[ليكزي]

السلام عليكم و رحمة الله وبركاته



كيف الحال أخواني ملاك أفالون الأعزاء وملاك سيارات تويوتا الكرام بشكل عام ؟!
بشرونا عنكم، ان شاء الله طيبين ؟!
يالله حيهم وبارك لهم ..

هذه قصتي بالتفصيل الممل ..

في الحقيقة، شائت الأقدار والضروف قبل شهر تقريبا بان تتعرض سيارتي GS430 موديل 2008 الى حادث مباشرة قبيل وصولي وذهابي الى فحص الـ 5000 كلم في قسم الصيانة الرئيسي في المنطقة الصناعية بدولة قطر ..

لا (تحاتوا)، انا بخير وما فيني الا العافية وماصار فيني شيء .. الاصتدام تعرضت له من الخلف بواسطة سيارة لاندكروز موديل 92 ، حيث اعٌتبر الأخ الذي صدمني متسببا وأنا المتضرر طبعا .. لقد تضرر و(تشمخ) الصدام الخلفي والشنطة (لكنه ما تخفس .. ما شاء الله البدي قوي) ، بالإضافة الى تكسر جزء من الإسطاب الخلفي الأيسر .. والحمد لله على كل .. لكن ليس هذا موضوعنا الأساسي ..



بل حديثنا الرئيسي ، انه في الأيام القليلة الماضية ، جاء موعد اصلاح المركبة ، فذهبت بها الى المكان الذي يجب ان تؤخذ اليه لتصليحها (في الوكالة طبعا) وعدت الى المنزل رفقة والدي العزيز ، وبقيت خلال الفترة الماضية من دون وسيلة موصلات (لاحظ قلت وسيلة مواصلات يعني حتى سيكل ماعندي ههه ) ..

المهم، علم عمي (في الأربعيات من عمره) بحالي وسالفتي ، وتكرم مشكورا و منونا - جزاه الله خير - بإعارة سيارته تويوتا أفالون XL موديل 2006 لي واستعمل هو سيارة العائلة (تويوتا بريفا) واستغلال فرصة سفر سائقهم الثاني ..



عاد بعد ما اخذ اغراضه واوراقه وحاجياته، سلمني مفتاح السيارة (السويتش) وقالي توكل على الله .. الله يحفظك) .. وانا اول ما فتحت الباب وقعدت في السيارة ، كنت قاعد متخوف وارتجف واقول الله يستر ان شاء الله (هذولا شباب قسم الأفالون واعضائه - الله يهديهم - كله طايحين سب و تهجم ومشاكل في السيارة ومافي علة ما طلعوها ما شاء الله عليهم) ..



فتحت باب السيارة واذا بالأنوار الداخلية القوية الرائعة ترحب بي أجمل ترحيب وبعدها تعتم بشكل غاية في الجمال والفخامة (لو كانت السيارة عندها لسان وتتكلم ، كان قالت لي حياك الله اركب ) .. طبعا قبل ما اشغل الموتر ، قعدت اعدل قعدتي واضبط المرايات (ذكرتني بايام تدريب السواقة ) .. ما شاء الله، المساحة الداخلية في السيارة رحبة بـ إمتياز وبجدارة وتقدر تأخذ فيها أكثر من راحتك وهذا شيء ملفت للغاية وتفتقده العديد من السيارات .. نوعية الجلد شوييي لك عليه (شي بسيط) لكن يظل رائع .. صندوق الأمتعة الخلفية ضخم وواسع جدا (ممكن 4 اشخاص بالغين يناموا فيه ) ..

مقعد السائق كان راجع لوراء نوعا ما وانا متعود في سيارتي بان اكون حاضن السكان (الدركسون) تقريبا .. ارتفاع المقعد كان عالي بعض الشي بينما انا معتاد بان (السيت) بكون نازل في سيارتي (احد الأسباب الرئيسية في ذلك حزام الأمان !! حيث اصبحنا في الدوحة شبه مجبرين على استخدامه والا ستحسب ضدك مخالفات صارمة وقاسية قد لا تحمد عقباها .. قفل حزام الامان لا يرتفع تلقائيا مع المقعد (كما في أفالون) ، حاولت مرارا وتكرار ارفعه لكن دون جدوى، فانت تقريبا مضطر بانك تنزل المقعد لأقل درجاته حتى لا يشد على جسمك وبطنك خاصة اثناء القيادة والا سوف تتضايق نوعا ما ..



