[ناطق الحق]

أخوكم ناوى يشتري لاند كروزر gx v8 ولكن اسكن في دور علوي مستأجر وسط حاره( السويدي الغربي ) بالرياض وليس على شارع عام وليس عندي مدخل سياره
أخاف اقوم يوم وما القى الا مكانه فالحراميه كثر الله لا يكثرهم
او القاه كل يوم والثاني على بلك مشلح جنوطه وكفراته والا مكسورة زجاجه ومشلح مسجل وغيره

قد يقول البعض ما دام هذا وضعك ليش ما تفكر بيت ملك أصرفلك وخلي السياره بعدين

فاقول فكرنا وبحثنا عن بيت ملك ولكن العقار طاير هاليومين قلنا خلنا نحولها الآن سياره على أمل العقار ينهار أو يخف شوي وبعدين نأخذ بيت ملك

فهل تنصحون أخوكم بالتوكل على الله والشراء أو تأجيل الفكره ,, مع أن الفلوس بدت تنقص شوي شوي

[عـاشـق ربـع]

صـراحـة البيـت أهـم ومثـل ما تقـول أنـك بوسـط حـارهـ وممـكن ينسـرق فيـروح عليـك الموتـر والبيـت
أستخـر وأنـا من وجهـة نظـري لا تستعجـل على المـوتر لأن يمكن السنوات القادمة تتغير المكيـنه

واللـه أعلـم

[بلاك كفي]

اللي اعرفه وسمعت عنه ان احياء جنوب وغرب الرياض السرق عيني عينك وياصل في بعض الروايات لحد سرقه بالاكراه الله يستر علينا وعلى المسلمين لاكن المشكله انتقلت لتشمل شرق وشمال الرياض لذلك اصبر وقيمة الجيب حطها على اللي عندك وبيت بشمال الرياض اهم شئ البيت السياره امرها هين لو تاخذها بعدين اقساط اهم شئ البيت اصبر وانا اخوك شوري عليك السياره الغاليه من الكماليات اما البيت من الاساسيات وان شاء الله قريبا نسمع عن انهيار سوق العقار زي ماصار انهيار بسوق الاسهم خل الناس تشتري بيوت ملك وترتاح نفسيآ وانا اولهم:d

[سلطان الدمام]

ال جي اكس 8 سلندر سعرها مع كم الف تجيب لك شقه ملك

انا رائي تاخذ لك شقه ( بيت غالي على وضعك )

وسدد كم سنه السياره لاحق عليها

تراني كنت نفس مشكلتك وشريت بيت قبل ارتفاع الاسعار والحمد لله

وشريت 2008

وبالتوفيق انشاء الله

[بنت الخران]

الصراحه

ابيت من اول الاولويات فى كل شي

وبعدين السياره

والله يعيينك

ولا تنسى تستخير ربك

[راعـ( كروزر)ـي]

الصراحة أنا أشوف ان البيت أكثر أهميه من السيارة الحين
وبعدين خل سالفه الفلوس على الله ... وبالذات أن السيارة
في تطور مستمر من ناحيه ومن ناحيه أخرى سالفه السرقه

وعلى رأي المثال " حمارك الأعرج يكفيك عن سؤال اللئيم "

والنصيحة دورلك بيت ملك أصلح لك وأجل أمر السياره وللأمام ...

[غير شكل]

الي شار عليك بالسيارة هذا شورة مهوب صحيح مع الأسف
والشباب كلهم ماقصروا وشارو عليك بالبيت أو الشقة التمليك
إذا كانت الفلوس ماتكفي لشراء بيت أو شقة تمليك
مافيه أمامك إلا شئ واحد والله يعينك عليه وتصبر شوي
وهو إنك تاخذ لك سلفة من الراجحي مثل إنك تاخذ لك أسهم وتبيعها
أو تاخذ لك دداسن أو اي سيارة وتبيعها وهذا تورق حلال إلاّ من بعض العلماء
من قال منهم لايجوز ولكن للضرورة القصوى وأنت أدرى بضرورياتك
وزي ماأنت شايف في منطقتكم السرقة على عينك ياتاجر
علشان كذا شوري عليك ونا أخوي وشور الشباب كلّهم إنّك تاخذ لك بيت
وسؤالي لك ياخوي...
أنت هالحين ماعنك سيارة تمشي حالك فيها؟؟ أعتقد نعم والله اعلم
إذا كان كذا فالبيت أبرك وأطيب لك
وعلى حسب مااشوف في معلومات عضويتك عندك سيارة موديل 2003

أجل ياخوي اسمح لي أقل لك ليش التبذير
خل موترك معك وخذ لك بيت أحسن لك
وأهم شئ الإستخارة ونا أخوك
وأنا لك ناصح والله يوفقك
وجزاك الله خير

[ناطق الحق]

