[ابافيصل]

الصراحه ابي رايكم
فى الفورتشنر الاربعه سلندر دفع ثنائي اوتوماتيك
انا ماني راعي بر وابي سياره رفيعه وتكفى سبعة اشخاص ودورت فى السوق مالقيت سياره تجمع كل هذا الا الفوتشنر
سياره رفيعه وثلاث اسيات وصغيرة وياباني وتكون تويوتا
الصراحه بعد سعرها اعجبني لقيتها بلوكاله 76850 ريال
من جرب السياره يعلمني

[الحسن القاضي]

بغض النظر عن البر والمكاشيت ياطويل العمر
أنا ما أنصح أي أحد بالأربعة سلندر العزم ضعيف جداً
وسيارة كبيرة بـ 158 حصان أعتقد إنها غير مناسبة .
صحيح أنها عائلية وتأخذ 7 أشخاص لكن كما قلت العزم ضعيف..

[ابافيصل]

يعطيك العافيه اخوى القاضي
وتحسب اني ما ودي بلسته بس قيمتها 102500 ريال
والمبلغ ما يوفي والله يعين

[الحسن القاضي]

بإذن الله تزين الأمور ياطويل العمر أنا عاد تورطت بالأقساط وخلصنا
من وين نجيب حق الكاش وأنا خوك ..الله يعينا وياك والمسلمين.

[ابافيصل]

هذا بلا ابوك يا عقاب

[يالله من فضلك]

هلا أخوي ابوفيصل
مافيه شك الستة أفضل واقوى
لكن اذا الميزانية ما تسمح ماباليد حيلة خلاص
توكل على الله والاربعة ممتاز
بس بشرط يكون دبل
ما أنصح بالدفع الثنائي
أقل الأيمان السيارة يكون فيها دبل طالما هي جيب
حاول من هنا ومن هنا والله يسهل أمورك
ويرزقك السارة اللي تطيب خاطرك

[ابافيصل]

يالله من فضلك

حياك الله وشكلها كذا اربعه سلندر اووماتيك 4x4

[رياض الرياض]

يالربع أنا معي 4 سلندر قير أتوماتيك بدون دبل زي الحلاوه ماشاء الله
لاتخوفون الرجال

[محمد بن عمر]

انا جربت الأربعة سلندر قبل ما اشتري الستة السلندر بصراحة ثقيل وعزم ضعيف لكن زي ما قالو الاخوان خذ على الأقل بدبل عشان لا قدر الله تحتاجه يوم من الأيام لا تأخذ دفع ثنائي

واستخر الله والله يوفقك وإن كان امكن تأخذ الباقي اقساط وتشتري ستة يكون افضل

[ابافيصل]

يالله من فضلك
ومحمد بن عمر

هلابكم واسعدني مروركم

[لا تنسى ذكرالله]

المشاركة الأصلية كتبت بواسطة ابافيصل

الصراحه ابي رايكم
فى الفورتشنر الاربعه سلندر دفع ثنائي اوتوماتيك
انا ماني راعي بر وابي سياره رفيعه وتكفى سبعة اشخاص ودورت فى السوق مالقيت سياره تجمع كل هذا الا الفوتشنر
سياره رفيعه وثلاث اسيات وصغيرة وياباني وتكون تويوتا
الصراحه بعد سعرها اعجبني لقيتها بلوكاله 76850 ريال
من جرب السياره يعلمني

لا أزيد على كلام الشباب شئ

ولاكن للمعلوميه الفور شنر ليس ياباني انتبه يوجد معاي vx أندونيسي ولاكن أهم شي ولله الحمد شعار تويوتا الذي لا يعرف باذن الله التعب أو الملل أو النكد .

واذا ميزانيتك لا تكفي خذلك اربعه سلندر مع الدبل وذلك للحتياط فقط اذا طلعت أنت والاهل أو على الاقل توهقت في رمل ما تتصل على أحد أو تطلب مساعدة أحد وحتى في البيع يكون أفضل ومرغوب

وعلى قولت المثل ( انفخ ياشريم قال مامعي دراهم ) ههههههههههههه خاصه للي يفهم المثل ؟

مجرد نصيحه : اذا تقدر تقسط خذلك سته سلندرات أفضل لك ( ماقلنا ادفع كاش ) اذا تقدر واذا ماتقدر مالك الى الاربعه سنلدرات دفع رباعي .

