[ذيب دبي]

السلام عليكم جميعا

لما رحت اخر مره اسوي سيرفس لي سيارتي قالي مهندس الصيانه,انه في عرض عندهم حق تشميع السياره يلي يحمي السياره من الخدوش ومن اشياء اخرى وضمان 3 سنوات, لما سالت ربيعي قالي مايحتاج اصلا في اليابان مسوين عليها هذا التشميع وانا بصراحه محتار اسوي ولا لا..

[بو^^جاسم]

من وجهة نظري ،، ماله أي داعي

خلك ريلاكس و طبيعي مع الموتر ..

[م ع ي جي إس]

ما أدري ممكن ما تكوون فعاله مثل ما يقولون و ما أحس إنها في ذاك الأهميه .

تقبل مروري

[ليكزي]

صادق ربيعك ومعاه حق يا ذيب دبي ..

و مادري ايش اقولكم مع احترامي وتقديري وحبي لكم

اللي يقولي بركب عازل حراري ..!!
تعليقير: اولا، السيارة فيها نسبة عازل حراري معين جاي من المصنع في اليابان .. غير انه العازل قد يؤثرعلى لاقط نظام الملاحة او مستشعرات السيارة او هوائي الراديو ..الخ .. فما له داعي كبير .. (لاحظ قلت يؤثر مو يوقف عن العمل) ..
و اللي يقولي بغير الجنط مادري الكفر يطلع صوت ..!!
تععليقي: هذا هو الكفر و الجنط المعتمد للسيارة ، وتغيرهما (قد) يؤدي الى خلل الأنظمة او عدم عملها بصورة صحيحة او يقل ثبات السيارة .. الخ حسب تحذيرات وارشادات دليل المالك ، وبعدها لن تلوم(ن) الا نفسك ..!!
واللي يقولي في تنسيم وصوت من مدري وين ..!!
تعليقي: ياخوي، خذ الأمور ببساطتها "تيك ات ايزي يا عزيزي" وبلاش وسوسة و تحسس وتركيز كثير .. خل عنك هالسوالف ، كل شيء اوووكي ..
والل يقولي ابي اسوي تشحيم للسيارة ..!!
تعليقي: السيارة Already فيها تشحيم من المصنع .. لا تخاف يبا ..
و اللي يقولي متى ابدل الزيت والفلتر ..!!
تعليقي: السيارة فيها كمبيوتر وشاشة صغيرة في لوحة العدادت .. شفتها ؟! هذه طال عمرك تخبرك و تحذرك بكل شيء وكل صغيرة وكبيرة في السيارة ، ما عليك و لاتحاتي، وللمزيد راجع دليل المالك ..
واللي يقولي بركب الفلتر مادري الاكزوز الفلاني ..!!
تعليقي: باختصار، تبي تخرب و تأثر على السيارة ركب ..!!

و غيره

طبعا انا ما اقصد حد معين ، لحد يفهمني غلط او يسىء ظنه فيني
الا بالعكس، هذه المواضيع المتكررة دائما عن لكزس والبي ام ومرسيدس والسيارات عموما ..
و للأسف انها الأكثر تكرار للسيارات الفخمة ، اللي دافعين فيها مبلغ وقدره ...

يا أخوان ، الله يرضى عليكم ..
يجب ان تعلموا وتخلوا في بالكم ، بـانكم دافعين مبلغ محتر جدا و مب سهل أبدا في اللكزس "كل اللكزس، ما اقصد سيارة معينة" أو حتى اي سيارة فخمة ..

يعني الجماعة عارفين ايش يعملوا، وكيف يصنعوا شي محترم فعلا و مجهز لكل الضروف والحالات و العوامل تقريبا .. يعني عاملين حساب كل شيء ، السالفة مب سبهللة ..

انا الصراحة ، عن نفسي .. مرة قريت اعلان في الجريدة عن تشميع السياره ، وكان ودي اعملها بصراحة في سيارتي ظنا و حرصا و خوفا مني للحفاظ على السيارة التي اعشقها لأطول فترة ممكنة .. يعني كنت مثلكم بالضبط .. لا وبعد الإعلان كان مرتب و متعوب عليه و فيه صور سيارت غالية جدا مثل لمبرجيني و فيراري و آخر صورة كانت لـ اللكزس فورويل الجديد (والله ماكذب عليكم) ..

لكن لما جيت اكلم الوالد العزيز - الله يحفظه - و طرحت عليه هالفكرة .. توقعت انه بيوفق ويرحب بالفكرة، لكن شفته لا والله ، قالي كلام بما معناه انه هذه يا يبا كلها الاعيب و (قص) على العالم وضحك على الذقون ، لأستغلال (جيب/مخبا) وجذب أصحاب القلوب الضعيفة والعقول الخفيفة ( وما أكثرهم في بلادنا الخليجية وللأسف) ..!!

و ايضا قال ان لو سيارتك (فورويل مثلا) ودائما طالع عالبر او ان جونا كله رياح وأعاصير و اراضينا كلها رمل وحصى هههه ، كنت راح اقولك سو وتوكل على الله ، لكن هي مالها داعي في النهاية يا يبا وخاصة اننا نتكلم عن سيارات فخمة وسعرها مب قليل ابدا ..

الوالد ما شاء الله عليه انسان محنك و حكيم ذو تجربة وخبرة وهو رزين و كبير في السن ، فـ ما تمشي عليه هاللاعييب و ما ينضحك عليه بهالسهولة .. الله يخليه ان شاء الله ، دوم استرشد واتعلم منه .. وما يقصر الوالد ..

علما باني لما تصلت في المحل قالي سعر التشميع حوالي 3000 ريال يعني مب شوية بعد .. اصبغ لي الصدام الأمامي كامل ابرك بس مادري كم سعر الصبغ ههه .. بس على فكرة، قبل ما يعطيني السعر، سألني عن نوع السيارة بالضبط .. فانا اعتقد بانه كل ما زاد سعر السيارة ، زاد سعر التشميع مع ان المادة واحدة ---******** شوفوا النصب على اصوله كيف ؟!

اتمنى انه محد يزعل واحنا حاضرين لكم ان شاء الله .. بس هذي حزت في خاطري بصراحة ..
مافي احسن من حالة الوكالة خاصة الامور الفنية والميكانيكية والكهربائية .. صدقوني ..

و احنا هنا في الدوحة وفي الفحص الفني يبان كل شيء ولازم تعيد كل شيء تقريبا لحالة الوكالة .. والا تعتبر راسب .. لا حتى زينون ولا مخفي "تظليل" ولا ما يحزنون .. و التزويد يمكن عليه عقوبة وغرامة حتى .. الرادارات في كل مكان .. والقوانين و الغرامات صارت كبيرة جدا ومشددة و صارمة وما ترحم ابد ومافي تهاون في هالمسائل كما في السابق ..

حياكم الله

اسمحولي على الاطالة كالعادة ..

تحياتي
ليكزي