[حالفه ما حب]

السلام عليكم ورحمة الله وبركاته
اخواني القائمين على هذا المنتدى الاكثر من متميز والسبب في ذلك المشاركين والمشرفين فيه متميزين

اخواني اول مره اشارك في هذا المنتدى وعندي سؤال محيرني شريت لندكروزر من عبداللطيف جميل 2008 والحمد لله تمام وادري انه يختلف عن الي عندنه في البحرين لان الي في البحرين جي اكس ار والي خذته من السعودية جي اكس بدون فتحه والي في البحرين بدون فتحه وخالي مره بس الحلو فيه مخشب من الداخل لكن لا حسسات ولا مثبت سرعة قيمته حوالي 175000 ريال والي من السعودية خذته 16000 ريال حساسات ومثبت سرعة ودعاسات لون السيارة بس عندي لكم كم سؤال محيريني يا اهل الخبرة .
1) صوت الهوى الخارجي مسموع بعض الشي ( هل هو عادي او في سبب ).
2) صوت المكينة عالي شوي شنهو السبب ( سيارتي 6 سلندر ).
3) هل الاندكروزر في دبل صغير وكبير ( يريت تقولون لي شلون اغير في الدبل الصغير والكبير)

وشاكره لكم تعاونكم

[هامور للابد]

انا عندي اختي جي اكس سته ،، وشكلك انتي اول مره تحولين للجيوب ،، بالنسبه لي الصوت نهائي ماشوف فيه صوت خارجي ، والعزل بالجديد فرق عن القديم ، بخصوص صوت المكينه اشوفه طبيعي اذا تسكرين الباب ماتسمعين له صوت بس ياختي لاتقارنينه بالكامري ولا الصالون ، مدري شلون الصوت عندج علشان احكم عليه عيل لو تسمعين الثمانيه شتقولين اللي كله يحن ، ولو ان الجديد تحسن

بالنسبه للدبل الجديد فيه تغيير تلاقين الدبل مثل فرار جنب كبسه التشغل مكتوب عليه
h4 او l4

الصغير اللي اهو h والكبير هو ال L يعني تكون سرعه السياره بطيئه جدآ وهاذه ماتستخدمينه اختي الا اذا السياره غرست يعني تلاقين الدبل الصغير مامنه فايده وماعاد تمشي السياره مع التأكيد ان اذا بتمشين عادي تضغطين الزر اللي تلاقيه عليه صوره تواير هاذه علشان يشتغل الدبل الصغير ويكون فعال .

ولاتنسين اتنسمين على الموتر اذا بتمشين بالرمله ، مع اني متأكد انج بالبحرين مالج حاجه بالدبل الكبير او تنسيم التواير لان بصراحه ماعندكم طعوس

واي استفسار حاضرين لان شكلج جديده على الكروزرات

ومبروك الجي اكس ،، غريب ان يجي عندكم من غير مثبت او فتحه ، لان احنا اقل مواصفات لازم مثبت وفتحه وحساسات . غير الثلاجه والمكيف الاساسيين

[خبّاب]

اولا الف مبرووووك السيارة الجديدة
اعتقد انج تقصدين بالهواء الخارجى صوت هواء يدش عليج من (مماسك) الباب وحولهااذا مشيتى بسرعة 80 واكثر او اذا كان الهواء معاكس للسيارة اعتقد ان هذا (مشكلة عامة) لانى اعانى من هالمشكلة واكدها كم عضو فى مواضيع سابقة
والبعض يقول ان ماعنده المشكلة وما ادرى كيف نتأكد عشان نروح (بربطة المعلم ) ونسوى مظاهرة سلمية نطالب بحقوقنا المسلوبه

[الشيخ لاندكروزر]

تاكدى انك شايله اللزقه اللى على التنده .... لان اللزقه هذى تسبب اصوات مزعجه

[فهد منصور]

انا عندي نفس المشكله بالنسبه لصوت الهواء واليوم دخلت سيارتي لخدمة الخمسة الاف وسجلت ملاحظه وقلت لهم اذا ان الاصوات عاديه ابي تعطوني تقرير اثبت فيه اني سجلت اعتراض على صوت الهواء علما بان سياتي ثمانيه سلندر جي اكس

[يعقوب الرياض]

انا لاحظة نفس الشي
بس اللي مجربين الجيوب قالو ان الجديد أفضل من ناحية العزل لذلك اعتقد ان الصوت طبيعي
اما المكينة ما شاء الله فالجديد أفضل بكثير من السابق كقوة وهدوء في الصوت