الله يوفقك ولا تنسى الاستخاره دائماً وأبداً

[ابافيصل]

لاتنسى ذكر الله
يعطيك العافيه والله يعين
الصراحه جاني جنان من السيارات والله يسهل الامور

[الخاطوف]

انا 4 سلندر عااااايدي والعزم ممتاااااااز 2008 وبودون دبل

[الهيزم]

إذا أنت راعي سرعة وسواقة هبال وتطعيس أقشر

الستة سليندر ازين اكيد

أما إذا كنت راعي عايلة وسواقتك راكدة ومامن سرعة وطلعات البر للتمشي وتشرب شاهي ومروق المنقى

توكل على الله ولااااااااااااااااااا تتردد ، خذ gx1 أو gx2 أربعة سليندر

أنا عندي gx1 تماتيك ودبل ( ركبت عليه خطوط (لزقات) 2008 لانه بدون خطوط )

وما شاء الله تبارك الله

لا تكثر تفكير نصيحة لوجه الله

زي ما قلتلك ،، إذا انت عزوبي ودايم مع الشباب 6 سليندر

وإذا أنت راعي عايلة وهادي بالسواقة 4 سليندر وأنت مغمض يوسع صدرك وزيادة

ووالله نصيحة حطه في بالك داااااااااائماً

القناعة كنز لا يفنى

لانك إذا فكرت بالستة تبي تفكر بالبرادو ،، واذا فكرت بالبرادو تبي تفكر بالفكس آر

وإذا فكرت بالفكس آر تبي تفكر بالفورتشنر gx1 < < < هذا البجيح اللي يبي يتصفق

الله يوفقك دنيا وآخره ويسهل أمورنا وأمورك ويحسن خاتمتنا وخاتمتك

وترى الدنيا عبر وأنا أخوك ..

[ابافيصل]

المشاركة الأصلية كتبت بواسطة الخاطوف

انا 4 سلندر عااااايدي والعزم ممتاااااااز 2008 وبودون دبل

يعطيك العافيه يا الخاطوف والله يسهل الامور

[ابافيصل]

المشاركة الأصلية كتبت بواسطة الهيزم

إذا أنت راعي سرعة وسواقة هبال وتطعيس أقشر

الستة سليندر ازين اكيد

أما إذا كنت راعي عايلة وسواقتك راكدة ومامن سرعة وطلعات البر للتمشي وتشرب شاهي ومروق المنقى

توكل على الله ولااااااااااااااااااا تتردد ، خذ gx1 أو gx2 أربعة سليندر

أنا عندي gx1 تماتيك ودبل ( ركبت عليه خطوط (لزقات) 2008 لانه بدون خطوط )

وما شاء الله تبارك الله

لا تكثر تفكير نصيحة لوجه الله

زي ما قلتلك ،، إذا انت عزوبي ودايم مع الشباب 6 سليندر

وإذا أنت راعي عايلة وهادي بالسواقة 4 سليندر وأنت مغمض يوسع صدرك وزيادة

ووالله نصيحة حطه في بالك داااااااااائماً

القناعة كنز لا يفنى

لانك إذا فكرت بالستة تبي تفكر بالبرادو ،، واذا فكرت بالبرادو تبي تفكر بالفكس آر

وإذا فكرت بالفكس آر تبي تفكر بالفورتشنر gx1 < < < هذا البجيح اللي يبي يتصفق

الله يوفقك دنيا وآخره ويسهل أمورنا وأمورك ويحسن خاتمتنا وخاتمتك

وترى الدنيا عبر وأنا أخوك ..

هلابك اخوى الهيزم
انا معى قراند ماركيز اقصى سرعه سقتها بخط طويل وانا رايح الطائف 140 وانا متخوف
بيني وينك انا ما احب السرعه خير شر
وكنت ايام العزوبيه على الخطوط الطويله الشبيبه على الخط يدورون المجاكره وغمزات بالاشاره للمجاكره لكن طاحوا بشايب على هيئة شباب
السرعه ما ادانيها وانا ولله الحمد متركد بسواقه وشعاري دايم اصل متاخر خير من الا اصل
وحتى الشباب اذا سافروا معى يرتفع ضغطهم لاني دايم على سرعه 110 الى 120
واذا تهورت وصلت 140
والله يسهل الامور
واكثر ضنى gx
وربك يسهل

[الهيزم]

أجل توكل على الله ولا تتردد

صل صلاة الاستخارة وأقدم ولا راح تندم بإذن الله تعالى

وأنصحك خذ جديد ،، لا تدور مستعمل نظيف

والله الجديد أفضل بمراحل

آخذ كورلا جديد ولا آخذ برادو مستعمل

الجديد يوسع الصدر

وأخيراً الله يوفقك دنيا وآخره

الله يحييك حياة السعداء ويميتك ميتة الشهداء