[هاروك]

بسم الله الرحمن الرحيم

أخواني الأعزاء عندي مجموعة أسئلة ، بما أني مقبل على شراء السيارة قريبا بإذن الله حسب ما أراه ونتائج الاستخارة والاستشارة :

1- هل السيارة مازالت تعاني من مشكلة القير ، حتى بالدفعات الجديدة؟
2- هناك مشكلة تنسيم بالفعل ، وهل يمكن تغيير حجم المرايات الجانبية السنة القادمة ، كما حدث للسيارة في أمريكا هذه السنة؟
3- هل هناك سيارة مثل أو أفضل من الـes بـ170000 ريال ؟

شاكر لكم مقدما

[الحزيمي]

عزيزي هاروك
اتمنى لك التوفيق والبركة فيما تختار

بالنسبة لأسئلتك:

1- سيارتي 2007 ولا ارى وجود مشكلة بالقير مع ان بعض الاخوه لاحظوها في 2008
2- لا توجد مشكلة تنسيم .. وانما صوت حفيف الهواء الخارجي ... و المرايا هل انت متأكد انه تم تصغيرها في امريكا
3- السؤال الثالث ... اتمنى يفيدك اصحاب التجارب

[مستلكز]

هلا باخونا ( هاروك )

أنا سيارتي 2008 واعتقد انها من الدفعات الاخيرة ولا ألاحظ مشكلة القير ( ولله الحمد )
اللي يتكلم عنها بعض الشباب .. إلاّ فيما ندر .. وإذا لاحظت لا ألقي لها بالاً لأن ذلك يؤدي للوسوسة لربما .
وأما عن التنسيم ـ اسمع صوت ـ وديتها للوكالة وقالوا لي هذا صوت الهواء يصقع بالمرايات الكبيرة الحجم .. !!!!!!!!!!!!!!!!!!!!!!

والحمد لله ـ السيارة في الجملة ـ لا ولن تتحسّف على ريال تدفعه فيها بمشيئة الله

أسأل الله أن يبارك في أموالنا وأعمالنا وأبنائنا جميعاً

[مبتكر]

ماازيد على كلام الأاخوان ..
لكن أحب اصحح كلام الأأخ ان المرايات الأمريكية والخليجية نفس الشي مافيه تغيير لاتصغير ولا تكبير <***** صارت عملية تجميل .

[هاروك]

المشاركة الأصلية كتبت بواسطة مستلكز

إلاّ فيما ندر ..

يعني أفهم إنه في مشكلة يا أخي القير يعني مكينة وهذه ماهي بسيطة بالنسبة للمبلغ تقريبا 170000

[وحداووووي]

توكل على الله و مبرووووووووووووووك مقدما و صدقني مش رااااااااااح تندم ومشكلة القير لا وجود لها في موديلات 2008 أما عن صوت الهواء فهذا موجود في كثير من السيارات الجديدة و لكن الصوت عادي و ضعيف مقارنة بسيارات أخرى ولك أجمل التهاني ومنتظرين منك الدعوة لنزف العروسة .

[روح الوفــا]

هلا باخوي صاحب الموضوع

انا ماودي اضيف ردي وتدخل بـ متاهات وتحتار اكثر بس بقولك عن سيارتي


1 - عندي صوت هوا .. الوالد عنده افالون 2006 وصوت الهوا اخف من عندي

طبعا بروح الوكاله هالمره ياقاتل يامقتول لاني ثلاث مرات اوديها ويصرفوني

الرابعه ان ماحلوها بتصل جده .. لان بيدي لما اسحب الربلات تطلع من الباب كأنها مركبه كذا مو مثبته صح


2 - القير من احسن مايكون ولكن عليه ملاحظات وقلت هالكلام للوكاله وقالوا انهم حلوا المشكله وماحلوها ولا دروا عني خراطين

المشكله :

هذاك اليوم جاي واحد طااير كان بيصدمني من ورى فـ دعست بقوة ( مع ان دعستي مو كامله ولا هي بذيك القوة اللي تتصورها )

لاحظت ان الار بي ام مرتفع والسياره مازادت سرعتها كأنك مفضي القير وبعدها كنك عشقت وانطلقت

