السلام عليكم يا احلى منتدى أعذروني صدري ضايق ولا اقدر اطول فبدخل في الموضوع بسرعة
ذهبت يوم الأحد الفائت الساعة 8 لصيانة تويوتا فرع الخبر الرئيسي على اساس ان سيارتي (الملكة الفضية) ماشية 10,000 ألاف كيلو وانلطعت يمكن نص ساعة الى ان رحت كلمت مدير الصيانة الأخ وجدي ونادى لي مهندس وقالي هذا بيضيطك المهم المهندس استلم السيارة (صيانة دورية وبعض المشاكل) وقالي سيارتك تخلص الأسبوع الجاي قلت له واجد قال والله عندنا زحمة ونبي نشتغل على السيارة ونطلب قطع الغيار على الراحة
المهم انا رحت إستأجرت سيارة من فرع شركة المفتاح اللي في الوكالة ولانها كانت فترة اختبارات عندنا في الجامعة ما جيتهم الا امس الساعة 2 وكلمت المهندس وقالي اهلين وسهلين تفضل وجابلي شاهي وقهوة شوي ويقوم يحب على راسي ( الزبدة انا شكيت وقلت وش القصة وش هالحب اللي طلع فجأه) المهم وعشر دقايق الا وسيارتي طالعة واجي ابي اركب الا الاخوان مشغلين المكيف على الهاي ومشغلين لي المسجل( انا قلت لا يا عمي في شي غلط) المهم واتذكر الشخص الطيب اللي معانا في المنتدى يوم قال شيك على سيارتك قبل ما تطلع من الوكالة المهم نزلت الف على السيارة الا يا عيال حاكين بالصدام الخلفي والصدام الأمامي وعاوجين اللوحة الخلفية و حاكين بالباب حق الراكب وضاربينه
يا شيخ لميت عليهم الله وخلقه حرام يا عالم سيارتي 2008 وماكملت شهرين معي المهم جا مدير الصيانة وقالي بندفع لك قيمة السيارة الي انت مستاجرة وتعال لنا يوم الاربعاء نتفاهم
فابي نصيحتكم تكفون وش الحل هل اخليهم يسمكرونها ( معى انه حرام سيارتي 2008) او يبدلون لي الباب والصدامين ( أخاف ما يضبطون التركيب واطيح في مشاكل تنسيم وما الى ذلك) أو ارفع فيهم خطاب الى الغرفة التجارية ولليابان اطلب في سيارة جديدة( حيث انه قيمة سيارتي طاحت بعد اللي سووه فيها)
وياليت تقولون لي وشلون انزل الصور علشان احطها لكم وتشوفون اللي انا شفته
والله لا يوريكم مكرووه
حسبي الله ونعم الوكيل عليك يا عبداللطيف جميل أنت وعمالك 
