[هامور ازرق]

السلام عليكم ورحمة الله وبركاته
يسرني الانضمام لمنتداكم والاستماع لنصائحكم وبارك الله فيكم

اولا انا مريت بتجربة مريرة مع فورد اكسبلور الموتر خدمني اربع سنوات ومريح جدا ولكن عندما بداء يطلب ذبحتني اسعار الوكيل المحتكر
عموما بعته والله يبارك بمن شراه
انا معي الان حدود 50000 ريال وارغب بشراء فورتشنر Gx من الوكاله او احد الموزعين وراح ادفع الفرق تقسيط
وانا راعي خطوط مو بر نادرا طلعاتي للبر الا وقت الربيع
فهل فورتشنر Gx مريحه بالخط وانا عائلتي خمسه كلنا الله يخليهم والشغاله السادسه
يعني هل توجد مرتبه ثالثه
سامحوني بكثرة الاسئلة بس ماعندي خلفية عن الموتر وانواعه
وانتظر نصيحتكم وشكرا لكم

[الرحــــــال]

المشاركة الأصلية كتبت بواسطة هامور ازرق

السلام عليكم ورحمة الله وبركاته
يسرني الانضمام لمنتداكم والاستماع لنصائحكم وبارك الله فيكم

اهلا وسهلا اخوي وحياك الله
اولا انا مريت بتجربة مريرة مع فورد اكسبلور الموتر خدمني اربع سنوات ومريح جدا ولكن عندما بداء يطلب ذبحتني اسعار الوكيل المحتكر
عموما بعته والله يبارك بمن شراه
كيف الاكسبلورر انا محتار اشتريه ولا اشتري الفورتشنر
انا معي الان حدود 50000 ريال وارغب بشراء فورتشنر Gx من الوكاله او احد الموزعين وراح ادفع الفرق تقسيط
وانا راعي خطوط مو بر نادرا طلعاتي للبر الا وقت الربيع
فهل فورتشنر Gx مريحه بالخط وانا عائلتي خمسه كلنا الله يخليهم والشغاله السادسه
يعني هل توجد مرتبه ثالثه
انا انصحك تصبر وتشري vxلانه افضل سواء بالمميزات وكذالك المكينه
وبالنسبه للراحه انا اعتبركل السيارات مريحه لان معي هايلكس
وبالنسبه للمرتبه الثالثه موجوده وبامكانك ان تسفطها وتكفي عايلتك الله يحفظهم
سامحوني بكثرة الاسئلة بس ماعندي خلفية عن الموتر وانواعه
وانتظر نصيحتكم وشكرا لكم

لاكثرة اسئله ولاشي بس زي ماقلت لك احرص علىvxوان كان الميزانيه ماتكفي فـGxمش بطال

[هامور ازرق]

شكرا اخي الرحال على نصيحتك
بالنسبه للاكسبلور ان شريته جديد راح يخدمك لاربع او خمس سنوات حسب استخدامك
بس يجب عمل الصيانه الدورية له وهذا امر مكلف
ومن اكبر عيوبه ان اغلب الورش لا يعرفون اصلاخه لانه كله كمبيوتر ومرتبط ببعض مما يضطر ادخاله الوكاله وخرد الفلوس
حساس القير دائما يخرب
نصيحتي ابتعد عن الفورد اكسبلور لان سعره زي سهم المواشي نسب تحت عندما ترغب بيعه
تحياتي

[الرحــــــال]

يعطيك العافيه اخوي هامور ازرق (لوتحط معاه ابيض يطلع تمام هههه)

والله يرزقني وياك بالفورتشنر السنع

[هامور ازرق]

اخي الرحال الازرق الخارجي مع قلوبنا البيضاء تطلع اللي في بالي وبالك
بس انا محتار بين VX و GX
من جهه ماودي اضغط نفسي ومن جهه اخاف الفراق كبير بينهم وانا ادور المريح بالخطوط

[الرحــــــال]

وانا اخوك اجل توكل على الله وخذلك GXدبل والله ييسرلك

[أبو خالد الشريف]

بس أغلب المعارض يقولون مافي دبل غير متوفر المتوفر الدفع الثنائي

[أبـــو عـــزام]

والله وأنا أخوك ترى فيه فرق كبير في المركب بين الفورتشنر والاكسبلور لصالح الاكسبلور

لكن إنكانك رجال ما يهمك وتبي أهم شيء سيارة عملية ولا تقول كل يوم ودني أهلي وودني السوق

فالفورتشنر خيار ممتاز وقوي وأنصحك بتجربته قبل شرائه

الله يوفقك بالسيارة الزينه

سلام

[قويدارد]

من واقع تجربه لفورد اكسبلورر لمدة سنتين كامله
انواع المعاناه والمشاكل مع هالسياره وخاصه بعد 5 سنين او 150 الف كيلو
كل شهر تقريبا السياره 3 ايام في الوكاله وبدون اي نتيجه
الدفرنس يحتاج توضيب, السياره عزمها طايح ومكتومه ، الدينمو غيرناه والشداد غيرناه البخاخات وتنضفت الصراحه خلال سنتين صرفت عليه حوالي 12 الف ريال صيانه فقط وبدون نتيجه

واليوم الحمد لله الله عوظني بالنمر 6 سلندر VX2 والحمد لله

[هامور ازرق]

شكرا اخي ابو عزام حقيقة انا جربت فورتشنر GX ولم يروق لي كثيرا بيني وبينك كانك تقود هايلكس بس مرتفع اما فورتشنر vx فلم اجربه بعد فان كان مثل gx فسوف اصرف النظر عنه تحياتي

[هامور ازرق]

اخي قويدارد فعلا الاكسبلور عندما تطلب ماترحم وخسرت عليها حروت العشرة الاف واتعبتني ويهمني رايك حيال فورتشنرvx هل هي مريحه وراسيه وهل المواصفات الخليجيه تختلف كثيرا عن عبداللطيف جميل تحياتي

[أبـــو عـــزام]

gx نفس vx في المركب وكلها إذاً في نظر هايلكس اللهم الفرق في بعض المواصفات الرمزية وقوة المحرك.

لكن مثل ما قلت لك (تشتري السيارة ولا تشيل هم) لا ورشة ولا وكالة بإذن الله إذا سلمت من الحوادث أو الاستخدام الخشن مع ان الفورتشنر يتحمل الاستخدام الخشن.

الله يوفقك والجميع

سلام

[هامور ازرق]

مشكور اخي ابو عزام والله يجزاك خير