( لاحد يقولي هالحركه طبيعيه ، لان مو معقول الار بي ام يوصل لـ 4 ونص والسياره تحن والسرعه زي ماهي )

بعدين لما عشق القير نزل الاربي ام


على فكره تكررت معاي هالحاله كذا مره


سيارتي 2008 ماخذها الدفعة الاولى بـ شهر 10 / 2007


بالنسبة لسياره بمواصفات الـ es وبنفس السعر لا تتعب روحك ماراح تلقى

انا فريت كل الوكالات .. كاديلك / مرسيدس / بي ام / كلايزر / اودي / بورش / فولفو

جاكور <***** مع ان المدام تموت فيها بس حسافه بيتغير شكلها

شنو بعد . اقولك فريت كل الوكالات فـ مافي بسعر اللكزس بنفس المواصفات

عندك الانفينيتي حلوة بس تنقصها مواصفات عن اللكزس وانا اقصد G35

مافيها نافقيشين ولا فيها تكييف اسيات ومادري شالفروق بالضبط بس هذا اللي اعرفه


انا فريت كل الوكالات .. وكان انسب خيار اللكزس




بقولك كلمه اخيره : السياره والله انها حلوة ومريحه وانا مبسوط فيها

بس اللي قاهرني حركه القير والهوا .. مع حركه القير ماتصير دايم

يعني من خذتها لين الحين يمكن صارت هالحركه 4 او 5 مرات بس


الله يكتب لك اللي فيه الخير

[شيخ البانوراما]

.

هلا بك اخوي هاروك

بادئ ذي بدئ تذكر ان الامر في النهايه والبدايه يرجع لك في الاختيار..

يعني اذا كانت السياره ما خشت مزاجك فمهما كانت جيده ومواصفاتها رائعه فما راح تقتنع فيها والعكس صحيح اذا كنت صامل ومعزم فمهما كان في السياره عيوب ومشاكل فأنت راغب فيها ومن الصعب ان الواحد يغير رأيه في حال الاقتناع

وبودي اني اؤكد على اهمية صلاة الاستخاره لعل الله عز وجل ان يهديك الى القرار الصحيح

واسمح لي انقل تجربتي الشخصيه في هالموضوع..

الحقيقه قبل لا اشتري السياره سويت بحث دقيق (وهذا طبعي) وقمت بمفاضلات عده بين كثير سيارات وفي النهايه رسيت على هالسياره مع كامل معرفه ودرايه بل وتجربه بالعيوب الموجوده بالسياره من صوت للهواء ومتاعب القير وغيرها من الملاحظات ...

ولكن ابيك انت تقولي وش السياره اللي تراها مناسبه

انفنتي مثلاً ... والله ماظنتي

افلون ..ناقصه مواصفات وسعر مرتفع

امريكي ..ثقيل طينه بجميع انواعه بلا استثناء (جي ام ، فورد ، كرايسلر ،...)

بي ام او مرسيدس

كبدايه ما راح تلقى المواصفات الموجوده باللكزس بنفس السعر في هالسيارتين غير اللي بتدفعه كمصاريف صيانه واسئل اي اواحد جرب هالسيارات

هوندا معليش ما فيه مقارنه حتى اعلى مواصفات في الاكورد ما تصف جنب اللكزس!

بقى السيارات العمليه مثل الكامري ، الاكورد ، الالتيما ،الكورلا ، السيفيك ..الخ

بصراحه الاسعار صار مبالغ فيها جداً جداً فاذا وصلت لأكثر من 90000 في سياره عاديه انا شخصياً فضلت ادفع اكثر واخذ سياره تستاهل اللي ادفعه..

وهذا يرجعنا لأول الموضوع فبعد خيارات ومفاضلات بغيت اخذ كامري فل كونها سياره عمليه وتمسك سعرها بس داخليها يجيب المرض (مع اعتذاري لعشاق الكامري)

اللين لقيت اللكزس تشبه الكامري في الصبر وفي الفخامه... لكزس!

والآن الحمدلله معي ES350 2008 صحيح اني متضايق من حركة القير ولا ازال اتابع مع الوكاله بهالموضوع ولكن بشكل عام السياره رائعه..

بخصوص اسئلتك :

1- هل السيارة مازالت تعاني من مشكلة القير ، حتى بالدفعات الجديدة؟

مشكلة قير الـ Es350 2007/2008 مقطع فيديو شخصي!!

