[الهيزم]

السلام عليكم ورحمة الله وبركاته

أبي كفرات تكون لينة بالحيل ومريحة لان دوامي يبعد 100 كلم

طبعاً غير كفرات الهانكوك ،، لاني سألت عنها ويقولون ماهي حقت كرف ..

بسرعة تصعرر وخفيفة مع الجوانب ..

ولهذا عطون شوركم ،،

1 - هل البرجستون لهذي الدرجة غير مريحة ؟..

2 - هل الدنلوب ألين وأريح من البرجستون ولا حول بعض ؟..

3 - وش رايكم : أغير كفرات البرجستون ،، ولا أتوكل على الله وأستخدمها ..

الله يجزاكم خير وآسف على كثرة الاسئلة ؛؛ لكن تحملونا جديدين على الشغلة ..

[متفائل بن فال]

وعليكم السلام ورحمة الله وبركاته
أنا اشوف كفرات الدنلوب جيدة خصوصا أنها تجي شد بلد على الجيوب اليابانية كالبرادو واللاندكروزر .

[عاشق الفورشنر]

والله انا ناوي اركب كفرات تويو يمدحونه مررره يقولون انها لينه جدا وطبعا ( يابانيه ) وعارف ناس مستخدمينها كثير على فان وعلى باترول ويقولون انها لينه و مريحه انا احتري البرجستن تندق وابغيرها تويو

[أبو سرور]

انت اللحين استخدم البريدجستون لأنها حسوفه تبيعها وهي توها جديده

واذا بغيت تغير أفضل الكفرات هي عندك الدنلوب واليوكوهاما ..

الله يعين ويوفق

[الهيزم]

الله يجزاكم خير يا شباب

يعني الدنلوب تتوقعون هو أفضل شي ،،

أتمنى يرد علي شخص جرب أكثر من نوع ويعطينا تجربته ..

[متفائل بن فال]

هذا رابط لتجربة أحد الأعضاء لكفرات الدنلوب


التجربة بعد تغيير كفرات الفورتشنر

وهذا رابط لنقاش سابق للأعضاء عن كفرات الهانكوك


كفرااااااااااااااات

[رنديفو]

انت الأن استخدم البرجستون واشبع منها وبعدين غير كفرات الدنلوب وترى كفرات الدنلوب ما تحتاج مديح شفها على الجيوب بنسبة عالية

[عــــازف وتـــر]

دنلوب وانا اخوك

[الهيزم]

الله يجزاكم خير ،، ويبارك لنا ولكم ،، ويسهل أمورنا وأموركم ..

[الـــديـــم]

وعليكم السلام ورحمة الله وبركاته

الدنلوب أريح من البريجستون ويمدحون التويو لكن ما جربتهن
وبالتوفيق ان شاء الله

[محمد بن عمر]

انا عن نفسي مركب هانكوك وبصراحة إلى الآن مرتاح معها وشف عندك في المواضيع موضوع لي بأسم (صور موتري بكفرات الهانكوك) .

[الهيزم]

الله يعافيكم يا شباب ..

[خالد_]

انا ركبت هانكوك ومرتاح جداً منها ، احس بتغيير كبير بعد تغيير الكفرات الاصلية
بعتها عليهم بـ 400 ريال بعد مامشيت عليها حوالي 35 الف كلم بشارع الغرابي

[الهيزم]

ما شاء الله الله يبارك لك

حيرتونا بين الدنلوب والتويو والهانكوك !!

[ابو رئام]

يا خوي تراك معلقني !! عزمت تبيع وإلا أشتري ؟

أرجو الرد يا مال العافية .

[الهيزم]

أخي العزيز أبو رئام

أنا بالدمام يا عزيزي

والسيارة تطلع بكرا أو بعده إن شاء الله

فيه واحد من الشباب بيروح للرياض بكرا أو بعده

تبي أرسل الكفرات معه ،، وإذا وصل للرياض على طول تتواعد معه وتستلم الكفرات وتسلمه الفلوس ..

وش قلت بالفكرة أولاً ،،

ثانياً : أنا سمح بالبيع لأبعد الحدود ،، لكن ما تحس إن ألف ريال شوي ..

ما ودك تخليه 1200 ريال ( شامل التوصيل إلى الرياض )

لاحظ إن الكفرات سعرهن تقريباً 1700 ريال ،، يعني يطيح عليك 500 ريال .. والكفرات ما يحتاج جديدة ..

وش رايك ؟.. إذا حازت الفكرة على رضائك ،، إرسلي رقم جوالك علشان أتصل عليك بكرا أو بعده (حال خروج السيارة)

وننسق الوقت والمكان لإتمام البيعة ،، رد علي اللحين لو سمحت علشان أرتب أموري ..

الله يكتب مافيه الخير ..

[ابو رئام]

أخي الكريم الهيزم
السلام عليكم
الحقيقة الكفرات بالوكالة (تايلندي) بـ 440 ريال والياباني بـ 420 ريال ، وبرا بـ 400 ريال . وكفراتك تعتبر بحكم المستخدم . ويشهد علي ربي أني ما أبخس كفراتك ، لكن السوق طلب وعرض وأنا فتحت الباب بـ 1000 ريال وما فيه أحد زاد ولا بريال واحد ، وما عندي إلا هالألف ويشهد ربي أني بأركبها على موتري ، فإن عزمت فتوكل على الله وخل البيعة تمشي وإلا فستخر وأستخدمها أفضل لك ووفر دراهمك وعساك سالم وغانم .

وأن بعت فبلغني وأسجل لك رقم جوالي والسلام عليكم ..

وعجل علي ..