[ابو رئام]

في الحقيقة في شي مهم لكل سيارة وفي كل مكان بس للأسف لم أجد له مكان بحيث إذا بغيته لقيته .. ألا وهو علبة المنديل ...

يا جماعة الخير الحقيقة أحترت في مكان المنديل مره تلقاه على الأرضية قدام أو مرتبة الراكب وإذا ركبت المعزبة نطلته ورا، ومره تلقاه في المرتبة الخلفية وما تدري إلا البزران لعبين فيه ومخلصينه عليك ، ومره تلقاه في مكان بعيد ما تقدر توصله يدك وأنت تسوق، وإذا حطيتة على الطلبون تزحلق مع أدنى لفه . والحقيقة دورت في كل زينة السيارات بس للأسف ما لقيت حل يرضيني . وأتمنى بأن ألقى مكان يكون سنتر يصله السائق والراكب بكل سهوله .

شاركوني تكفون ... وين تحطون علبة المنديل ؟

وجزاكم الله كل خير ،،،،،

[ابو راكــــان]

انا مثلك بس تقدر تنجد الطبلون ويكون فيه مكان خاص بعلبة المناديل

[ديسكـفري]

السلام عليكم

في مكان جيد السراحة الي هو بجانب القير بس يبيله تفصيل تلبيسة قير ويكون فيها جيب للمناديل

مثل ماتفضل ابو راكان

[أبـــو عـــزام]

مضبوط كلام الأخوان

فصل لك تلبيسة قير وحط مكان للمناديل على جنب

أو خذ لك تلبيسة مناديل يجي فيها من تحت لزاق أمريكي لصقها على الطبلون

وهونها وتهون

سلام

[المقنع الأسود]

ياخوي انا شفت الحركه هذي بسياره واحد من الشباب مفصل حديدتين على شكل حرف U وشبكها مع بعض وراعى مسافة المنديل وقلل كم ملي علشان يمسك المنديل وعلقها في السقف قدام المرايه بشوي

[الــجــنــرال]

مثل ماقالوا الاعضاء

[أمير الفورشنر]

أحسن حل وهو مجرب عندي

أنك ياطويل العمر تجيب لك 4 مغاطات وتربط المنديل في شماسة الراكب

وكذا أنتهت المشكلة

[أبو سرور]

المشاركة الأصلية كتبت بواسطة أمير الفورشنر

أحسن حل وهو مجرب عندي

أنك ياطويل العمر تجيب لك 4 مغاطات وتربط المنديل في شماسة الراكب

وكذا أنتهت المشكلة

شغل عدل مدل هههههههه

[صاحب الفورتشنر]

في السقف فيه مساكات حديد خاصة للفاين تباع في محال الزينه تثبت في لمبة السقف

وفكرة المطاط بالشماسية جهنميه ههههههه

[ع.ع.ع]

زي ما قال امير الفورتشنر ,,,
افضل وانسب حل برأي ...
تجيب اللصق حق الكتب المدرسيه ,,,
وتثبتها بالمنديل بشماسة الراكب ,,,

[ديموقراطي]

لا بس ما عليك نفس التلبيسة الي يفصلوناه لديكور القير زد عليها من جنب مكان للمنديل نفس الهايلوكسات احلىىى وازين

[ابو رئام]

المشاركة الأصلية كتبت بواسطة ابو راكــــان

انا مثلك بس تقدر تنجد الطبلون ويكون فيه مكان خاص بعلبة المناديل

كلامك صحيح عزيزي ابو راكان ، بس تبي الصراحة تنجيد الطبلون في إعتقادي شيئ من الماضي ويشوه منظر الموتر من الداخل ، وبعدين أصلاً ما فيه إلا لون أحمر خاص بالهايولكس . وشكراً لمرورك يالغالي ،،،

أخوي ديسكفري .. المشكلة أني فصلت وراحت علي فكرة المنديل .. والله يعطيك العافية ،،،


أخوي ابو عزام .. قل أأأأمين .. الله يهون عليك كل أمر صعيب والمسلمين ،،، وشكراً لمرورك . بس هاللزق تهقى ما يأثر على الطلبون ، وبعدين وش المقصود بلزاق أمريكي .

أخوي المقنع الأسود شكراً لمرورك ، بس تبي الصراحة ما همت مضبوط ، ترى فهمي على قدي لا تؤاخذني .

الجنرال .. ما عليك زود . وشكراُ لمشاركتك .

أمير الفورتشنر ،، الحقيقة رأي سديد وفكره سهله وبسيطة ، وبحاجة إلى تطوير ونفكر بالموضوع ، ويا مال العافية يا أمير الشعراء !!!

حياك الله ابوسرور .. وشكراً لتشريفك أخي الحبيب ..

صاحب الفورتشنر ،، بيض الله وجهك أخي الكريم .. بس الحقيقة أن دورت وما حصلت شيئ يناسب ، ولا الفكرة ما راحت عني . عموماً هالساعة المباركة اللي شاركتنا فيها .. .

ع.ع.ع ... شكراً لمرورك .

أخوي ديموقراطي ،، طارة الطيور بإرزاقها وفصلنا وخلصنا وراحت علينا هالفكرة . شكراً لمرورك يالذيب وما قصرت ..

[أيمن الفلا]

هلابك اخوي عندي حاط كرتون المناديل في مخبات الباب

بالتوفيق

[أبـــو عـــزام]

لزق أمريكي مثل اللي يجي في بعض أثاث البيت والموكيت

(تشك تشك) هذا اللي أقدر أوصفه

وما دام الدعوه تفصيل فصل لك ثوب مناديل يركب في الشماسة مثل ما أشاروا عليك الربع

الله ييسر أمورك ويوفقك دنيا وآخره

سلام

[متفائل بن فال]

توجد مناديل خاصة بالسيارة توضع في الدرج الجانبي للباب