[عبدالعزيز السيد]

من خلال زيارتي لمعارض السيارة في طريق سلوى
لا يوجد اي كروزر نظيف للبيع والسبب ان اخواننا السعوديين الله يزيدهم
تصير عندهم موجة شراء
بسبب الكروزرات القديمة وخصوصا من موديل 1998 - 2003
والاسعار اتكون جدا معقولة
فما السبب اخذ السعوديين لهذه الموديلات في السوق القطري ؟؟؟

[حسونه]

الله يهديك يا عبدالعزيز ما أدري اش سالفتك ها الايام
ع العموم لم تكن موفقاً في العنوان

[لاندكروزروبس]

المشاركة الأصلية كتبت بواسطة حسونه

الله يهديك يا عبدالعزيز ما أدري اش سالفتك ها الايام


ع العموم لم تكن موفقاً في العنوان

الاخ عبد العزيز انا من راي اخوي حسونه يلت تغير ولا تشوف صرفه

[بنت الخران]

الحمد لله ان الكروزر فى كل مكان وزمان

والطلب زايد علييه

[حسونه]

أتمنى من الأخوة المشرفين في حالة تغيير العنوان أو الموضوع
أن يُكتب تم التعديل بواسطة ......... ( الذي قام بالتعديل )
تسلمي يا بنت الخران
واحنا نفهم النغزات

[عبدالعزيز السيد]

اعتقد اني لم اكن موفقا في اختيار العنوان
بس الشباب اتركوا الموضوع واتجهوا للعنوان
شباب نبغي تركيز للموضوع وليس للعنوان

[محبوب نوره]

المشاركة الأصلية كتبت بواسطة عبدالعزيز السيد

اعتقد اني لم اكن موفقا في اختيار العنوان
بس الشباب اتركوا الموضوع واتجهوا للعنوان
شباب نبغي تركيز للموضوع وليس للعنوان

اخونا عبدالعزيز

لا تستغرب طبيعي الموديلات من 2007 ونازل مو من 2003 بس...

هذي عليها طلب مو طبيعي خاصه النظيفه مثل ما قلت انت ... مو المكسره!

مو بس بالسعوديه في كل دول الخليج

لأن الموديل الجديد لحد الان ما اقتنعت فيه الناس تماما يبي له وقت عشان يصير واقع... ويقتنعون فيه

مثل ما صار عندما نزل ال 98

صار موديل97 ذهب مو سياره عاديه ومصنوعه من حديد....

وانا كان معي جكسار فل كامل موديل2007 شاريه ب 170000الف ريال جديد اصفار
وقعد معي اربع شهور ومشى 10000كم وبعته ب 170000 الف اول ما نزل ال 2008 بالمعارض وشافوه الناس
واللي شراه مني صاحب معرض ونشب لي لين بعته يقول ان واحد موصيه يبي نفس المواصفات باللي هو به....

هذا السبب بنظري والله اعلم


وتحياتي للجميع

[جابر جابر جابر]

اخ عبدالعزيز شي طبيعي الي يصير وفي كل مكان مب بس قطر والسبب ان الوكلاء او الموزعين ماسكين المواتر ومايطلعونا الا لمعارفهم والشي الثاني ياخي فكر فيها بالعقل اي افضل اني اشتري في اكس ار 2008 من المعارض على 260000 الف ريال والا اشتري 2007 نظيف ماشي شي بسيط ونفس المواصفات بسعر مايتعدى 170000 بالكثير وتقول فرق بسيط 90 الف لان اذا انت تقدر ترى في واجد ناس مايقدرون يدفعون هالفرق وبالنسبه للاخوان السعوديين ترى مواترنا في قطر تعتبر جيده جدا بالنسبه لهم والسبب ان بلادنا صغيره يعني السياره موديل 2007 تلقاها بالكثير ماشيه 50 الف بعكس المملكله الي ممكن الواحد يمشي فالسياره 150 في السنه لان مشاوير طويله

[مـجـنـون]

ياحبيبي الكروزر اعتمادي ويمسك سعره

[واحد من الناس و]

لا تنسى الموصفات القطريه افضل مواصفات بالخليج

[هامور للابد]

مواصفات عبدالغني مب بس مطلوبه بالسعوديه حتى بالامارات يحبون مواصفات الدوحه

[السياغي]

؟؟؟؟ ماله داعي

[لاندكروزروبس]

المشاركة الأصلية كتبت بواسطة السياغي

؟؟؟؟ ماله داعي

اخوي العزيز السياغي انت ملاحض ان الموضوع بيتشتت ارجو منك انهاء الموضوع

[عاشـــق اللاند]

والله حتى عندنا بالكويت الطلب على القديم اكثر وسعره ارتفع لدرجه مو معقوله انا لقيت 2007 جي اكس ار فل كامل ب12 الف اصفار وقبل كان سعره بالوكاله ب11 ونص يعني زاد مانقص

[يعقوب الرياض]

شوفوا ياشباب
حنا عددنا مع غير السعوديين نوصل الى أكثر من عشرين مليون نسمة
والبترول أرخص من التراب والماء اللهم لك الحمد
بنزين 91 ب 45هللة (0.45ريال)
بنزين 95 ب 60هللة (0.6ريال)
كل شخص في ها البلد يحرص ان تكون عنده سيارة
يعني لو تنزل المعارض او الحراج بمعنى اصح راح تلقى سيارة على قد فلوسك من ألف ريال سعودي او أقل بقليل الى أكثر من أثنين مليون ريال
وهذا سبب اتجاه السعوديون الى كل مكان لشراء السيارات وإعادة بيعها هنا وهي تجارة رابحة جدا

[دواره]

صادق ياعبدالعزيز
أسعار الكروزر أرتفعت عندنا بشكل ملحوظ ومبالغ فيه
الكروز ماهو راعي البر والمقناص والعائلة يقتنيه

صار حتى إلي يبي يزبرق سيارة شارى كروزر
وفيه عندنا في الرياض سيارات كروزر مع شباب حقين دوران وتغسيل وتنظيف
مواترهم تملا العين ماشاء الله حتى بعضهم مايحب يروح بها البر
بس لجمعات الشباب وكذا ولا يسرع عليها

الفئة هذي سحبة موديلات 2006 2007 بشكل رهيب والسبب شكل الأنور والأسطبات الخلفية صارت أكشخ

لاتستغرب ربعنا ياخذون من عندكم (: