[ابوقحط]

السلام عليكم ورحمة الله وبركاته

اخي الكريم ودي اسالك وجميع العارفين عن الفورتشنر في الجنوب

كيف سوقه وهل هناك اقبال على شرائه

انا من الجنوب لكن رحت في الصيفيه اللي راحت ولا شفت له انتشار كبير

وهل الناس يحبون العادي والا الاوتوماتيك

انا ودي اشتري عادي اربعه سلندر وعندي بناء وودي لو احتجت الفلوس ابيعه

بس هل يطيح سعره كثير والا لالاللللللللللللللللا

شاكر لكم مروركم

لامانع من مشاركة الاعضاء الاخرين

[أبو سرور]

يعني كرشه ************ ههههههههههه



من ناحيه أنه يطيح هذي شلها من راسك ..!!

التويوتا بشكل عام ما يطيح في سعره ..

وبالجنوب خذ لك عايدي لانه طلعات ونزلات يبيلك تعشق كل شوي عشان العزم




الله يختار لك الخيره

[الخاطوف]

هلا اخوي
في الجنوبي غير القير العايدي لاتدور اما عندك في الرياض توماتيك

تقبل تحياتي الخاطوف

[أبـــو عـــزام]

استغرب أنك ما شفت للفورتشنر انتشار في الجنوب

لأن اللي أعرفه أنهم هابين في الموتر بقوه وهو مرغوب جداً لديهم

عموماً يا ليت 6 سلندر لأنه أرغب عند البيع وكلهم فيهم بركه

وأكيد مثل ما قالوا لك الأخوان القير عادي وترا التماتيك فيه قوة ويمشيك هناك بس على 6 سلندر

وإن شاء الله أخوي جنوبي ما يقصر معك ويفيدك بتفاصيل أكثر

الله يوفقك والجميع

سلام

[ابوقحط]

مشكورين اخواني الاعزاء
ابو سرور لا كرششششه ولا شي ههههههههههه شاكر لك مرورك
اخوي الخاطوف العادي مثل ماقلت زين في الجنوب والمشكله العمل في الرياض وتعرف الزحمه وانا مليت من العادي ولكن شكل القير الاوتوماتيك في الفورتشنر مش خاش مزاجي يعني ودك يعدلون فيه شوي ويكون منسق زي الاند على الاقل او البرادو
اخوي ابو عزام هل يعني الاربعه سلندر يكون ثقيل بعكس السته سلندر

الصراحه ماجربت سته سلندر ياباني من قبل

شكرا للجميع

[يالله من فضلك]

المشاركة الأصلية كتبت بواسطة ابوقحط

وانا مليت من العادي ولكن شكل القير الاوتوماتيك في الفورتشنر مش خاش مزاجي يعني ودك يعدلون فيه شوي ويكون منسق زي الاند على الاقل او البرادو

أما ذي صعبة شوي اسمحلي
أحلى ما في النمر قيره الأوتو شكل غير طبيعي كأنه قير لكزس
أما البرادو بصراحة ما تدري هو عايدي ولا تماتيك حاطين هالعصا اللي تقول عصى مكنسة

وفي النهاية ترى الناس أذواق وآراء
وتوكل على الله

[جنوبي وجنوني]

اخي الكريم ودي اسالك وجميع العارفين عن الفورتشنر في الجنوب
اهلاً وسهلاً اخوي ابو قحط حياك الله ومرحبا الف
كيف سوقه وهل هناك اقبال على شرائه
انا والله ساكن بجدة يعني اروح لهلي بابها من مرتين الى ثلاث مرات في السنة ولا اعلم عن سوقه هناك ولاكن عامة تويوتا شيك وين ما رحت سند لك بعون الله .
انا من الجنوب لكن رحت في الصيفيه اللي راحت ولا شفت له انتشار كبير
نعم كلامك صحيح انشارة قليل جدا والسبب لقلة الفورتشنر واقبال الزبائن عليه بكثرة بجدة والرياض وهي المدن الاساسية مما يسبب قلة في توفيرها للمناطق الجنوبية .. مكة والمدينة والمدن الاخرى ليس متوفر لديهم بكثرة مثل جدة والرياض وطبعا 2006 - 2007 السيارة ما انتشرت واثبتت وجودها بقوة الا في عام 2008م واذا تقصد بان ليس له اقبال بالعكس له اقبال جدا كبير خاصة اهل الشمال لان السيارة صراحة سيارة تطعيس اكثر من اي شي في المهام .. واهل الامارات لديهم الفورتشنر منتشر انتشار جدا كبير.

