السلام عليكم ورحمة الله و بركاته
من فترة وانا اشوف شباب يسالو عن العزم في سياراتهم الكورولا انو بيضعف بشكل كبير
واليوم-حابب اكتبلكم موضوع خاص وحصري في تويوتا العربية - وهو خلاصه عن تجارب مررت بها بنفسي
اولا وزي ما انتو عارفين ان الكورولا يجي منها 3 انواع
كورولا 1300 - كورولا 1600 - كورولا 1800
وراح اتكلم عن كل نوع فيهم
اولا كورولا 1300
مكينة السيارة صغيرة - من مميزاتها انها اقتصادية جدا في البنزين
عزمها جيد لكن على قد حجم المكينة
ممكن تركب عليها قطع لتزيد عزمها لكن بوجه عام - هادا النوع من الكورولا ما ينفع للمطارحات الا اذا حطيت قطع تلغيم فيها
تانيا كورولا 1600
مكينتها اكبر من الكورولا 1300 وسيارة خفيفه وحلوة من الناحية الاقتصادية - تتميز بقوة المكينة وخفة المحرك بوجه عام - وكمان ميزتها انها في القومات مرة السيارة ممتازة - لكن خط - ما قيد جربتها خط
ممكن تركب عليها قطع وتزيد عزمها - ووقتها ممكن تتطارح مع اي سيارة حتى لو كانت 2.4
تالتا كورولا 1800
مكينتها كبيرة جدا - عزمها عاد ما يحتاج - مكينتها قوية قوية الى ابعد الحدود - وممكن كمان تركب عليها قطع تزويد وتخليها بقوة اكبر من حجمها - تنفع في القومات مع اي سيارة - لكن في الخطوط مو مع اي سيارة ممكن تفشخها خط - لكنها لما تدعس تدعس السيارة و تفشخ
ايش هي اسباب ضعف العزم في السيارة
اسباب ضعف العزم كثيرة - وهي
1- قدم السيارة - يعني يكون مر عليها تقريبا كم سنه بدون اي تعديلات ميكانيكية بالسيارة او صيانة و تغيير فيها
2- الدعس المستمر في السيارة - يعني لما الواحد يدعس في السيارة على طول - المكينة تتاكل وتتعب بشكل كبير جدا
3- عدم تغيير الفلتر الهواء و السيفون و فلتر البنزين و البواجي و البخاخات كل فترة دورية
4- زيادة وزن السيارة كوضع جنوط او سيستم في الشنطة
5- عدم وجود خبرة للسائق - يعني مو كل من شات كورة لعيب
6- بودي السيارة - فلو كان في طعجة في السيارة او انو الصدام ماهو ماسك - هادي كلها عوامل تقلل من عزم السيارة
7- وجود قطع بالسيارة تنزل العزم زي اجهزة الباك فاير و الاجهزة الكهربية
ايش ممكن الواحد يسوي عشان يزود عزم السيارة
عشان نجاوب على هادا السؤال لازم ندرس البيئة العامة للسيارة
فلو كان موديل السيارة قديم - في حاجات لازم تصير
ولو كان موديل السيارة جديد - في حاجات تانية لازم تنحط بالسيارة
وجايكم في الطريق بالطرق
في حالة السيارة القديمة
انا اشوف انو فلازم الواحد يسوي الحاجات التالية ليزيد من عزم السيارة
1- خرط المكينة و توسيع البساتم
2- التاكد من صلاحية صندوق التروس - الجيربوكس -
3- تركيب بواجي رياضية و اسلاك اسلاك بخاخات رياضية
4- تغيير فلتر البنزين و مروحة السيارة
5- تخفيف وزن السيارة كتركيب كبوت فيبر او بلاستيك و تخفيف وزن الصدامات الامامية و الخلفية
6- شنطة السيارة دايما تنحط فيها حاجات الواحد يشوف انو ما منها اي ضرر - لكن اي حاجة حتى لو كان سيستم او حتى الاستيبنة يؤثر على السيارة
