نظيف اللون أسود

أنا موترك اشوف أنها يسوى 80.000 وإذا مره لك رغبه حده عليه 82000 صدقني يستاهل أحسن مادام أنه ماشي 9000 بس أنتبه يمكن أنه فاصل العداد ترى في ناس كثير يسونها وما يخافون الله

شوف لك واحد خبير يعرف إذا هو فاصل العداد ولى لى وصدقني مادام ماشي 9000 يعني أنه باقي 51000 كيلوا على الضمان وقدامك سنة كاملة يعني الموتر جديد أفضل من أنك تاخذ 2008 وأربع سلندر أشوف 6 سلندر أفضل بكثير سواء في البر أو في السفر

وأتمنى لك التوفيق ولا تنسى صلاة الأستخارة بارك الله فيك

[يالله من فضلك]

جزاك الله خير يالذوادي كفيت ووفييت
والحقيقة ان النفس ودها به
لكن عندي سؤال
هل يتوفر الفورشنر في الشرقية يعني لو ازرق لمعارض الدمام ممكن احصل مطلبي
اللي هو V6 قير أوتو
وان كانك بتبيعني موترك اهلا وسهلا
جزاك الله خير

[الذوادي نت]

بصراحة أنا دورت في معارض الدمام ما لقيت مشاء الله كل ما أسئل معرض يقول ما يجلس الموتر ينباع على طول

والله موتري يا غالي توني مالي فيه إلى اسبوعين واحد من الشباب ماخذه على نظام الإيجار وأنا دفعت كاش وخذت السيارة من الوكالة ولين ألحين ما خلصوا لي الإستمارة

بس أبشر أرسل لي رقم جوالك على الخاص وإذا حصلت لك شي أتصل عليك على طول

[مجنون الفورتشنر]

بصراحة الشباب ما قصروا كل أدلى بدلوه
لكن الامريرجع اليك فانت مخير بين المستعمل وبين الجديد وكم الفرق بينها وعلى حسب ( القريشات ) الفلوس
والامر الثاني أني لفيت معارض الشفاء قبل فترة ولم أحصل فورتشنر مستعمل وفيه معرض في الشفاء اسمه معرض الشهراني أكثر المعارض يبيع سيارات فورتشنر
ولك الاختيار ،،،
والله الموفق

[يالله من فضلك]

الله يجزاك خير يالذوادي ويا مجنون الفورتشنر
وهذا العشم والله فيكم
والرقم على الخاص ما يمديني لازم مشاركاتي تزيد عن 30
على العموم أنا دايم أشيك على الموقع
بارك الله فيكم

[الذوادي نت]

أبشر أنا إن شاء الله يوم الخميس رايح المعارض ببيع سيارتي القديمة مكسيما ورنا تبليط الحوش وحوسه

وإذا لقيت شي باخذ رقم الرجال وأحطه لك هنا في الموضوع وأخليك تكلمه وأنا أشيكه لك مضبوط صدقني إن شاء الله لو فيه دقه حتى في الشكمان أطلعها لك معليك خبره (:

الله يسر لك إن شاء الله ولا تستعجل أنا جلست 3 شهور لين شريت السيارة

في أمان الله

[يالله من فضلك]

تسلم الله يبيض وجهك دنيا وآخرة
في انتظارك
وفي انتظار أي شخص ممكن يخبر سيارة

[الذوادي نت]

أسمع عندي لك شور روح أقرب وكالة تويوتا

قسم الأقساط ودخل على المسؤل وقوله إذا جاكم أحد عنده فورشنر ماخذه بنظام إيجار ويبي يرجعه أو أسدد كاش عنه وأستمل السيارة عطهم رقمك وإذا مصري قوله أبشر بالحلاوة راح يحفر لك الأرض (: طبعا هذا يعتبر سعي

أيش رايك في الفكره

حصلت لك واحد في وكالة تويوتا بالدمام لاكن ما عجبني شكل راعيه كرافه كرف الله يهديه حادينه 75000 والله ما يستاهل حتى 70

الله الموفق

[مجنون الفورتشنر]

للمعلومية فيه شخص أعرفه طلع فورتشنر 2008 أربعة سلندر تقريبا مشى معه حوالي 1500 كيلو بالتقسيط الدفعة الأولى 14000ريال على كلامه وبعد فترة صرف له سيارة من عمله . واخذ سيارته الفورتشنر ورجعها إلى الوكالة
أخذوها وأخذوا عليه الدفعه الأولى . علما أنهم حاسبين السيارة عليه بقيمة 114000ريال يعني أخذوا عليه 14ألف باردة مبردة ....

[الذوادي نت]

ياله من فضلك حط لي رقم جوالك عااااااااجل لقيت لك موتر لقطه 2007 في 6 الممشى صيرو

إن شاء الله في واحد راح يشوفه إذا ما شراه الله لا يهينك دق سلف وتعال الدمام تشوف الموتر

لونه أسود مشاء الله طبعا زيروووووووووو وسعره 95000 لا يفوووووووتك