[مالقيت أسم]

السلام عليكم ورحمة الله وبركاته

أول شي أشكركم بصراحة على نصايحكم وتوجيهاتكم

الي بصراحة وبدون مجالمة استفدت منها الكثير

ما أطول عليكم


أنا شريت كامري 2008 glx تقريبا قبل شهرين

ولكن ماكانت هي كامري الي اسمع عنها


أول شي

أني اذا مشيت 140 أحس أني ما أقدر أسيطر عليها

أحس انها تلعب فيني والله

وديتها للصيانه قالوا مافيها شي

بعدها تقريبا بيومين خرب الحساس وغيروه لي بعد مرمطة اسبوع كامل

ولا بعد لون الحساس فضي وانا سيارتي اللون الجديد الي مائل للذهبي


وتقريبا يوم مشيت عليها 5000

صار الفرامل يطلع صوت كأنه الفحمات مخلصه

رحت وديتها لمهم

قالي المصري حق الصيانة هذا طبيعي الصوت !!

أي طبيعي أحس الهوب انكسر وتقول طبيعي

ولا بعد وش يقول

يقول لو الخراب من الفحمات أنت تتحمل قيمتها .. حنا مالنا دخل !

غير هذا

المكيف صار يطلع صوت !

اذا شغلته أحس أني راكب حراثه !!

المهم صلحووه بعد ماجلست عندهم يومين


أنا الي حاب استفسر عنه

هل كل هذا طبيعي وبكل الكامري ؟؟؟

أسف على الاطاله

[كمورة القمورة]

انا مانا فاهم وش الي صاير في المنتدى

سبحان الله

[-فارس-]

سمعت طلال مداح يوم يغني مقادير

طال عمرك بعد اللي صار معي في سيارتي اكتشفت شي مهم جدا

الكامري الشكل الجديد مثل البطيخه

ياتجي زينه وبدون مشاكل يا تجي كلها مشاكل

وانت وحظك بس انصح الشباب بعد كذا اللي بيشتري كامري ياخذها على السكين

وتحياتي للجميع

[ياسر الكاسر]

غريبه والله انا الحمدلله شاري الكامري لي 3 اشهور ولا فيه احسن منها
وبعدين الي يبي يشتري كامري موديل 2008 ولا 2007 يايطيح بواحد زين او يطيح بواحد كله خربات
الله يعينك

[نبضي الكامري]

ليش لا كل شي جايز والله يعينك ..

إذا فيها عيوب بيعها مدامها بأول 3 شهور وشف لك سياره بدل منها

[عاشـــق اللاند]

والله شي غريب جدا جدا الله يعينك

[أوريون الطائف]

والله شي غريب اخوي

اللهيكون بعونك يارب

تقبل مروري

[مالقيت أسم]

أشكر كل واحد بأسمه يالغالين

والله يعيني ويعينكم

وصدق الي قال ان الكامري الجديدة مثل البطيخه ياتجي زينه كلها ولا كلها ماتنفع !

[الحيمود]

انا عندي كامري 2008 والحمد لله 100%

[راعى فله]

انا عندي كامري 2008 والحمد لله 100%

[المخلص للكرولا]

وانا مع اخوي فاااااااااااااااااارس على السكيييييييييييييييييييين

[كمر اركب ياقمر]

من وين انتم تشترون مواتركمـَ هههههههههه
الحمدلله الي عندي تمام بسم الله عليها
ماشاء الله

[أبن الرياض]

الحمد لله الوضع عندي تمام ما فيه أي مشاكل

كان الله بعونك ,,,

[أسير كامري]

أنا أذكر أول ماشريت موتري 2006 طالع به على الدائري

وأسمع صوت من عند الكفرات واقول شكله طبيعي ******** يلعب على نفسه وده يتهنأ

لكن فعلا صوت صرصرة مع المطبات وصلحتها على الضمان بعد محاولات

وبيني وبينك ياخراب وعيوب مصنعية أوأنها فيها عين والعين حق وأنا أخوك

وتأكد وشف وضعك ,,, وموفق إن شاء الله .