قلنا بسم الله وشغلنا السيارة .. فتحت المكيف (روووعة وبارد ما شاء الله مثل سيارتي ) .. وبعدها فتحت المسجل (المذياع) وضبطت تردد إذاعة قطر (لا الاه الا الله ، صوتي محيطي من 12 سماعة بمعنى الكلمة ومب اي كلام وخاصة للركاب الخلفيين ) .. نطرت شوية لما تسخن السيارة وسحبت الهاند (الجللط) وتوكلنا على الله .. لحد الآن الأجواء رائعة ومثالية للغاية لسيارة من العيار الثقيل !! وليس أقل من نصف سعر لكزس LS و اقل من ثلاث ارباع سعر بي ام دبيليو - الفئة السابعة و اقل من مرسيدس S (اقل نوع سياحي ) بكثييييير .. ما شاء الله ، عيني عليها باردة والله يبارك لأصحابها ..
مثل ما قلت لكم ، كنت اسوق بخوف وعلى اقل من مهلي وقابض (ماسك) الخط اليمين علطول انا والسوداني والهندي (أقصى سرعة 40 حتى عمي اصلا لما كنت معاه كان ما يسرع و سواقته رايقه وبشويش) .. خايف من الدوار ، خايف من المنعطفات، خايف من البريكات (الفرامل) .. الشيء الوحيد اللي ارتحت له هو (نور الزينون الأبيض) واللي كان ينور لي مساحة كبيرة من الطريق وكأنه يقولي (تفضل عزيزي ، لا تخاف أنت في الشيخة أفالون ) .. رديت و وصلت البيت بسلام ..

[ليكزي]

تـــــابـــع



في اليوم الثاني ، تجرأت شوية بعد ما اخذت الثقة في نفسي وفي السيارة ، وحان الموعد الحقيقي لـ تجربة السيارة (تست درايف) :-

اول طريق رئيسي اقابله .. علطول نجرب التسارع بالـ D .. ممتاز وما عليه كلام (حوالي 7 ثواني واجزاء من الثانية .. خويكم تعبان في القومة ) ، بس صوت حنة المكينة شوي ما عجبتني (متعود على هدوء اللكزس ) ..

اول دوار في وجهي .. تجربة الثبات .. على سنة (سرعة) 50 - 60 كلم/ساعة لفيت الدوار يسار وبكل ارتياح و ما شاح الموتر ولا شيء .. ما فيش مشاكل (مع انه لف علي واحد في الدوار كان بيصير حادث خشن لكن الله ستر ) .. كله تمام وشغل عدل وعالي العال .. السيارة ناعمة وسلسة ما شاء الله .. (انا سيارتي مدري كيف، تصير قاسية و وعرة ويابسة واحسها تهبط للأرض و عفسة ومدري ايش (خاصة مع استعمال زر الـ SPORT) اووووه .. مثل مانتوا عارفين ، هذا وضع وحال سيارت التعليق الرياضي سواء السيدان (الصالون) أو الـ SUV (الفورويل/الدفع الرباعي) ..



اول مطبة اقابلها .. تجربة النعومة او القساوة .. على سرعة 25 - 30 كلم/ساعة (كان ممكن أكثر طبعا، بس ما نبي نكسر سيارة العم ) .. ما شاء الله ناعمة (الاسبرنغات/الجامبينات) تنقز (تقفز) شوية وكاني قاعد على بلونة مطاطية .. اما تعال لسيارتي، اووووف، وعرة نوعا ما (بيم ام X5 4.8 م 2005 أكثر قساوة، تخيلوا ) والله تحس السيارة تكسرت ، اركب المطبة بهداوة وبراحه وبسرعة 5 كلم/ساعة والا ترى مب احسن لك .. طبعا التعليق الرياضي والرنق (الجنط) مقاس 18 ما يقصر في القساوة ..

اول منحى (شبه منعطف لكنه مش حاد كثير او بزاوية 90 .. بس تقدر تقول زاوية 120 - 130 ) اقابله .. تجربة الثبات مرة اخرى (تحول ابو شوماخر الأخ ) .. على سرعة 60 - 70 كلم/ساعة .. رائعة وثابته و طرية (رهيفة) ما شاء الله .. نظام التعليق فيها مريح وفيه ليونة كبيرة .. اما شوف سيارتي، كانت راكب دراجة واللي يخلي (الكراسي الحاضنة في السيارة واللي تثبتك في مقعدك بشكل عجيب ورائع) .. لكن طبعا اقدر اخذ المنعطف بسرعة أكبر بقلييييل (تقريبا 85 - 100 كلم/ساعة) ونظام AVS ما يقصر ..



