[راعي الكبسوله]

السلام عليكم ورخمة الله وبركاته
مسا الخير
نويت اشتري لكزس Ls 400 موديل 1997 ولكن هناك اسئله ادور في بالي بغيتكم تجاوبون عليها منكم اخوني الاعزاء ما يركبون الا لكزس( العشاق)
وش نقاط الضعف في هذا الطراز , وهل هي جوده يعني حقت كرف , وكيفها في الخط راسيه , القطع الغيار اسعرها غالي , وهل هي معقده في الصيانه يعني تكشف العطل بسهوله

اخواني انا اعرف اللي في خطركم تقولون ليش ما ترقا وتشتري موديلات جديده يعني من 2000 وفوق لكن شكل هذا الموديل داخل مزاجي . لا تبخلون علينا من معلومات ونصائح في الاستخادم والصيانه

وانا في انتضار ردودكم لا هنتوا

[كروز]

هذا الموديل صحيح قوى بس من 98 وطالع افضل واكشخ
والكزس من طلعت وهى من احسن الى احسن

[راعي الكبسوله]

مرحبا يا كروز
معك حق موديل 98 وفوق اكشخ يدلك على مقدمه افجح
ولكن سمع ان حساساته كثيره اشوي من 97 يعني معقد شوي في الصيانه

ومشكور على الرد وعلى رايك الله يبض وجهك

[المسـافر]

طيب ماقلتلنا كم ماشيه !!!

اذا كانت 150 ألف كيلو وتحت خذها وان شاء الله مايصير فيها شي ....

اما اذا كانت اكثر من كذا انصحك لاتاخذها لأنها راح تتعبك....



تحياتي

[راعي الكبسوله]

شي طبيعي اخوي مسافر
معلوم انها ماشيه تقريبا 75 كم
ولكن انت ما جوبت على الأسئله لا تبخل علينا قول اللي في خاطرك
الله لا يهينك ومشكور على المرور والرد وانا في انتضارك وانتضار الجميع

[المسـافر]

وش نقاط الضعف في هذا الطراز ?
ماعندي فكره...

وهل هي جوده يعني حقت كرف ؟
طبعا افضل من المرسيدس والبي ام في الكرف بس مو مثل الكامري او الكورولا...
بس انا اعرف واحد معه لكزس 98 و عدادها حول 250 الف كم وماشيه معه...

وكيفها في الخط راسيه ؟
ايه ماعليها راسيه في الخط ....

القطع الغيار غالي ؟
ايه والله غالي ...

وهل هي معقده في الصيانه يعني تكشف العطل بسهوله ؟
من ناحية التعقيد مااتوقع لأن مشاكلها تنكشف بسهوله وماشاء الله المحلات التخصصة باللكزس وش كثرها عندنا ...

[(الاسير)]

اخوي ....... اختيارك للكزس عموما ممتاز فصراحة سيارة تستحق الاقتناء... سيارة فخمة عملية جدا مريحة بالسفر وبالمدينة بالنسبة لقطع الغيار ما اعتقد انه غالي مقارنة بالسيارات الفخمة كالمرسيدس والبي ام كذلك الصيانة.... والان فية مراكز بالرياض للصيانة تنافس الوكالة وارخص بعد واللي يقولك معقدة في الصيانة ....نعم معقدة للجهال في صيانتها لكن لما تبحث عن المتخصصين فبالتاكيد لن تكون معقدة عندهم .

واذا تبي رأيي موديل 98 افضل لانه تغيرت المقدمة الى الافضل وانوارها اصبحت زينون ولم يتغير هذا الموديل الى الشكل الجديد الا في موديل 2001

وبالنسبة لى ما ارى فيها نقاط ضعف اذا انت تبحث عن فئة السيارات الفخمة

[راعي الكبسوله]

مرحبا بالطيبين
آسف التاخير على الردود
خلوها بضروفها
المسافر ارحب الله يحي نباك
الله ينور ايامك
تعرف اخوي والله جاد بشراء ومحتار معرف عنها اي شي
ذلحين ومن دون مجامله هزني الشوق يمها
مشكور على مرورك
هلا بك اخوي اسير
وش ذالموتر مشا الله عليه
ولكن اخوي انا معك الموتر شكله افضل بكثير انطبق كلامك مع كلام الذيب المسافر ولكن سمعت معلومه ماادري عن صحتها ان موديل 97 اسهل في الصيانه من 98 والا كلها واحد يعني محركاتها وحده
ياليت لو تعلق على هذه المعلومه

.......................
.المعارض اللي بالرياض المتخصصه بالكزس ياليت تعطينا اساميها
كذلك وش افضل مراكز الصيانه اللي تكشف وتفحص على الموتر ويعطوني رايهم اشتريه والا اتركه

مشكورين ياطويلين العمار على التواصل والله يجزاكم خير

[المسـافر]

اخوي راعي الكبسولة ..
97 و 98 مافيه فرق بينهم الا بالشكل فقط على حد علمي.....

اما عن المحلات المتخصصة باللكزس ...عندك العضيب اللي بالصناعية القديمة ....والشعيل بالعليا

[لكزس]

كلام اخوووي المسافر صحيح لايوجد فرق بين 97 و98 الا بالواجهه وبعض التعديلات البسيطة

وصراحه 97 له هيبته وعشاقة واذا لقيت نظيف توكل على الله

[راعي الكبسوله]

وانت الصادق اخوي المسافر من الداخل هناك شاشة معلومات في موديل 98 كما في الصوره :


الاسير عطاني رايه الله يسلمه ............ياراعي الكبسوله خذ 98
بس انت يالمسافر شكلك تحب كل الموديلات عطني القرار النهائي

لكزس مرحبا بك
انا والله اخوي لكزس حبيت هذا الموديل 97 بس اخوي الاسير كنه طمعني في موديل 98 ولكن هناك سؤال يطرح نفسه اخوي هل يعني موديل 97 يصمد اشكل من 98

ولكن عندي مقارنه شاركوني فيها
لاحظت من ناحية الشكل ان 97 يجيك مقدمه مزموم يعني مايتعبك في البلد ومتواضع بس موديل 98 افجح بالحيل ويذبحك وانت تناظره ولكن يتعبك في البلد
والصوره توضح ذلك




هذه وجهة نظر راعي الكبسوله

[المسـافر]

خخخخخخخخخ اكيد احب كل الموديلات

بس الصراحة موديل 98 افضل من 97 بكثيييير من ناحية الشكل وغير كذا شكل 98 انتهى في 2000 عكس هذاك اللي انتهى في نفس سنته 97 ....