وهل الناس يحبون العادي والا الاوتوماتيك
لا العادي
انا ودي اشتري عادي اربعه سلندر وعندي بناء وودي لو احتجت الفلوس ابيعه
لا تاخذ اربعة سلندر دفع خلفي خذ دفع رباعي حتى لو تبي تبيعه يجيب لك مبلغ حلو
ولدي ملاحظة في الاربعة سلندر في المناطق الجنوبية وهي .. بما ان الاكسجين قليل بسبب ارتفاع المنطقة الجنوبية عن البحر يسبب ضعف في عزم السيارة جدا والمروحة هي اتوماتكيه يعني يطلع صوتها وتمشي مسافة ويختفي لانها اتوماتكيه ولاكن في الجنوب ما تفصل وتسبب ضعف جدا قوي في السيارة وصوت المروحة جدا عالي ومزعج ولا انصحك بان تاخذ اربعة سلندر نهائي الاربعة يصلح اكثر شي في المناطق الساحليه صدقني راح تكره الفور تشنر لو تاخذ اربعة سلندر .

بس هل يطيح سعره كثير والا لالاللللللللللللللللا
اخي العزيز اذا مشيت الف كيلو بس ينقص من سعره ما يقارب 8.500 ثمانية الاف وخمس مائة ريال واحسب كلما مشيت اكثر كلما نقص سعره

وتقبل مروري ابو قحط ..؟

[ابوقحط]

اخي العزيز جنوبي جنوني

اشكرك شكرا جزيلا انت وجميع الاخوان

وكفيت ووفيت

لكن بصراحه اليوم بعد صلاة العشاء رحت انا وزميلي اللي طلع الفورتشنر العادي 2008 اربعه سلندر وخلاني اجربه

بصراحه الموتر كفو في ارتفاعه وفي رزانته على الخط لكن يااخي صوت المكينه تقول انها معك في الغماره

والقير العادي يااخي ماادري تحس ان دعسة الكلتش خفيفه والقير تعشيقته سهله ماادري هو شي عادي في اي سياره جديده

المهم انا لازلت محتار بين يوكون وفورتشنر

والله ولي التوفيق

[جنوبي وجنوني]

ابو قحط ارجوك لا تفكر في الاربعة سلندر والله اني يوم بعد يوم ازيد كره للأربعة سلندر اما اذا بتاخذ الاربعة لا ولا ولا خذ اي سيارة ثانيه هو بس لو يزودو عدد الاحصنه كان كلام ثاني بس 158 حصان والله مو سيارة على حجمها واذا بتاخذ ستة سلندر لا تشاور لا يوكون ولا غيره خذ الفورتشنر بس ابعد عن الاربعة وانا ذكرت لك لو انك في منطقة غير الجنوب لا خذه ما في مشكله بس يخوك ثقيل مررة ما ينفع حق طلوع .؟
افضل شي الاربعة في الطعوس مع الدبل لان فيه عزم مو صاحي وخفيف قسم اني اطارح سيارات ستة سلندر وثمانية سلندر لانه من جد سيارة طعوس وبر بس تفصل الدبل قسم انه هبل ما ينفع ..؟
هذا راي

[غظنفر]

ابو قحط الله يسلمك انا عندك في الجنوب (خميس مشيط) ويوم شريت السياره جتني من تبوك يعني ان الوكيل اليحيا ما يوفره بكثره.
الشي الثاني انا موتري 6 سلندراتوماتيك واذا تبي تجربه انا حاضر

[الخاطوف]

هلا اخوي اب قحط
اخوي جنوبي جنوني ماقصر بس ودي اقول له ان سعر اي تويوتا مايطيح مهما كانت مواصفات السياره
اما تقول ان السياره كل ما تمشي 1000 ك يطيح 8500 عادي هاذي ماتجي يعني انا سيارتي شاريعا با 74ابيعها ذلحين با با ابيع السياره با 22 لاني ماشيت 33 الف كم بالله صحح المعلومه

[شيخ الصحاري]