2- هناك مشكلة تنسيم بالفعل ، وهل يمكن تغيير حجم المرايات الجانبية السنة القادمة ، كما حدث للسيارة في أمريكا هذه السنة؟

للأسف هذا احد اهم عيوب السياره ..

ولكن للتوضيح ترى هذا ماهو تهريب (الا ان كانك تحس بتيار هواء فهذا امر مختلف) اللي تسمعه هو صوت الهواء لما يصطدم بجسم السياره و المرايات ..

والسبب كما يقال انه عند نزول الـ 430 لأول مره في السوق الامريكي عام 2001 - ومن باب التعييب في التقنيه اليابانيه لا اكثر- قالوا ان العزل القوي يشكل خطر وعامل يقلل من الامان في السياره في حال حصول تنبيه من احد السيارات المجاوره وذلك قد يتسبب في حصول حوادث. ( لايمكن سماع اصوات اعلى من 4 ديسبل وهذا تقريباً اقل من صوت التحدث الطبيعي وهو عذر نوعاً ما مقبول)

ومن ذلك التاريخ وحتى الآن واللكزس لم تكون في مستواها السابق، وهي المشهوره بالعزل الجبار

3- هل هناك سيارة مثل أو أفضل من الـes بـ170000 ريال ؟

المقارنات بالاعلي ممكن توضح لك الصوره اكثر ، ولكن في الاعتماديه لا يوجد مقارنه اللكزس تفوز (ما شاء الله ) بأغلبيه ساحقه

بالتوفيق ،،،



.

[طارق البدر]

السياره لا يوجد بها مشكله في القير هذا قير جديد كليا ونظامه يعمل بهذه الطريقه محتاج فقط تعود ووزن الدعسه فقط

التنسيم غير موجود لأن مصطلح التنسيم دخول الهوا داخل السياره وهذا مستحيل وغير موجود. صوت الهوا يضرب في البودي شي طبيعي وين يبي يروح حتى الطائرات فيها هالصوت

البانوراما لاتستاهل هالسعر في نظري اللي يدفع 170 يكمل وياخذ له gs اصرف بصراحه اقل نوع روووعه لازم نفقيشن وخربطيشن وسقف من زجاج انا بالنسبة لي لاتعني لي شي اوفر 35000 فرق شاسع اقل نوع قيمتها يمكن 137000 عن طريق الوكلاء واتمنى لك التوفيق

[وحداووووي]

بخصوص اسئلتك :

1- هل السيارة مازالت تعاني من مشكلة القير ، حتى بالدفعات الجديدة؟

مشكلة قير الـ Es350 2007/2008 مقطع فيديو شخصي!!



لا تعم 2008 بالجواب المشكلة كانت موجودة بالدفعة الأولى فقط من موديل 2007 و التقارير موجودة بالوكالة أسأل و شوف بنفسك

[شيخ البانوراما]

المشاركة الأصلية كتبت بواسطة وحداووووي

بخصوص اسئلتك :

1- هل السيارة مازالت تعاني من مشكلة القير ، حتى بالدفعات الجديدة؟

مشكلة قير الـ Es350 2007/2008 مقطع فيديو شخصي!!

لا تعم 2008 بالجواب المشكلة كانت موجودة بالدفعة الأولى فقط من موديل 2007 و التقارير موجودة بالوكالة أسأل و شوف بنفسك

صباح الخيرات اخوي وحداووووي

انا موتري 2008 ولو تلقى نظره على الموضوع بتقدر تتعرف اكثر على المشكله

ومن ملاحظتي على سيارات بعض الزملاء لقيت عندهم هالملاحظه

ولكنهم لا يرونها مشكله بالعكس تعودوا عليها وعلى فكره ترى ماهي ( فحطه في مفاجئه في القير ) وانما خشونه في التغييرات عمومًا وعند تغيير معين بالذات (الثالث للرابع) ولكن هذا امر غير مقبول في سياره عاديه ..

فما بالك انه يظهر في اللكزس ... سياره معروفه بسلاسة الاداء ..

