السلام عليكم ورحمة الله وبركاته
ودي اشاركم ببعض الملاحظات على سيارتي و ارجوا انها تفيدكم. هذه الملاحظات ليست بالضرورة ايجابية او سلبية ... بس حبيت اقولها لكم لمجرد العلم بها.
1- استهلاك الوقود احسن من القديم بقليل ، اعبيه في قطر بحوالي (105 ريال ) سوبر و من السعودية عبيته بترول 95 بحوالي 78 ريال. اثناء وقوف السيارة يعطيك الكمبيوتر ( cruising range) حوالي 640 كيلو لكن فعلياً يوصل اكثر من 700 كيلو. ( انا كان لي راي غير هذا في مشاركة سابقة لكني كنت مخطىء).
2- اقصى سرعة وصلتها السيارة هي 195 كم بدون ما يقطع ، حاولت اتعدى هذي السرعة لكن بدون فايدة مع العلم انه الجو معتدل ولا فيه هوا وبتواير الوكالة. ( يمكن السبب ان السيارة جديدة).
3- السيارة نزلت فيها البر بدون ما اشغل الدبل ، كل ما جيت مكان فيه تغريز قامت السيارة تصدر تنبيه مثل الجرس يصحبها صوت مزعج مثل صوت التروس. على العموم يوم شغلت الدبل ما قمت اسمع الصوت ( يبدو انه سيستم في السيارة).
4- عند تشغيل الدبل ظهرت لي علامة الخطر الصفرا بالإضافة إلى كلمة ( VSC Off ) في الشاشة الصغيرة اللي في الطبلون. في الحقيقة ما عرفت ماذا تعني هذه الكلمة. لكني مالاحظت اي شي اخر.
5- جربت الكرول سيستم اثناء التغريز ، في الحقيقة كرول سيستم ما ينفع في التغريز بالإضافة إلى ان صوته كان مزعج جداً ( انا اشوف ان كرول سيستم ماله داعي في السيارة).
6- البريك زين على الطرقات المسفلته ( القار ) لكن في البر ما زال الكروزر يعاني من مشكلته القديمة الـ (ABS) ما يقفل مما يسبب الانزلاق على الرمل. مع العلم انه موتري مزود بنظام (ABS) المطور.
7- السيارة اكثر عزل للصوت في سابقتها. يعني ما تسمع صوت الهوى الخارجي الا اذا كنت مسرع جداً وعليك هوا.
8- بالنسبة لقوة السيارة فأنا احس انها مثل القديمة يمكن اقوى شوي.
9- لفة السيارة كبيرة ، كنك راكب شاحنة
القديمة احسن من ذا الناحية. يعني كل ما جيت تبغي تكوع أو تلف فوق حدر لازم ترجع ريوس (قري) عشان ما تركب الرصيف.
10- السيارة في الطرقات الوعرة والمطبات اتجنن و سواقتها عجيبه.
11- بالنسبة لكون الثلاجة مشبوكة مع المكيف فأنا اراها مفيدة جداً. حتى لا تنسى الثلاجة شغالة مما ينهك الكمبرسر.
12- تم تلافي الخطأ في البلوتوث في السيارات القديمة. وهو انك تستطيع ان تحول المكالمة من السيارة إلى الهاتف بدون ما تفك الارتباط بالبلوتوث. في السيارة القديمة لم تكن هذه الخاصية موجودة فلو جاءتك مكالمة خاصة فإن جميع من في السيارة يسمعها ولا تستطيع فصل الهاتف عن السيارة الا بإنهاء الارتباط بالسيارة.
أخر ملاحظة الريموت كنترول طلع مصنوع في المغرب
وبس هذي الملاحظات اللي عندي و بنتظار مشاركاتكم وخبراتكم
