[البحث عن المصير]

فيه ثلاجات حصلتها لكنها تأخذ مساحة من صندوق الأمتعة *
*فهل شراؤها مجدي؟
*ولمن جربها يفيدنا ماهي إيجابياتها وماهي سلبياتها؟
*وهل هناك أنواع جيدة معروفة لنبحث عنها؟
*وهل هي مهمة؟ ومتى تكون مهمة لاسيما وجود البقالات في كل مكان؟

[ابو راكــــان]

اخي العزيز الثلاجه مهمه في اوقات السفر او الخروج للبر اما الثلاجه اللي انت لقيت شكلها كبيره مره
انا اعرف ان فيه ثلاجات حلوه وصغيره نسبيا وتوضع امام مقعد الراكب واتوقع انك تجدها عند المحلات الخاصه بادوات البر مثل رحال وغيرها
والسلام.........

[خالد_]

والله ياخي الثلاجات الجيدة غالية جدا تخليك ماتفكر ابدا تشتري ثلاجة

شفت بعض الانواع الرخيصة بحدود الـ 250 ريال لكن الجودة لك عليها والتبريد ضعيف جداً

بعد ماتعبت من البحث عن ثلاجة لاني محتاجها بشكل كبير لاني دايم مسافر خصوصا بالصيف بالاضافة لطلعات البر

اشتريت ثلاجة فلين بـ 20 ريال ، ويمكن شكلها معروف تباع عن محلات البلاستك وفيه منها صغير بـ 10 ريال

اعبيها ثلج واحط اللحم والعصيرات اذا صرت طالع للبر وماشتكيت منها ابد ، مع ان يجيها بعض الكدمات من الحطب والعزبة لكنها سميكة وتتحمل وتحفظ البرودة اذا صكيتها زين

وام 10 ريال الصغيرة اخذها للسفر ، ومكفية وموفية ولا ثلاجة بـ 1500 ريال

ويمكن الاخوان عندهم رأي افضل

[أبـــو عـــزام]

صادق أخوي خالد.. لكن ترا الفلين حق طلعه طلعتين وبعدين خلاص ما ينفع جربته بصراحه يكفي ويوفي وأنت ومحافظتك عليه.

لكن شف وأنا أخوك يا (البحث عن المصير) إذا وصلت لثلاجة كبيرة خذ الحافظات الكبيرة أتوقع من شركة (قووت)

اللي تحط فيها ثلج وتشيل كثير وتكد معك 10 سنوات بالراحه.

وإن كانك تدور ثلاجة صغيرة للمويه أبو ريال والببسي عندك ثلاجات في ساكو تفي بالغرض وحجمها مابين صغير ومتوسط حسب حاجتك ولا تشيل مكان كبير في السيارة.

(وأحسن شيء إن فيه مخرج تيار 12 فولت في مؤخرة السيارة تشبك فيه الثلاجه)

الله يوفقك بالثلاجة الزينه

سلام

[$ الواثق $]

بارك الله فيك يالغالي

[ابودانـــه]

يأخي ترمس صناعه ممتازه وعبه ثلج بدون تحميل ولا ضغط على بطاريت السياره والله يوفقك

[محمد بن عمر]

السلام عليكم ورحمة الله وبركاته انا بصراحة احترت من ناحية موضوع الثلاجة لأني كنت ابي ثلاجة وعلى قولتكم بشبكها في حق الكهرب اللي في الخلف لكن عندي واحد من الشباب في الدوام قال لي أنه قد شرى ثلاجة من محل الطمره اللي بالغرابي لكن بـ 1500 ريال وانا اشوف أنها غالية جداً لكن الحل فيه ثلاجات اللي تعبى ثلج وتطلع بها معك متى ما تبي انا رحت السوق وشريتها 150 ريال اللي تجي فوق الصغيره وما شاء الله تأخذ كل شي وبصورها لكم واجيب صورها إن شاء الله

[العُلا]

أنا مع أخوي بو عزام حقيقة الثلاجات (الحافظات ) مثل قووت ممتازة جدا ومنها أشكال وانواع واحجام ومنها الأمريكي وغيره .. من كثر طلعاتي ما مره أخذت ثلاجة كهرب أو 12 فولت .. دايم الحافظة وعلى حسب الرحلة نحدد حجم الحافظة ,, وأحيانا نأخذ أكثر من حافظة غن توفرت أكثر من سيارة والثلج يتجلس فيها أكثر من 3 أيام بالراحة ,, ولنا رحلة بالإجازة إن شاء الله حول المملكة وتم تحديد حجم ونوع الحافظة المناسبة للرحلة ..


وفقك الله

[البحث عن المصير]

بيض الله وجيهكم ياشباب وأخص بالذكر(أبو راكان-خالد-أباعزام-الواثق-أبودانة-محمدعمر-العلا)


هذي اللي يحطون فيها ثلج طيبة ولكن مزعجة كل شوي تحط فيها ثلج ويحتاج من فترة لافترة تصرف الموية خاصة إذا كانت كبيرة و لابأس بها وحجمها يأخذلك كل شيء,,,
لكن إللي تشبك بولاعة السيارة تريحك من ثلج وخلافه بل منها ماتجره على كفرتيت لأي مكان تبغاه بماتحوية في الداخل ووجدتها 45لترو55لترأكبر شيء وأسعارها يتراح ما بين 300إلى 650وماعليها تأخذ ماتحتاج إليه

[لا تنسى ذكرالله]

المشاركة الأصلية كتبت بواسطة ابودانـــه

يأخي ترمس صناعه ممتازه وعبه ثلج بدون تحميل ولا ضغط على بطاريت السياره والله يوفقك

كلام 100%

بارك الله فيك وفي الجميع

[فارس القبيلـة]

فيه ثلاجة تبريد وتجميد تصلح لراعي البران ورحلات السفر الطويله وايام الحج جربنها عال العال,,

صناعه الماني اصلي مضمون شرينها 2250 ومع الزيادات الوقت هذا بـ 2850 ريال صح غاليه بس ميزاتها
*.تبريد
*.تجميد
*.صناعة الماني
*.حجمها ممكن 30 × 50 وداخلها وسيع وتشيل واجد
*.يجي لها جراب للحمايه

ودمتم بووووووووود,,

[البحث عن المصير]

الأخ الفاضل(لاتنس ذكر الله)الظاهر هي الحل الأوفر ....



أخي (فارس القبيلة )الفاضل ...غالية ولاتحتاج لكل هذا السعر!! فيه برادات فقط وهي في ساكو من 300-600وأعتقد تكفي وتوفي صح الغالي سعره فيه دائما
أسأل المولى أن تكونوا على الخير دائما ودمتم