السلام عليكم ورحمة الله وبركاته
ان شاء الله كلكم بخير وصحة وسلامة
باختصار شديد جدا موقفين حصلا معي شخصيا في صيانة عبداللطيف
(فرع السويدي على طريق عائشة في الرياض)
ما أخفيكم علما أني من المتابعين للصيانة الدورية لسيارتي كل 5000 كلم ولله الحمد حصل معي في المرتين الأخيرتين مواقف ولا أريد أن يقع غيري بها ::
الموقف الأول :
وصلت لشباك تسليم السيارة، سلمت المفتاح
قال لي الموظف لا تترك شيء من أغراضك
(( طبعا أي واحد يفهم انها اغراض شخصية من محفظة ، جوال ، جواز .... الخ))
شلت معي أغراضي زي العادة سلمت السيارة
رجعت بعد ساعة استلمت السيارة وكل شي تمام
اشيك على المسجل .؟؟؟!!!!
فيه سي دي ناقص ؟؟
انا معبي المسجل بـ 6 سيديات
طيب السي دي أنا توني شاريه وين راح
قلت أشيك في شنطة السيديات يمكن بالغلط
شيكت لقيت حتى الشنطة ناقص منها السيدي
وش اللي صاير بالضبط ؟؟؟
السي دي مسروق من المسجل وموضوع بداله سي دي من الشنطه
لإيهامي أن السيديات مليانة ولم يؤخذ شيء منها
طبعا قلت في نفسي (( إذا اليوم سي دي بـ 10 ريال بكره المسجل بكبره مسروق ))
كلمت الموظف داخل الفرع قلت لازم أقابل رئيسكم وينه
قابلته وقلت له فيه سي دي مسروق من السيارة
قال احنا قايلين لك شيل أغراضك معك مانتحمل مسؤولية ..!!!
عجبـاً ..! طيب خلاص بشيل معي الستارة الخلفية ، والمراتب وبفك المسجل ، الخ وبعطيكم السيارة بس (بدي) من دون شيء في داخلها (( هذا كلامي له)) وقلت المقصود أشياء ثمينة ...
سكت طبعا ما رد علي .. وأضفت قائلا .. انا ماهمني السي دي انا دافع 500 ريال يعني تتوقع ما اقدر اشتري سي دي بـ 10 ريال وقلت وين كاميراتكم والا بس زينة ..!
انا اقصد كيف يتم التلاعب هذا ... اذا اليوم سي دي بكره المسجل والله يستر من الباقي
وزي العاده يحاولون يسوون فبركه ويروح يكلم رئيس السكورتيه ويأخذ الايصال حق الصيانة ويصوره
ولاااشفنا شي ....؟؟؟؟
انتبهوااا انتبهواااا انتبهواااا
الموقف الثاني :
طلعت من الصيانة كل شي تمام ...
رحت للشرقيه ولله الحمد وصلت بالسلامه
وانا راجع للرياض وقفت عند التسهيلات على خط الشرقيه
وقلت بفتح الكبوت بشيك على الزيت وش لقيت .....
هذي صورة للزرادية (بعد إخراجها من داخل السيارة)
لقيت أحدى أدواتهم منسيّة في السيارة
ولله الحمد كان في مكان لا يوصل الكهرباء
(( كان قريب جدا جدا بس الله ستر اللهم لك الحمد ))
ومرة ثانية
انتبهوااا انتبهواا انتبهوااا
أول ماينتهي التشييك لاتستلم السيارة الا وانت :
1- تاخذ دورة كاااملة على السيارة تتأكد منها (حتى لو كنت متأكد ان مافيها شي) 2- تفتح الكبوت وتشيك لايصير فيه شي متروك (بالغلط جوا السيارة) 3- تفتح الشنطه وتتأكد من وضعها (واحد من الزملاء شيك سيارته في هوندا وانسرقت عدّة الكفرات) 4- السيديات 
والله يستر علينا ان شاء الله
همسة :
إلى متى لانستطيع أن نأخذ حقوقنا
(لو أنا في أمريكا لرفعت قضية على الشركة بسبب "زرّادية" )
والسلام عليكم ورحمة الله وبركاته