أخواني /
1- عاشق ربع
2- بلاك كفي
3- سلطان الدمام
4- بنت الخزان
5- راعـ( كروزر)ـي
6- غير شكل

أشكر لكم جميعاً نصحكم وتوجيهاتكم التي تدل على معدنكم الطيب وحبكم الخير للناس وشعرت أنها صادره من قلوبكم ,,
ولعلنا بعد أن أستشرنا هالوجيه الطيبه نصلى صلاة الاستخارة وعسى الله يكتب اللي فيه الخيرة

[ابوعقل]

الله يعين كم يا اهل الرياض

كل شوي زايدين الحراميه

وين الشرطه عنهم

لا والله البيت احسن

والسياره اذا شريت بيت فيه بايكه((كراج))

اشتر موتر

والله يعينك ان شاء الله

[الطريق الصعب]

الحافظ الله والخير واجد وموجود والشر الله يكفيناه موجود. وأنا أشور عليك تنتظر شوي العقار بينزل عن هالاسعار وبتنزل الاراضي بعد لأن فيه تشبع ولا فيه طلب على السكن إلا للتغيير وليس للحاجه وشراء شقه من الجاهزات مو قرار صائب لأنها المفروض تكون ممتازه بكل شيء لدرجة تكون هي بيت العمر وإذا أغناك الله تكون للثانيه. والرسول صلى الله عليه وسلم يعجبه الفاءل الحسن !

[برهان]

ناطق حق المفروض على اسمك

اول شي انت اتكلم عن شي في الغيب مايعلمه الا الله يعني تكلمت عن الحراميه


الله لايقدر لونفكر تفكيرك كان ماتعدينا بيوتنا ولا شرينا سيارات ولابيوت ولاشي

تكون حياتنا ستاندر

كل هذا خوف من شي ماندري عنه ولاوشو

[غير شكل]

المشاركة الأصلية كتبت بواسطة برهان

ناطق حق المفروض على اسمك

اول شي انت اتكلم عن شي في الغيب مايعلمه الا الله يعني تكلمت عن الحراميه


الله لايقدر لونفكر تفكيرك كان ماتعدينا بيوتنا ولا شرينا سيارات ولابيوت ولاشي

تكون حياتنا ستاندر

كل هذا خوف من شي ماندري عنه ولاوشو

أخوي برهان يالغالي
كلامك مضبوط وصحيح وعلى العين والرأس يابو الشباب
لكن أنت وش رايك هل البيت افضل ولا السيارة في حالة أخونا ناطق الحق
أنت شف وضعه وشلون هو ساكن
وبما إنه الآن عنده سيارة...من باب اولى إنه يشتري بيت أفضل له
وممكن ياخذ له بيت على البنك العقاري (يعني يعطي صاحب البيت مبلغ وهو يكمل دفع الفلوس للبنك العقاري) وهذا شئ معمول فيه عندنا
ولأن السيارة ونا أخوك بحالة أخونا صارت كماليّة بحكم إنه عنده سيارة موديل 2003
وممكن سيارته تعيش سنوات لقدام ومافيه مشكله بإذن الله
لذلك حنا نصحناه بأنه يشتري بيت افضل له
وكذلك لاتنسى إن السيارة يبي لها مصروف من زيت وبنزين وخلافه أكثر من السيارة الي معه الآن
لذلك إقترحنا عليه إنه يشتري بيت افضل له
هذي وجهة نظري ووجهة نظر الشباب
جزاك الله خير وبارك الله فيك

[ابـن الريـاض]

انا ما اشجعك تشتري سيارة وتوقفها خارج المنزل خصوصا في الرياض سرقة السيارات كاثرة وانا سبق انسرق لي سيارة وش شرايك تشوف لك شقة تمليك في مشروع القصر حتى لو تاخذها بالتقسيط وتدفع اللي معك مقدم واذا مالك رغبة تسكنها تقدر تاجرها وباجارها تقدر تستاجر في مكان اخر.

[ناطق الحق]

المشاركة الأصلية كتبت بواسطة برهان

ناطق حق المفروض على اسمك

اول شي انت اتكلم عن شي في الغيب مايعلمه الا الله يعني تكلمت عن الحراميه


الله لايقدر لونفكر تفكيرك كان ماتعدينا بيوتنا ولا شرينا سيارات ولابيوت ولاشي

تكون حياتنا ستاندر

كل هذا خوف من شي ماندري عنه ولاوشو

مشكور أخوي برهان على تشريفك وتعليقك على الموضوع ,,, وانا عندما ذكرت الأشياء فانا اتكلم عن شئ محسوس وواقع سيارتي الكامري 2003 تعرضت للكسر أكثر من ثلاث مرات وسيارتي اللى قبلها أكثر من ثلاث مرات أيضاً وسيارة جاري ( الدور الأسفل ) قام الصباح ما لقى سيارته عند الباب

[السياغي]

صلي صلاه الاستخاره

وبعدين قرر