المشاركة الأصلية كتبت بواسطة جنوبي وجنوني

ابو قحط ارجوك لا تفكر في الاربعة سلندر والله اني يوم بعد يوم ازيد كره للأربعة سلندر اما اذا بتاخذ الاربعة لا ولا ولا خذ اي سيارة ثانيه هو بس لو يزودو عدد الاحصنه كان كلام ثاني بس 158 حصان والله مو سيارة على حجمها واذا بتاخذ ستة سلندر لا تشاور لا يوكون ولا غيره خذ الفورتشنر بس ابعد عن الاربعة وانا ذكرت لك لو انك في منطقة غير الجنوب لا خذه ما في مشكله بس يخوك ثقيل مررة ما ينفع حق طلوع .؟
افضل شي الاربعة في الطعوس مع الدبل لان فيه عزم مو صاحي وخفيف قسم اني اطارح سيارات ستة سلندر وثمانية سلندر لانه من جد سيارة طعوس وبر بس تفصل الدبل قسم انه هبل ما ينفع ..؟
هذا راي

جنوبي جنوني

شينت الموتر في عيني

أنا توني شاري 4 سلندر وباقي شوي ويطيح من عيني

راع مشاعر أصحاب ال4سلندر

[جنوبي وجنوني]

المشاركة الأصلية كتبت بواسطة الخاطوف

هلا اخوي اب قحط
اخوي جنوبي جنوني ماقصر بس ودي اقول له ان سعر اي تويوتا مايطيح مهما كانت مواصفات السياره
اما تقول ان السياره كل ما تمشي 1000 ك يطيح 8500 عادي هاذي ماتجي يعني انا سيارتي شاريعا با 74ابيعها ذلحين با با ابيع السياره با 22 لاني ماشيت 33 الف كم بالله صحح المعلومه

هلا اخوي الخاطوف انا ما قلت كلما تمشي الف تنقص اجل في الاخر بتبيعها بلاش ههههههههههههههههه لا لا اخي مو بكذا المعادله
انا اقصد ان السيار لو تشريها جديدة وعلى طول تبيعها خمسة الاف تنقص من القيمة اذا مشيت 1000 الف راح تنقص 8500 ريال وانا اقصد بكلامي انه اذا يبي يشتري ويبيع على طول وذا مو من راسي جايبها انا لا اخي من السوق اما كلما مشيبت الف تنقص لا لا الله يسلمك ولا يسمنك يا خاطوف .. في فور تشنر قيمة 102500 ماشي الف وعليها كم كيلو .. يبي الشريطي فيه 94000 الف يعني كم قص من سعره 8500 .. وذا شريطي يعني بكم شراه من صاحبه الاصلي الله اعلم ارجو ان تكون فهمت اخوي الخاطوف
.؟
طيب فور تشنر 2006م ماشي 59 الف VX1 طالب فيه صاحبه 72 الف سعره جديد 95 الف يعني خلال سنتين نقص 23 الف يعني خلال سنة نقص 11500 الف والشغله هي معادلة وتصب في مصلحة نظافة السيارة والكيلو متر التي تقطعها اتمنى انك فهمت علي اخوي ...؟

[ابوقحط]

اخوي جنوبي جنوني والله انك صادق
بصراحه غيرت رايي عنه يوم هو اربعه سلندر لكن خلني اشوف لي واحد من الشباب عنده سته سلندر
اخوي الغالي غظنفر والله انا مكاني بعيد منك لكن اذا جت الصيفيه يصير خير
اخوي الخاطوف انا رايي من رايك ممكن ينزل سعر السياره 4 او 5 الاف ريال عن السعر الاصلي
اخوي شيخ الصحاري لاتندم على شريتك للموتر توكل على الله ولا يضيق خاطرك.

شاكر لكم مروركم

[جنوبي وجنوني]

المشاركة الأصلية كتبت بواسطة شيخ الصحاري

جنوبي جنوني

شينت الموتر في عيني

أنا توني شاري 4 سلندر وباقي شوي ويطيح من عيني

راع مشاعر أصحاب ال4سلندر

اخي كلامي مو يعني مو بزين الاربعة سلندر وقسم انه رايع وممتع اخي الجيوب عامة طبعها تكون قويه وجبارة مو مكينة هايلوكس 158 حصان بس مع الوقت راح تتذكر كلامي اخي انت والخاطوف والله اني بعد ما شريت سيارتي بثلاثة اشهر اكتشفت ان مكينتها 158 حصان ومكينة هايلوكس والله مو زينة على الفورتشنر الامير بس اذا بتقول فورتشنر قول ستة سلندر وبس .. ؟