[دبرم]

السلام عليكم
انا يا الربع اشتريت فورتشنر 2008 فضي 4 سلندر فل ابشن قير عادي
بس فيه ملاحظات على السياره . ومن خلال مواضيعكم لقيت فيه ناس عطو السياره اكبر من حقها . وفيه ناس ظلمو السياره . صحيح ان السياره قويه وفيها مواصفات قد لاتكون في السيارات الاخرى . وايضا السياره تفتقد لابسط المواصفات التي نجدها في اغلب السيارات (وش رايكم باللغه العربيه)
المهم ما ابغى اطول عليكم عندي شويت اسأله
1 - سيارتي اذا جيت اطلع فيه على طعس ومعشق في الاول يخف عزمه لين يوقف ولازم اضغط كلتش عشان مايطفي رغم اني معشق في الاول. لكن كان عندي دتسن دفرنسين اذا طلعت طعس يوقف بس مايطي يبدأ يحفر ؟ وش المشكله عندي لان موتري مايحفر
2 - كلنا نعرف ان السياره دفع رباعي مستمر , طيب وش فايده الدبل الخفيف لاني ماقد فادني الدبل الخفيف اذا شغلته نفس عزم السياره بدون دبل وما يطلعني اذا غرزت يعني كني مو مشغله بس الدبل الثقيل ما شاء الله مايحتاج
انتو جابو على هذي الاسئله والدرجه 15 من 15 باقي الاسئله في مواضيع ثانيه ان شاء الله

[وليد المسعودي]

السلام عليكم ورحمة الله وبركاته :::::
اول شي حياك الله بالمنتدى كأخ وعضو جديد :::::
بالنسبة للاسئلة انا والله ما عندي خلفية عنها لن موتري ستة سلندر :::::
اما الدبل الخفيف اذا شبكته احس بالفرق عن المستمر ::::
هذا اللي عندي وان شا الله الاخوان ما يقصرون ::::

[دبرم]

الله يبقيك اخوي وليد المسعودي
والف شكر على ردك الجميل ويشرفني يكون اول رد يجيني منك
واتمنى باقي الاعضاء يردون

[أبـــو عـــزام]

الله يحييك ويبارك لك في سيارتك ويحرسك من الشر

1- السيارة توها جديده وما تمرنت وصارت معي على 6 سلندر وهو جديد قير اتوماتيك ويمكن الأربعة سلندر اللي عندك نفس الشيء.

2- هناك فرق بالتأكيد بين الرباعي المستمر وتعشيق الدبل وتم ذكر ذلك في أحد المواضيع بالمنتدى بالتفصيل الملل.

الله يوفقك والجميع

سلام

[رنديفو]

اخوي دبرم

الا فية فرق اذا عشقت الدبل الخفيف
تحياتي

[دبرم]

الله يعطيكم العافيه ابو عزام و رنديفو
عطيتوني الفايده بردودكم
والف شكر لكم

[جنوبي وجنوني]

السلام عليكم
انا يا الربع اشتريت فورتشنر 2008 فضي 4 سلندر فل ابشن قير عادي
بس فيه ملاحظات على السياره . ومن خلال مواضيعكم لقيت فيه ناس عطو السياره اكبر من حقها . وفيه ناس ظلمو السياره . صحيح ان السياره قويه وفيها مواصفات قد لاتكون في السيارات الاخرى . وايضا السياره تفتقد لابسط المواصفات التي نجدها في اغلب السيارات (وش رايكم باللغه العربيه)
ذكرتني بالاستاذ فوزي مدرس الغلة العربية الله يذكرة بلخير كان ما يفطر الا فلفل اخضر قسم يا كان يجلد جلد الله لا يوريك

المهم ما ابغى اطول عليكم عندي شويت اسأله
لا طول وبعدين خذ يمين وبعدين يسار .. ويا تاكسي