واذكر احد الاخوان فتح موضوع تصويت على مشكلة القير وهل هي موجوده في 2007 فقط ام كذلك في 2008 تلقاه على هالرابط التالي

اسفتاء..من لديه مشكله في جربوكس ال Es350

عموماً المشكله من خلال تعمقي في الموضوع هي كما يلي:

في التقنيه الجديده المستخدمه في القير والتى تسمى بالـ ECTS ( تقنيه موجوده في الاوريون والافلون 2008 )

Electronic Controlled Transmission System وتعني التحكم الالكتروني بتغييرات القير

وهي تقنية مستحدثه ولم تكن موجوده في الموديل السابق 2006 وما قبل وهي السبب وراء هذي المشكله.

وهذا يعني ان القير يحاول انه يتنبأ بخطوتك التاليه فيقوم بالتغيير حسب ما هو مسجل عنده في ذاكرة الرحله

لذا تجده بعد رحله طويله على سرعه ثابته تظهر عليه مثل هذي الملاحظات ..

طبعاً انا لا يمكن ان اقتنع بهذا الرد لأن القير لأي شخص جرب يسوق توماتيك بيحس ان فيه غلط

اما الملاحظه الثانيه والخطيره هي انه في حالة الاضطرار الى التسارع المفاجئي ( في حالة تجاوز مثلاً )

القير لا يستجيب الا بعد مرور ثانيتين تقريباً وهذا امر خطير جداً جداً لأنه قد يعرض الشخص لخطر التعرض لحادث لا قدر الله

وكل من جرب السفر في طريق اتجاهين وجرب التجاوز سيقدر حجم المخاطره

كذلك قد تحتاجها في حالة الاضطرار الى السرعه الفجائيه للحاق بمخرج سهى الواحد عنه

..التأخر بالثواني هذا قد يؤدي الى شطفك للرصيف لأن السياره ما تسارعت بالشكل المطلوب..

هذي هي ملاحظاتي على القير ، وعلى فكره الامر عالمي وفي المنتديات العالميه تلقاهم مفردين موضوع مثبت لمناقشة هالمشكلة والرد على إستفساراتها

الطريف في الامر اذكر انه في احد مراجعتي للوكاله "مهندس" الوكاله حاول يقنعني ان قير الموديل الامريكي يختلف عن الموجود عندنا (بعد ما وريتهم تعميم القير)...

لكذا المشكله مو موجوده عندنا

حتى تفسيراتهم مضحكه

.

[حسينوو]

المشاركة الأصلية كتبت بواسطة روح الوفــا

2 - القير من احسن مايكون ولكن عليه ملاحظات وقلت هالكلام للوكاله وقالوا انهم حلوا المشكله وماحلوها ولا دروا عني خراطين

المشكله :

هذاك اليوم جاي واحد طااير كان بيصدمني من ورى فـ دعست بقوة ( مع ان دعستي مو كامله ولا هي بذيك القوة اللي تتصورها )

لاحظت ان الار بي ام مرتفع والسياره مازادت سرعتها كأنك مفضي القير وبعدها كنك عشقت وانطلقت

( لاحد يقولي هالحركه طبيعيه ، لان مو معقول الار بي ام يوصل لـ 4 ونص والسياره تحن والسرعه زي ماهي )

بعدين لما عشق القير نزل الاربي ام


على فكره تكررت معاي هالحاله كذا مره


سيارتي 2008 ماخذها الدفعة الاولى بـ شهر 10 / 2007

اسمحلي بمداخله صغيرة

اذا كنت تمشي على رواق وجيت مرة وحده تدعس تتأخر السيارة في قومتها .. كانت تصير لي هالحركه لما كانت عندي الماكسيما ... وعند سيارة الوالد الكابريس والان في الافالون نفس الشي
وفي لكزسي ..

السبب .. ان السيارة تكون في وضع الراحه والارتخاء وتجي مرة وحده تدعس مابتقوم على طول
جرب انك تمشي فترة على خفيف وتدعس مرة وحده ....!! شوف النتيجه
وجرب تسرع وتداعس لمده خمس دقايق .. وبعدين خفف السرعه وادعس على البنزين وشوف التسارع ..!!