اول طريق سريع طويل (هاي وي) اقابله .. تجربة الرساوة وعزل الهواء .. وصلت سرعة 160 كلم/ساعة وبعدين تذكرت اللي يقولك (ما يمدحون الجنون والطيران) الله يخلي لي سيارتي .. بس ما شاء الله عزمها قوي و رووعة ورساوتها طيبة .. لاحظت رقلة (رجة/هزة) من زجاج النوافذ والتواير على السرعات العالية من 120 وطالع (لكن ابشر، لا داعي للقلق والمسألة بتصوري عادية) والسرعة اللي انا كنت فيها تعتبر جنونية ومب سهلة حنى على أغلى وأفخم وأكبر سيارت العالم .. عزل الهواء جيد جدا والتنسيم طبيعي وبسيط ، اي نعم هناك تنسيم لكن مب لذيك الدرجة المبالغ فيها في وصوفكم (والله كبرتوا الموضوع أكبر من اللازم و عطيتهوه أكبر من حقه و حجمه (سويتوا الحبة قبة) وكنتوا مبالغين و (موسوسين وحساسين) كثير صراحة - الله يهديكم ويسامحكم بس .. انت شغل المسجل شوي وامورك طيبة ان شاء الله .. سيارتي عزلها وهدوئها وتماسكها واتزانها أفضل بطبيعة الحال، لكن احس بان الفارق مب كبير لذيك الدرجة اللي ممكن تتخيلونها بصراحة (الا اذا انت دقيق جدا جدا وتوسوس وتلاحظ كل كبير وصغيرة) .. لا تدقق كثيرا وتتذمر، صدقني انت بخير وسيارتك من أروع ما يمكن ..

هذه شهادة حق من أخوكم (راعي اللكزس) وتستحقها تويوتا أفالون بأمانة وبكل فخر وإعتزاز ..
افاااا، عندكم سيارة تعتبر (درة) السيارات في العالم ، وانتوا كله محولين القسم مشاكل x مشاكل وخربات ومبالغة في وصف الأمور وخليتوا السيارة ما تسوى ريال .. الله يهديكم بس، خليتوا اللي يسوا واللي ما يسوا وكل من هب ودب قام يقارن سيارته فينا (حتى وصلت المواصيل لهيونداي و كيا !! مع كامل إحترامي وتقديري لهم) .. اشبلاكم يا اخوان ؟! كرهتمونا و خوفتونا من السيارة ومن القسم .. انا ما اقولكم لا تذكروا سلبيات ، بالعكس هذه شيء حضاري و ظاهرة صحية تشكرون عليه ، لكن لا داعي للمبالغة في الكلام وتقلبون القسم كله مشاكل و خربات وكثرة المواضيع تلك تنفر الأشخاص اللذين ينون شراء السيارة (على المستوى النفسي) ,, خليكم واقعيين وصريحين ..

[ليكزي]

