[فهودو]

الحمدلله ، من الله علي بهذه النعمة وشريت سيارة بعد انتظار طويل
وشكرا لهذا المنتدى الجميل الذي كان رفيقي في الدرب وقت اختيار هذه السيارة
وشكرا لكن من أجاب على اسألتي وشارك في المواضيع التي طرحتها وخصوصا ليكزي

اشتريت السيارة والآن حان الوقت للأولويات !! نظافة السيارة والبنزين

1- نصحوني ان اضع نايلون على أرضية السيارة يعني اشيل الزولية مالت السيارة واوديها لناس متخصصين ، اللي يسوونه انهم يشيلون كشن السيارة ويركبون نايلون تحته ليحفظ البودي مال السيارة
... النايلون يركب فقط على أرضية السيارة ولا اقصد على الكشن ، فالكشن حلاته مثل ما اهو

فشنو تنصحوني فيه ؟
والناس اللي بالكويت ياريت يفيدوني بأحسن الأماكن

2- بالنسبة للبنزي ، انا اترس بنزين خصوصي اوكتين 95 ، ومكتوب على فتحة البنزين PREMENIUM UNLEADED FUEL ONLY
والخصوصي خالي من الرصاص
ولكن في بنزين عندنا قوي اسمه SUPER ULTRA اوكتين 98 هم خالي من الرصاص

واحد من الشباب عنده CLS55 AMG يقولي انصحك تعبي فيه لانه زين للسيارة ويريح المكينة
فشرايكم شباب؟

وشكرا

[ليوناردو دافنشي]

الف مليون

ترليون

مبروك

الله يعطيك خيرها

و يكفيك شرها

بالنسبة للارضية

انا اخذت الزولية و لبستها

و اغسل السيارة بشامبو خاص

اما البنزين95 ممتاز

و الله اعلم

[فهودو]

حبيب ما تقصر
ممكن مزيد من الأخوة يشاركونا

[بإختصار لكزس]

الف الف مبروك

الله يعطيك خيرها ويكفيك شرها

انشاء الله الشباب يفيدونك

[بات مان]

الف مليون مبروك يا الغالي الله يعطيك من خيرها ويكفيك من شرها يا غلاي

[كمارو]

مبروك اخوي فهودو الله يعطيك خيرها ويكفيك شرها

ونصيحتي اخوي لاتركب نايلون على الارضية ركب بس على الدوسات

وبالنسبة للبنزين اكيد 98 افضل ولو عندنا هالبنزين كان ماحط الا منه

[غـيـر الـنـاس]

على البركه والله يعطيك خيرها ويكفيك شرها

تقبل مروري

[شكمان ابوكنداسه]

الله يطعمك من خيره ويكفيك شره

[ليكزي]

الف الف مبرووووك .. تستاهل ..
الله يعطيك من خيرها و يكفيك شرها يا رب ..

بخصوص النايلون على الأرضية ، بصراحة فكرة حلوة وانا كنت مفكر فيها ، بس واحد من الأصدقاء يقولي مشكلته اذا دخل فيه ماء او عصير او اي سوائل ، راح ينحبس ويتخمر بالداخل ويسبب لك رائحة غير مرغوب بها :d طبعا ممكن ينحبس غبار أو رمل بالداخل أيضا .. فأنا رحت شريت لي دواسة من نوعية ممتازة (صلبة ويابسة علشان ما تزلق وتتحرك وايد من مكانها) من محلات الزينة وركبتها على الأصلية (تأكد ان الدواسة فيها الـ كت الخاصة بدواسة البنزين) لانه دواسة البنزين ملتصقة بالأرضية مب معلقة مثل باقي السياراة ..

بالنسبة للبنزين ، طبعا كل ما كان الرقم أعلى ، كان البنزين احسن وأنظف (قوة اداء الموتر بعد شوي تزيد) .. وانا دائما استخدم بنزين أوكتين 97 لسيارتي (اسمه سوبر في قطر) ..

