ضروري الله يخليكم

[برنجي]

ناوي بإذن الله أشتري لكزس إل اس 460 لارج فل كامل
بخشم الريال وبنطل فلوسها ع الجزمة :d

واضح من لغتي اني متحمس وطفران ولا فيه أمل اشتري الموتر لأن موتري اكورد 2002
لكن الوالد جاي الرياض باذن الله بعد بكرة وناوي يشتري اللكزس ودق علي قال لا اجي الا انت
معطيني أفضل لكزس بالسوق واحسن وكيل ..
قفل السماعة وجتني الدوخة رحت للمعارض وحست حوس فيه فروقات سعرية بين المعارض والوكالات
ويجي صاحب معرض يقول خذ خليجي والثاني يقول ما فيه فرق بين السعودي والخليجي والثالث يقول انحش عن الـ 2008 ترى العزل سيء واشتر 2009 ، علماً أن الشايب ماهو حق جعص وخرابيطنا حنا يالشباب اللهم يبي موتر يريحه يدز به هو ويا مرته الثانية عمره ويجي :d

ما ابي شي يفشلني معاه وعلى باله اني بالرياض اني افت بالسيارات ما درى ان اعلى علمي محلات التظليل بالغرابي :d

[نصرنتوس]

هههههههههههههههههههههههههه

مقدما الله يعطيكمـ خيرها ويكفيكم شرها...!

افضل وكيل وهو الوكيل الوحيد لسيارات تويوتا ولكزس بالسعوديه / عبداللطيف جميل

وبخصوص الخليجي والسعودي - الاختلاف في الوارد بس ويمكن بعض المواصفات اذا منب غلطان ويفرق السعر

2008 - عزلها عادي بعد سرعة 120 راح تحس بأزعاج الهواء <-- من ناحية تجربه

2009 - والله ماعندي علم لاني ماجربتها

ونصيحه توكل على الله وخذها وكاله من عبداللطيف جميل LS460L ( سعودي )

حتى يشملك ضمان الوكاله لانه حسب ماسمعت الخليجي

لايشمله ضمان من عند عبداللطيف جميل

وتقبل مروري واعذرني على الاطاله

[NATO]

انا بعطيك خلاصه للمرحله الي انت فيها يالطيب

السعودي الخليجي نفس بعض لا اختلاف المصنع واحد و شركه تويوتا حاطه معايير صارمه
بخصوص المواصفات للكزس يعني الكلام هذا مفصول فيها ((( المواصفات وحده ))) لا تتعب حالك

و خذ شوري وقيسه ووزنه زين
لا تاخذ غير الخليجي تدري ليش ؟؟؟
السعودي عند عبد اللطيف بـ 350 الف تقريباً
الخليجي عند معرض اليحيى بالنسيم بـ 310 الف تقريباً
ومثل ما قلت لك ما فيه اختلاف

اذا بتشتري جديد خد 2009 لانك اصلاً موب خسران
اذا بتبيعه ما فيه ذيك الطيحه
وغير كذا تسلم من العيوب هذي حقت التنسيم على الرغم
خلق الله يقولون الدفعه الثانيه من 2008 ما صار فيها تنسيم !!!


و بالنسبه للضمان

عبد اللطيف يضمنها لك غصباً عن خشمه حتى لو كانت خليجي
ملزم من شركه تويوتا يعني موب كيفه
بس اهم شيء اول تشييك الف كيلو توديها لهم على طوول
علشان يسجلونها بالكمبيوتر عندهم رقم الشاص

و بالتوفيق

والله الله في اللوحه المميزه


سلاااام

[برنجي]

نصرنتوس ، Nato

الله لا يهينكم اليوم الوعد واقرب مالها خليجي

[نصرنتوس]

نصرنتوس ، Nato

الله لا يهينكم اليوم الوعد واقرب مالها خليجي

ولايهينك يارب

ترى بخصوص اللون بتلقف شوي

لوتاخذ عنابي وداخليه ابيض <-- موبيج

ترى ماشاء الله روعه وفخم

جالس افكر ابدله بالؤلؤي

[برنجي]

والله اليوم يا نصرنتوس قضينا ، لقيت بمعرض الجود ال اس 460 2008 ماشي 8 الاف بس ونظيف صح حاده راعيه بـ 270 الف وقلت للشايب خذه والله انه ارسم من الابيض اللولي عطاني نظرة احتقار ومشى ، عاد لفينا المعارض ويوم شاف فرق السعر بين الخليجي والسعودي مرينا اليحيى لقينا عنده 2008 مقاعد مفصوله بـ 310الاف عداد اصفار بس الداخلية حقته كحلي .. سلامات كراون !
ولقينا 2009 لولي والداخلية بيج فاتح او ابيض مدري شلون قايل اللون بس مش مقاعد مفصوله بـ 322 وطقه الشايب وخلاني احتقر الاكورد

بخرب جو الشايب واشتري سلة فواكه واعلقها بالمرايه ولو هو مو ملتزم حطيت سيدي للفنان القدير مزعل فرحان ( عطرك كسرته ) اخلي الشكل الخارجي لكزس والجو الداخلي جو دنا مع عزوبي يبيع خيار من الرس للدوادمي