[أبـــو عـــزام]

بسم الله الرحمن الرحيم

اليوم جايب لكم صور كنت أحتفظ فيها من فترة على الجهاز وهي عبارة عن ترهيم استبنه علاقي للفورتشنر والثانيه صوره التقطتها من معارض الشفاء بالرياض لفورتنشر 6 سلندر لونه أزرق والصورة الثالثة عبارة عن قفل للكفر الاحتياطي من شركة تويوتا.

إليكم الصور







---------------------------------------------------------------------------------------------------------



---------------------------------------------------------------------------------------------------------






أتمنى الموضوع يعجبكم

الله يوفق الجميع

سلام

[يالله من فضلك]

أهلين وسهلين أبو عزام
جزاك الله خير على الإضافات الحلوة
كعادتك دائماً

شخصياً أفضل الإستبنة العلاقي
لسهولة فكها وتركيبها
ولأن السفلية تعوقك في البر أحيانا خاصة في الجروف
وطلعات كتوف الشعبان وغيرها من الموقف
ولكن من رأيي أن كفر الفور كبير وبالتالي طالعة كبيرة مع مؤخرة السيارة

اللون الأزرق أتوقع خليجي مع إني أشوفه في مقاطع الفور الأجنبية

وقفل الكفر فكرة رائعة....شخصياً مركب قفل عايدي الذهبي القديم

مبدع دائماً
تقبل تحياتي

[فورتشنر للأبد]

تسلم يابو عزام وعلى فكرة اللون الازرق موجود عندنا

[بنت الخران]

نعم اللون الازرق موجود

واشكرك على الموضوع الرائع

[سخنشفش]

هلا

مشكور ابو عزام حبيبي الله يعطيك العافية يا بعدي


بس يالغالي ممكن تعطينا سعر القفل الي في الوكالة بكم ؟

////

الصورة الثاانية مالت اللون انا مرة شفته في البحرين بصراحة جذاااب وجاي روووعة على الفورتشنر تقول (دلفين) اذا شفته من الوجه بس بدون الدعامات السودة الربل

يالله من فضلك يالغالي لو تجيب لنا صووورة للقفل الذهبي القديم وشلون مركبه على الكفر
يمكن اسووي مثلك يالغالي اذا كان قفل الوكالة غالي ههههههههههه

انا انتكبت مرة طلعت من احد المجمعات مالقيته
ولا ابي انتكب مرة ثانية <*****< ليمن هالحين يحطه في الشنطه ههههههههههه

مشكورين يالغالين

[أبـــو عـــزام]

الله يحييكم أخواني تستاهلون أكثر وشاكر لكم مروركم

أخوي سخنشفش (أسمك صعب كتابته) والله مدري هو موجود عندنا في الوكاله أو لاء لأني جايب الصورة من مواقع أجنبية.. لكن أنت لو بتلاحظ الكرتون مكتوب عليه تويوتا يعني لو تسأل عنه يمكن تحصله عندهم.

الله يوفقكم جميعاً

سلام

[صاحب الفورتشنر]

مشكور ابو عزام على التقرير دائماً مبدع بمواضيعك
وصاحب السياره الزرقا ساكن بحارتنا هذا شريطي ويطقطق في المعارض كل يوم اشوفه بسياره شكل بس السياره هذه طولت عنده الظاهر انه بيستخدمها
تقبل تحياتي

[أبـــو عـــزام]

صاحب الفورتشنر والله أنك صادق كم مره أتردد على المعارض وأشوفه ولاحظ أنه ما يعرضه للبيع لكن يروح عليه مشاوير

طبعاً هذي الصورة قديمه قبل أسبوعين تقريباً لكن أمس العصر شفته عند معرض من المعارض اللي في الأخير بعد الاشاره على اليمين داخل الحاره قبل معرض (روعه)

الله يوفقك والجميع وشاكر لك مرورك

سلام

[الخاطوف]

هلا وغلا با مستر ابوعزام والله يا ابوعزاااااااام مبدعععععععععع
جدأ وافضل شي الفورتشينر الازرق والله رياضي وشبااااااابي وشكله فله

تقبل تحياتي اخوك الخويطيف

[متفائل بن فال]

الاستبنة العلاق تخرب شكل الفورتشنر صايرة كأنها سيارة لعبة اللي لها فرار ورى وتفرها عشان تمشي (اللي بدون بطارية)
الاستبنة السفلية تعطي شكل إذا ركبت عليها غطاء الاستبنة الكروم .

[أبـــو عـــزام]

أخوي الخاطوف عساك سالم تستاهل

أخوي متفائل والله أنا من زمان ما رحت لأبو ريالين بس عرفت اللعبة اللي تقصد

على فكرة الاستبنه حتى على اللاندكروزر مالها داعي مع أنه أكبر وسبحان الله حصلت ناس في المعارض تموت في الاستبه إذا صارت علاقي!!

وهي تجي سكبه وممتازة على الباترول القديم والجديد وموديلات اللاند القديمه من 97 ونازل أو إذا كانت خلفية اللاند عادية من 2007 ونازل.

والغطاء اللي تقصده رهيب بس يا ليت لونه أسود وليس ستيل

بس على فكرة ترى الاستبنه إذا صارت تحت في الفورتشنر ما يصقعها شيء ولا تحك لأنه مرتفع وأنا جربت والسيارة محمله ومع ذلك بطل الفورتشنر

الله يوفق الجميع

سلام

[رياض الرياض]

مشكور يأبوعزام دايم مبدع وبالنسبه للاستبنه علاقي فعلا تخرب منظر الفورتشنر أما بخصوص القفل هل يجي معه من الوكاله ولا مرهم
وتقبل تحياتي

[أبـــو عـــزام]

لا ما يجي قفل ستبنه من الوكاله

وهذا القفل ليس مرهم بل مخصص من شركة تويوتا لقفل الكفر الاحتياطي

ولا أعلم هل هو موجود في السعودية أو لا

وحياك الله معنا أخوي

بالتوفيق لك وللجميع

سلام

[ابن فطيس]

أبو عزام

الله يعطيك العافيه

[شيخ الصحاري]

الله لا يحرمنا من هل المشاركات الرائعة يا أبو عزام

لا خلا ولا عدم

حقيقة ما أتخيل المنتدى بدون لمساتك وردودك الرائعة

تقبل مروري


والسلام خير الختام

[أبـــو عـــزام]

ابن فطيس

شيخ الصحاري

الله يحييكم ويعطيكم العافية

بالتوفيق لكم وللجميع

سلام