تحياتي
ليكزي

[م ع ي جي إس]

أول شي أحب أقووولك ألف ألف ألف مليووون مبرووك
الله يعطيك خيرها كله و يكفيك شرها كله . صراحه عيني عليك بارده ما شاء الله أنا مستخدم الموتر و أقول لك ما فيه أي كلام

و بالنسبه للأرضيه أنا كنت ملبسها نايلون ولا عانيت من أي مشاكل بس أهم شي يكون مركب بشكل صحيح مو أي تركيب لكن إذا تبي الحق يبدو كلام الأخ ليكزي أفضل من البلاستيك لأنه مع أجوائنا الحاره و في الظهر بعد الدواام يا ساااتر تكون السياره صهرييج من الحراره و عشان كذا أقولك ( زيبااااااااااارت ) لا تتـأخر عليه خيو تظليل عازل يخفف عليك حرارة الشمس . و بالنسبه للبنزين يا عمي إن كان فيه عندكم 100 عبي سيارتك منه لأنه رح يكون أصفى و أنظف للمكينه من الللي أقل منه إحنا عندنا نوعين بس وهم ( 91 - 95 ) طبعاً أنا ما أعبي إلا 95 لكن يا ليت عندنا 98 مثلكم .

تقبل مروري

[فهودو]

الله يبارك فيكم ويعطيكم العافية والله يسلمكم جميعا

وعسا ماشر وينه ليكزي ، اشتقنا لملاحظاته ومشاركاته
عسا المانع خير يا بو لكز

[ليكزي]

المشاركة الأصلية كتبت بواسطة فهودو

الله يبارك فيكم ويعطيكم العافية والله يسلمكم جميعا

وعسا ماشر وينه ليكزي ، اشتقنا لملاحظاته ومشاركاته
عسا المانع خير يا بو لكز

اشتاقت لك الجنة أخوي فهودوا ..
لا ابد سلامتك ، مافيني شيء ، بس اشوي هالأيام مشغول مع الدوام علشان جذي ما تشوفوني وايد ..

تحياتي
ليكزي

[فهودو]

يعطيكم العافية شباب
ليكزي انا سألت الوكالة وقالوا حط 95 اوكتاين

أبي ما عليك أمر تسأل صاحبك اللي تعرفه بورشة الصيانة
ايهو افضل ، بنزين 95 أو 98 ؟
وهل يأثر فعلا 98 بأثر أفضل من 95 بكثير؟
وشكرا

[ليكزي]

^
^

هع، والله ماعرف حد في ورشة الصيانة
والصراحة سؤالك فني بحت ، وانا ما اعرف مدى او كيفية التأثير بين انواع الوقود ، لكن الأكيد انه أفضل و يأثر ولو بنسبة بسيطة ..

عالعموم ، كتالوج السيارة + دليل مالك السيارة مكتوب فيها:-
نوع الوقود: بنزين ممتاز خال من الرصاص فقط
الرقم الأوكتاني البحثي: 95 أو أعلى ..

و في موقع لكزس الأمريكي lexus.com ، هناك نقطة أو نجمة ملاحظة بجانب تسارع السيارة تقول:

Ratings achieved using the required premium unleaded gasoline with an octane rating of 91 or higher. If premium fuel is not used, performance will decrease.

التقيم أو (بمعنى التسارع) توصل اليه بإستخدام البنزين الممتاز الخالي من الرصاص المطلوب بـ الرقم الأوكتني 91 أو أعلى. اذا الوقود الممتاز لم يستخدم، الأداء سوف يقل.
المصدر: GS | Specifications

لك الخيار يا عزيزي ، الكرة في ملعبك ..

تحياتي
ليكزي

[فهودو]

جزاك الله خير

سألتك اخي لأن في موظف من شركة بترول في الكويت عطانا محاضرة ، وهو كان مسؤول عن توزيع الوقود في الكويت
تكلم عن البنزين الخصوصي اوكتين 95 والبنزين سوبر الترا 98

الفرق ليس كبير ، الفرق هو ان نسبة الكبريت في بنزين 98 أقل من نسبة الكبريت الموجودة في بنزين 95
بالتالي فبنزين اوكتين 98 يفيد في أن حركة حرق البنزين تكون اسرع من البنزين 95

ولكن في المجمل ليس هناك فرق كبير
حتى ان الدول الاوربية بدأت ترجع الى اوكتين 95 بعدما استخدمت اوكتين 98 وشافت ان ماكو فرق كبير بينهم

هذا اللي اعرفه وجزاك الله خير

[حيران و مبهذل]

الف الف الف الف مبروك

الله يعطيك خيرها ويكفيك شرها
بنزين 95 على كلام وكيل السعودية عبد الطيف جميل