تـــــابـــع



بالله عليكم جيبوا لي سيارة تجمع العوامل التالية:-
- الإسم (تويوتا) .. أنجح شركة سيارات في العالم والأكثر مبيعا على مستوى الكون بأكمله ( لا غرابة في ذلك ، ونعم والله تستاهلين ) ..
- إعتمادية وصبورة و خراباتها نادرة وتكفرفها كرف (اليهد) وما تقول أح ولا آآآي .. وهذا كلام الخبراء والمختصين وما اثبتتها التجارب والابحاث العملية ..
- تصميم خارجي ولا أروع وابداع من مهندسي وفناني تويوتا و التصميم داخلي فخم جدا ومرتب وأنيق بتخشيبة رائعة وابداع لا يعلى عليه والكلام لا يوفي حقه ..
- مساحة داخلية و رحابة (على كيف كيفك) وتاخذ اكثر من راحتك فيها ..
- سعر الشراء مغري جدا ومناسب (تستاهله ونص و ايضا أعتبره زهيد و رمزي و قليل في حقها صراحة وتستاهل أكثر) ..
- خدمات صيانة الوكيل ممتازة وقطع الغيار متوفرة وباسعار طيبة وفي المتناول ..
- مميزات وتقنيات روووعة في الفل أوبشن مثل (أنوار زينون + مفتاح ذكي والدخول بدون مفتاح والتشغيل بزر + نظام صوتي على مستوى + تدفئة وتبريد المقاعد + ذاكرة لحفظ وضعية مقعد السائق + مقاعد أمامية تتحرك آليا بـ 10 وضعبات للسائق و 6 وضعيات للراكب الأمامي + مكيف مزدوج منفصل + مثبت سرعة + فتحة سقف + أزرار تحكم بالمكيف والمسجل على المقود + ستارة خلفية كهربائية (حسب الطلب) + مجسات توقف - حساسات (حسب الطلب) + بلوتوث (حسب الطلب) + جناح خلفي مدمج (حسب الطلب) + شاشات DVD للمقاعد الخلفية (حسب الطلب) وغيرها) يمكن بس ناقصها (نافي) وتصير توووب ، بس هذا مب عيب وتم ايجاد الكثير من الحلول من الشباب -- جزاهم الله خير - لها ..
- اذا لا سمح الله مرة صادك ضرف طارىء او مشكلة واحتجت فلوس فسيارتك بالفعل (شيك في الجيب) وتمسك سعرها وتجيب لك مبلغ طيب لما تبيعها ..

و غيرها ..

اذا ، السيارة ناجحة وصفقة رابحة بكل المقاييس ، فلماذا كل هذا التقليل و (التقزيم) من شأن السيارة الأعجوبة .. صدقني لن تجد سيارة بهذه المواصفات الا تويوتا أفالون (مفخرة سيارات الركاب (الصالون) في القارة الصفراء) .. وحححححش يا أفالون .. صدق لي قال المثل، اللي ما يعرفك ما يثمنك .. برااااافو تويوتا (اااااه و و يلومني فيكي) .. هذه الأسباب وغيرها تجعلنا وتدفعنا لكي نعشق تويوتا ولكزس ..



اقولها بكل ثقة وبالفم المليان، صدق من قال، أفالون سيارة من تويوتا تنقصها شعار لكزس او بي ام او أودي او مرسيدس (والله بأمانة ، انا اشوف الشعار هو اللي يتشرف بالسيارة مو العكس) .. صدقوني الشعار وحده من الممكن وبدرجة كبيرة ان يحقق مبيعات خيالية وفوق ما تتصورون عند عموم الناس (أكثر الناس هالأيام تعز وتحب الإسم والشعار ) .. ومستعد ابصم لكم بان أكثر من 90% من الناس لا يعيرون اي إهتمام للأنظمة او ما شابه ، (بلا انظمة بلا نيلة بلا زفت ) يلا سيارة كشخة (برستيج) وغالية وعليها اسم والا شعار مرسيدس والا لكزس وشكله زين خلاص خذها وانت مغمض .. والخير موجود ولله الحمد عند ربعنا ، والله يزيد هالنعمة والخير ويبارك فيها ..

افتخروا واعتزوا بجوهرتكم الثمينة الشامخة و ارفعوا رؤسكم وهاماتكم للسماء يا ملاك الأفالون واحمدوا ربكم ، و خليني اقولك، انا واحد منقهر ومتحسف (نوعا ما) على الفارق الكبير (دبل/ الضعف تقريبا) اللي دفعتها من اجل سيارتي ، لكن هذا مش معناته ان سيارتي ما تستحق او انها ليست أفضل في مجمل الأمور (الـ GS كانت تشكل حلم وتحقق ولي معها قصة عشق وحب وغرام بالنسبة لي ولله الحمد وانا كانت لي نظرة أخرى) .. نعم هناك بعض الفوارق، لكن دعوني اعلنها بكل وضوح وصراحة ، اللي ما عنده مبلغ اللكزس ، لا يغلب (يتعب) نفسه و عمره ويتسلف ويدفع أقساط ويكسر ظهره .. الخ من اجلها ، ترى الشغلة ما تسوى (حديد) وانا اخوكم ومب لذيك الدرجة والفارق اللي ممكن البعض يتصورها .. الأوريون والأفالون يكفون و يوفون وبتحس انك راضي (نفسيا) و ضميرك مرتاح عن اللي دفعت من أجله .. و أسالوا مجرب .. وهذا ما يمنع اني افكر فيها وبقوة في المستقبل (عند الزواج ، وتكوين اسرة) فهي سيارة تستحق الإقناء حقا وتناسب الأسر والمتزوجين بشكل مذهل .. والأفالون حاليا تمتعني ونستني مرارة فقد معشوقتي الـ GS وكانت البديل الأمثل ..