راح تلاحظ فرق بين التجربتين


اتمنى ماطولت وكلامي يكون واضح بالنسبة لكم

[روح الوفــا]

المشاركة الأصلية كتبت بواسطة حسينوو

اسمحلي بمداخله صغيرة

اذا كنت تمشي على رواق وجيت مرة وحده تدعس تتأخر السيارة في قومتها .. كانت تصير لي هالحركه لما كانت عندي الماكسيما ... وعند سيارة الوالد الكابريس والان في الافالون نفس الشي
وفي لكزسي ..

السبب .. ان السيارة تكون في وضع الراحه والارتخاء وتجي مرة وحده تدعس مابتقوم على طول
جرب انك تمشي فترة على خفيف وتدعس مرة وحده ....!! شوف النتيجه
وجرب تسرع وتداعس لمده خمس دقايق .. وبعدين خفف السرعه وادعس على البنزين وشوف التسارع ..!!


راح تلاحظ فرق بين التجربتين


اتمنى ماطولت وكلامي يكون واضح بالنسبة لكم

مرحبا اخوي حسينو .. شكرا لك على مداخلتك اللطيفه

عزيزي انا عارف الموضوع اللي تتكلم عند وعارف موضوع التأخير

وهذا التأخير هو عباره عن انتقال التروس من وضيعه الراحه الى وضعيه التأهب

لكن موضوعي مختلف تماما عما تطرقت له

اللي صار ان اذا دعست الاربي ام يرتفع ويوصل للـ 5 تقريبا يعني كأنك مفضي القير

وبعدين لما يركب الترس تحس بهزه قويه بالسياره

حتى لما شرحت للمهندس اللي بالوكاله قالي نفس كلامك بس لما فهمته بالضبط شاللي صار .. قال لا كذا الوضع مو طبيعي

وشاكر لك مداخلتك

[روح الوفــا]

المشاركة الأصلية كتبت بواسطة طارق البدر

السياره لا يوجد بها مشكله في القير هذا قير جديد كليا ونظامه يعمل بهذه الطريقه محتاج فقط تعود ووزن الدعسه فقط

التنسيم غير موجود لأن مصطلح التنسيم دخول الهوا داخل السياره وهذا مستحيل وغير موجود. صوت الهوا يضرب في البودي شي طبيعي وين يبي يروح حتى الطائرات فيها هالصوت

البانوراما لاتستاهل هالسعر في نظري اللي يدفع 170 يكمل وياخذ له gs اصرف بصراحه اقل نوع روووعه لازم نفقيشن وخربطيشن وسقف من زجاج انا بالنسبة لي لاتعني لي شي اوفر 35000 فرق شاسع اقل نوع قيمتها يمكن 137000 عن طريق الوكلاء واتمنى لك التوفيق

يعطيك العافيه عزيزي على كلامك ..

بالنسبة للقير .. في واحد من الاعضاء انا قاري موضوعه برمضان اللي فات

يقول ان سيارته 2007 . ماشيه 4000 كيلو ومرجعها للوكاله القير بوووش


وبالنسبة للتنسيم موجود واكبر دليل سيارتي

فـلنفرض ان كلامك مضبوط صوت الهوا يضرب في البودي شي طبيعي

السياره انسيابيه وممكن يطلع صوت بسيط بس مو مثل اللي عندي

ولد خالي عنده gs يقول كااااااتم صوت بشكل مو طبيعي واحسن من كاتم المرسيدس 2008 ومسوي مقارنه مع واحد من ربعه


نرجع لحديثنا ..

انا لما تمر يمي سياره حتى لو كنت امشي 80 اسمع صوتها كأنك فاتح اشووي من الدريشه

الوالد معاه افالون مايسمع هالصوت

واحد من الربع معاه كورلا 2003 <***** لاحظ شنو ... مايطلع عنده نفس الصوت .. واول ماركب معاي لاحظ الصوت

اقولك الربلات حق البيبان لو اسحبها بشويش بيدي تطلع من مكانها

سابقا .. عندي هوندا بريليود سبورت وبعدها كان عندي مرسيدس بوعيون الشكل القديم وكلهم مافي نفس الصوت

مع العلم الهوندا 99 والمرسيدس 96


عموما حبيت انقل لك تجربتي عشان نوضح الصوره

انا معاك ممكن الاغلبيه ماعندهم نفس اللي عندي بس لا تقول مستحيل

وعساك على القوة