[وبعدين معكم]

السلام عليكم

السيارة عندي توني مطلعها 2008 ما كملت 3 اسابيع تقريبا, وعندي وحده من السماعات الي في باب السائق لما اشغل السي دي او الراديو واحط الصوت من 38 وطالع يطلع صوت منها زي الخرفشة, يعني كأني السماعة مخروقة(مثقوبة) وكل ما رفعت الصوت زاد الصوت بشكل واضح, صراحة زعلت وانقهرت قلت لا لا مو معقولة لأن النظام الصوتي في سيارات لكزس معروف وقوي ما شاء الله ما يحتاج بس لو يحطون اوفر يا شيخ تحس انك في ديسكو بس ديسكو طبعا شخصي مصغر (اعذروني على التشبيه), فيه احد حصلته لي نفس المشكلة؟

وكم اقصى حد الصوت المفروض ما تتعداه والا شو السالفة؟

بصراحة مو مصدق السيارة لسى جديدة ما مشت شي.. اهيئ

يا ليت تفيدوني والف شكر

[رااايـــق]

يعني كأني السماعة مخروقة(مثقوبة)

احتمال وارد واحتمال وسوسه خخخخخخخخخ
ممكن تطلب منهم يشيكون عليها في اقرب موعد صيانه

اعرف واحد من الشباب واجه نفس المشكله في es350 وغيرو له السماعات كلها وانحلت المشكله ومجانا على الضمان

بس لو يحطون اوفر يا شيخ تحس انك في ديسكو بس ديسكو طبعا شخصي مصغر

من قالك ام مافيها اوفر

لعلمك is 300 فيها 2 اوفرات واحد بالطبلون الامامي وواحد بالخلفي وعليها سراوند مو طبيعي

وجهة نظر ان النظام السمعي في الاميره ماعليه غبار وتزيع الصوت والسماعات افضل مان باقي السيارات .... وبعدين لا تستهون في الشركه المصنعه للنظام السمعي ترى الشركه قويه مررره ولها سمعتها

عموما يمكن انت عندك مشكله روح الوكاله وربك يحلها

[وبعدين معكم]

الاخ رااايق

الف شكر على ردك وشررررررفني مرورك, بس ترى صدق فيه صوت مو قصة وسوسة لأن كذا واحد ومعاهم لكزس ركبوا معي وقلت لهم اسمعوا والصوت واضح , واحد منهم قال شل الكيس الي على الباب ويروح شلته ونفس الشي
عموما ان شاء الله صيانة 5000 اقول لهم على الصوت وان شاء الله تنحل

مرة ثانية الف شكر على ردك وعلى المعلومات الي ذكرتها وان شاء الله محد يواجه المشكلة الي واجهتها

بس عندي استفسار الصوت اقصى شي 62 عادي لو استمعت الاغاني على المستوى هذا لأن اخوكم يحب يسمع الاغاني عالية اذا صار وحده, بس اوصل اشارة اقصر عليه خخخخخخخخخخخخخخخخخ

[جدة هوست]

أنا بالنسبة لي 50% الصوت على 62 (max) وعادي ما واجهت اي مشكلة

[حسينوو]

اطلع الوكالة يغيروها لك اكيد فيها خلل السماعه

[وبعدين معكم]

المشاركة الأصلية كتبت بواسطة جدة هوست

أنا بالنسبة لي 50% الصوت على 62 (max) وعادي ما واجهت اي مشكلة

ما شاء الله, ولا اله الا الله .. والف شكر على ردك الله يعطيك خيرها ويكفيك شرها وتشوف عليها السعد ان شاء الله

شررررررررفني مرورك والف شكر

[وبعدين معكم]

المشاركة الأصلية كتبت بواسطة حسينوو

اطلع الوكالة يغيروها لك اكيد فيها خلل السماعه

شرررررررررفني مرورك والف شكر على الرد

[الونسو]

ممكن تخبرنا ايش صار على موضوع السماعة، هل الوكاله وافقت على تبديلها لك؟

[وبعدين معكم]

المشاركة الأصلية كتبت بواسطة الونسو

ممكن تخبرنا ايش صار على موضوع السماعة، هل الوكاله وافقت على تبديلها لك؟

للحين ما وديتها الوكالة لاني ابي ادخلها مرة وحدة مع الصيانة, ان شاء الله قريب اسبوع بالكثير وبوافيك شو صار..

شرررررررررفني مرورك

[وبعدين معكم]

المشاركة الأصلية كتبت بواسطة الونسو

ممكن تخبرنا ايش صار على موضوع السماعة، هل الوكاله وافقت على تبديلها لك؟

رحت الوكالة الي في خريص, وشيكوا عليها وطلع فيها خلل طبعا, المهم دخلتها واخذتها نفس اليوم
مع صيانة 5000 كيلو, طبعا ما غيروا السماعة قال لي نغيرها على الضمان بس لازم ابروفل موافقة يعني.. المهم قلت ومتى ان شاء الله يوصل الابروفل قال لي بكره اخذت السيارة والكلام هذا يمكن من اسبوع وطبعا الى يومك كلمته من يومين وقلت وش صار قال جاء الابروفل بس باقي القطعة طلبناها لك.. قالت ما شاء الله لا ما قصرتوا (خدمة سيئة صراحة ما بسير مرة ثانية الوكالة الا اذا لا قدر الله في السيارة مشكلة, لاني اكتشفت الصيانة كلام فاضي ادفع فلوس وبس), الحين وكالة لكزس بكبرها ما فيه سماعات عندكم قال مع الاسف ما فيه طلبناها من جدة واول ما توصل ندق عليك... وطبعا ما دقوا الى اليوم وشكلهم ما هيدقوا لازم اتابع معهم...

بوافيك بالتطورات ايش صار (صار مسلسل)خخخخخخخخخخخخخ

[لكززس آي اس]

السلام عليكم

اولا مبروك اخوي على السياره وانشاءالله يعطيك خيرها ويكفيك شرها

اخوي انا عندي السياره موديل 2007

صارلها سنه ونص تقريبا عندي

من شريتها كان في مشكله بالنظام الصوتي اذا طولت على الصوت يطلع تشويش وينقطع الصوت فجأه

وديتها الوكاله 7 مرات بدلولي السماعات عن طريق الكفاله

ومره من المرات وحده من السماعات انبعث منها دخان

طبعا الوكيل عندنا الساير مو عارف شسالفه يقولون عيب مصنعي لي

اوديها لهم يصلحونها تتم شهر ولا شهرين ويرد العيب

الصراحه مليت والحين عادت نفس السالفه وما ودي اوديها للوكاله

[أسيــــــر]

السلام عليكم ورحمة الله

اخوي لكززس انا سيارتي صارت لي قبل فترة مشكله غريبه صراحة ولا ادري من ايش السبب فجأة وانا مشغل السي دي
ينقطع الصوت فجأة ولا اقدر اتحك لا في الصوت ارفعه او اخفضه ولا اقدر اغير المقطع وحتى الشاشه تتجمد عنـدي لازم اطفي السيارة واشغلها من جديد ويضبط معاي
تقريباً هالمشكله صارت لي تقريباً خمس مرات وكلها تقريباً من شهر او شهرين
ونصيحتي لك اخوي توديها للوكاله واذا ما عدلوها تقدم شكوى بأن السيارة على ضمانهم ولا عدلوا السماعات الى الحين ويمكن تطلع بنتيجة