7- جنوط السيارة و كفراتها - الجنوط الوكالة جيدة - ولكن في جنوط رياضية خفيفة - وتركب على كفرات او اطارات رياضية
8- تركيب انتيك رياضي او فلتر رياضي - مع تركيب قطعة اسنها ماجك جت مع الانتيك راح يعطي السيارة قوة 15 حصان الى 25 حصان زيادة
9- تركيب اكزوز رياضي افضل على السيارة بشرط - تلغي فلتر الرصاص نهائيا - او انك تركب كاتم صوت - مع مراعاة انو كاتم الصوت لازم يتغير كل سنة الى سنتين - و تغيير الدبة الاخيرة للسيارة بدبة او شكمان رياضي - وهادا الشكمان يخلي العادم الخارج من مكينة السيارة يخرج بشكل كبير و افضل للسيارة
10- تركيب كلتش رياضي و تغيير فحمات الكلتش كل فترة
11- تركيب جناح رياضي - انا قلت رياضي - لانو الجناح هادا فيه زوايد تساعد على فك الهوا في حالة السرعة و تزيد من مرور الهوا على خارج السيارة بشكل افضل - ملحوظة اتاكدت بيها بنفسي شخصيا على سيارات مختلفة -
12- استعمال بنزين 95
13- في السيارات القديمة جدا واللي مافيها بخاخات - لكن فيها كربريتر - غير الكربريتة كاملا
طيب - هادا في حالة السيارات القديمة اللي مر عليها اكتر من 5 او 6 سنوات او حتى 10 سنوات
طيب ايش نسوي في حالة السيارة اللي موديلاتها جديدة وما مر عليها الا سنتين تلاتة او دوبها خرجت من الضمان
في هادي الحالة في قطع لازم تركب و قطع لازم تتغير سواء في الشركة او خارج الشركة و القطع اللي لازم تركب و الحاجات اللي لازم تصير في السيارة هي
1- استعمال بواجي رياضية
2-تركيب فلتر رياضي مع ماجك جت
3- تركيب اكزوز رياضي - راجع المعلومات اللي كتبتها في السيارات القديمة فوق -
4- تركيب سوبر شارجر
5- تركيب كام شفت في السيارة
6- تخفيف وزن السيارة - لاحطو انو الوزن انا مركز عليه لان الوزن من الاسباب الكبيرة لتنزيل العزم
7- تغيير البخاخات من عادية الى بخاخات رياضية
8- تغيير فحمات الكلتشات
9- تركيب كفرات رياضية ومرنة
10- استعمال بنزين 95
طبعا في قطع تانية رياضية - لكن تركيبها جدا صعب وما تسوي شي الا بس حركات وخلصنا
وكمان في حركات او بمعنى تاني مشاريع اذا صارت بالسيارة تكون طيارة نفاثة - مو سيارة نفاثة - زي تغيير دفع السيارة من امامي الى خلفي
طبعا ما ننسى يا شباب انو السيارة لازم تكون في حالة ممتازة من شغل سمكرة وتوازن السيارة وترصيص الكفرات وتناسب المساعدات و سوست السيارة وسلامة العكوس
في شي كمان نسيت ما اقولو
وقت المطارحه - قفل الشبابيك والتندة والمكيف يريح المكينة و يخليها يعطي عزم بشكل مرتاح و قوي كمان
ولاحظو كمان انو في حالة القير العادي يكون افضل من القير الاوتو
وكمان الموضوع هادا من عندي انا - ماهو منقول او اي شي - ان اتوفقت فيه - فمن الله و الحمد لله - وان غلطت في نقطة او نسيت شي فيه - فالعذر و السموحه منكم
والسلام عليكم ورحمة الله
مشكلة العزم في الكورولا - موضوع حصري لتويوتا العربية 