في الختام .. عيني عليكم باردة .. بارك الله في سياراتكم يا راعيين الأفالون الرهيبة والله يعطيكم خيرها ويكفيكم شرها وما عليكم من كلام الحساد والكارهيين و أعداء النجاح والخير (بعض شلة/جماعة نيسان وهوندا وطختهم ) المتصيدين في الماء العكر .. و تذكروا دائما المثل الشهير، اللي ما يطول العنب يقول حامض .. واللي ما يعرف الصقر يشويه ..

واسمحولي بهذا التعبيير ..
الشيخة أفالون هي سيدة السيارات في الطريق ..

اسمحوا لي على الإطالة وشاكرلكم القراءة ..

تحياتي
ليكزي

[أبـو خـالـد]

عيني عليك بارده ...
تقرير جبار ...
و بصراحه شهادة نعتز بها للافالون ..
و شهادتنا فيها مجروحه ... بس السيارة ما يختلف عليها اثنين ..
بس الشباب يناقشون ادق التفاصيل الي تغيب عن الكثير عشان كذا الي يطلع على مواضيعه يتوقع ان بالسيارة خراباات قوية ..

[كامري مجنونة]

ماشا الله عليك

تقرير ولا اروع

تسلمــــ ,,

[وااوأفالون]

ماشاء الله عليك إخوي


مشكورررا على تقرير

[الحـ(درب)ـب]

والله من اهم الأسباب اللي خلتني مأرد بها المنتدى

كثر ذم السيارة

والله انا اشوفها اكثر من رائعه
ورخيصة

بس الشباب طاحو فيها طيحة
كلامك عجبني بس مستغرب من الرجة اللي بزجاج
غريبة
جزاك الله خير

[المهذب]

أولاً : ما تشوف شر إن شاء الله
في الحديد ولافي العبيد
ثانيا : الأخ الغالي درب الحب تكلم بما كنت أريد الكلام عنه تماما "القلوب عند بعضها" من تغيب عن المنتدى لكن رجعتي كانت موفقه بهذا التقرير المميز لك مني كل التحيه والتقدير

المشاركة الأصلية كتبت بواسطة الحـ(درب)ـب

والله من اهم الأسباب اللي خلتني مأرد بها المنتدى

كثر ذم السيارة

والله انا اشوفها اكثر من رائعه
ورخيصة

بس الشباب طاحو فيها طيحة
كلامك عجبني بس مستغرب من الرجة اللي بزجاج
غريبة
جزاك الله خير

[العدا]

مشالله عليك ما خليت شي
تصدق بعد تقريرك حبيت السياره زياده رغم عشقي لها
تسلم حبيبي

[الحـ(درب)ـب]

المهذب وانا بسبب هذا التقرير حطيت اول رد

وصدقني اني كل يوم اشوف المنتدى واتحسر عليه
1. اسأله مكرر بشكل فضيع ( عجز بعض الأعضاء الجدد عن البحث بأرشف منتدى الأفالون)
والمشكله ان ابوفيصل نزل موضوع شامل وكامل عن اي سؤال بالأفالون بس كأنهم مايبون يتعبون.
2. ذم السيارة بشكل فضيييييييييييييع ( سيارة ضخمة بسعر رخيص ، لاتقولو مش رخيص الكامري صار سعرها 84.000 الف) وقطعوها تقطيع كأنها يارس ودافعين فيها 150.000.

بس على العموم
مايهزك ريح يامركبتي الأفالون مايهزك ريح

[جوزيف]

هذا الكلام

يعطيك العافيه بعدد كل حرف في المنتدى


ودمتم

[اسير الذكرى]

مــن اجمـــل المــواضيــع في المنتــدى

أســـلـوب رائـــــع فــي الكتـــابه

وطبــعــا الأفــالــون سيــارة تويوتا الأولى

وانــا قبــل فتــره نزل موضوع الأفالون مظلومه

يعطيك الف عافيه اخي ليكزي على الموضوع القيم

[طلقة الافلون]

يعطيك الف عافية يا اخ ليكزي وما قصرت وهذا فخل لنا علي شهاتك لسيارة