1- سيارتي اذا جيت اطلع فيه على طعس ومعشق في الاول يخف عزمه لين يوقف ولازم اضغط كلتش عشان مايطفي رغم اني معشق في الاول. لكن كان عندي دتسن دفرنسين اذا طلعت طعس يوقف بس مايطي يبدأ يحفر ؟ وش المشكله عندي لان موتري مايحفر
حوبي اذا سيارتك دبل خذ العلم او شي لا تنسى انك تقود سيارة ذات اربعة سلندرات بقوة 158 حصان ولا بد ان تفعل التالي لكي لا تخيبك او تفشلك
اولا : تقوم بتنسيم الكفرات 15 او 10 او 5 على حسب قيادتك اذا انت من المقلعين فلا ينقص عن 15 لكي لا يقرص معاك الكفر ويطلع من الجنط واذا تبي روقان فلـــ 10 او 5 ممتاز
ثانيا : اذا الطعس ذو ارتفاع منخفظ فلا داعي لدبل نهائيً لان السيارة دفع رباعي
ثالثا: اذا الطعس مرتفع فيجب ان تكون مبتعد عن الطعس ما يقارب 300 متر او اقل فحط الدبل الثقيل والاول وامش ودووووووس حتى يوصل معاك ظغط المكينة 6 يعني الين ما تصير تتفتف وعلى طول وبسرعة حطها بالثانية واذا وصلت نصف الطعس يعني اذا وصل معاك ظغط المكينة ما يقارب 3 او 4 رجع النمرة بالاول ودعها حتى تكمل الطعس بدون اي عوائق او ضعف ان شاء الله
وفي طريقة ثانيه وهي انك قبل ما تطلع الطعس خله بالثاني وتعال من مسافه بعيده ليست بلبعيده مرة يعني ... الين ما يوصل معاك الظغط اربعة وخله على اربعظ ومجرد ما تبدى من بداية الطعس او قبله بمسافة متر على طول ادععععس وسوف تسمع التف تفه ودعه يكمل الطعس بدووون عوائق
اسمع اسمع انا راح انزل تقرير كامل عن الاربعة سلندر حتى طريق التطعيس سوف اذكرها مع الصور ..انت ترقبه وسوف تفهم اذا ما فهمت ؟
2 - كلنا نعرف ان السياره دفع رباعي مستمر , طيب وش فايده الدبل الخفيف لاني ماقد فادني الدبل الخفيف اذا شغلته نفس عزم السياره بدون دبل وما يطلعني اذا غرزت يعني كني مو مشغله بس الدبل
فعلا الدبل الخفيف ما تشعر فيه في الاربعة سلندر لانه ما يغير من عزم السيارة مثل الدبل الثقيل بس انت اطلع طعس بدون دبل وطلع راسك من القزاز وناظر الكفرات الامامية راح تبدى تحفر معاك وتكون خفيف مرة .. ارجع مرة ثانيه بس بدبل خفيف ونفس الطريقة اطلع الطعس بس راح تلاحظ ان الكفر يلف اقوى بقليل ولانه المكينة اربعة سلندر ما تلاحظ الخفيف بس لو ستة سلندر راح تلاحظ ..؟
الثقيل ما شاء الله مايحتاج
انتو جابو على هذي الاسئله والدرجه 15 من 15 باقي الاسئله في مواضيع ثانيه ان شاء الله

ان شاء الله تكووون فهمت وان ما فهمت انتظر التقرير وتقبل مروري

[دبرم]

الله يعطيك العافيه اخوي جنوبي و جنوني
اول شي ودي اشوف الاستاذ فوزي يمكن يشبهني
وباخذ يمين ويسار واركب تاكسي ليعيونك وبسكتي باخذلك عطر رومنسي
ولا اوصيك عجل علينا بالتقرير عن الفورتشنر 4 سلندر انا انتظرك وصدقني فهمت كل اللي قلته
بس مايمنع انك تنزل تقرير عن V4
والف شكر على ردك الوافي

[رنديفو]

ماقصرت جنوبي و جنوني
استاذ بمعنى الكلمة والله تستاهل الاشراااااااااف