[الكرم الحاتمي]

اولاً ارحب بإهل الخبره والصنف كل ترحيب
ثانياً رجاء اللي مايعرف لا يتدخل بالموضوع
شريت جيب والحمدلله جي اكس ار 3 موديل 2006 مواصفاته كالتالي
ونش
فتحه
حساسات خلفيه 4
كشافات وزنون ومقياس يطلع النور ويرخيه
هزاز
دفلك
تماتيك
تخشيبه حلوه
بلوتوث
مقياس هواء كفرات
سيدي واحد مع المسجل
طبعاً باقي المواصفات اللي انتم عارفينها من خلفية لكزس الى ثلاجة ومكيفين ومراتب مخمل عادي و2 ارباق
الموتر على يد واحد وماشي 27000كم
وخالي بحمد الله من السمكرة والرش والخدوش

عندي بعض الأسئله
@ كم يسوى سعره
@ اسمع صوت هواء عند سرعة 100 وما فوق كأنه يدخل مع قزازة قدام مع اني ما احس هواء يدخل ( يعني اروح به مسافة او سفر شوي ونا صاك القزاز كله احس بكتمه خاصه مع جو هالأيام يعني لو يدخل هواء ما كان جاء كتمه ) هل هو طبيعي والا جلد اوديه الوكاله والا اطنش
@السيدي هل مايشيل الا واحد فقط مع اني قريت في الكاتلوج ممكن يشيل سته واحد ورى واحد
@ البلوتوث ما ينسمع الا مع سماعة السائق هل ممكن اعمم الصوت على باقي السماعات
@هل اقدر افصل النور الواطي عن العالي يعني لما اولع العالي يبقى الواطي شغال انا ابي اخليه زنون بس
هل الحركه حلوه ممكن اسويها
اخيراً من يعرف شي عن هذه الأسئله لا يبخل علينا مو شرط كلها والي ما يعرف او ماهو متأكد رجاء يتفرج بس
ودمتم سااااااااااااااااااااااااااااااااااااااااااااااااا لمين

[الشـدادي]

مساك الله بالخير يا أخوي
@ سعرة يسوى ما بين 130-135 ألف
@ صوت الهواء من الجلدة إلي في قزاز السايق ورح لشركة ويصلحونة على الضمان
@ إن كان الموتر من عبدالطيف جميل فهو سيدي واحد إما من البازعي أو غيرة فهو 6 سيدهات
@ إن كا تبغى النصيحة لا تغير عن الشركة بشئ
وسلام

[حسونه]

أولاً / الله يحييك بيننا ضيف معزز ومكرم , ونرجو أنك تفيد وتستفيد .
ثانياً / الله يعطيك خيره ويكفيك شره .
ثالثاً / ما قلت لنا وش اللون , ونبي منك صور اذا أمكن .
رابعاً / الصوت رح للوكاله شكله زي مشكلة الكامري , رح للوكالة وإستقعد لهم .
خامساً / اذا كان من شركة عبداللطيف ما يشيل إلا سي دي واحد حسب معرفتي .
سادساً / بالنسبة للنور ما فهمت قصدك ؟ لأنك إذا كبست العالي يبقى الواطي شغال وانت تبيه كذا .
سابعاً / قيمته من ( 135000) إلى ( 140000) والله أعلم .

[الكرم الحاتمي]

يا اخوان وش اسوي رحت للوكاله وكان الصوت في جانب واحد وقالوا انه طبيعي بعدين قالوا بنغير لك الجلد اللي جهة السائق وبعدين اتصلوا انهم كسروا القزازه يوووووووووووووووووه ياهالمصيبه بس طمنوني انهم بيركبون وحده على حساب الشركة جديده وفعلاً ركبوا وحده مع جلد كامله على قولهم ولصقوا عليها الورق اللي في القزازه القديمه وقالوا خلاص
اخذت السياره وطلع الصوت يتهيألي انه في الجانبين وانه زاد بس تعرفون ان هالأيام الهواء زايد شوي بس ما اقتنعت والله انها حاله
ركبت مع واحد من الشباب حصلت عنده نفس المشكله ويقول طبيعي
والله انها حاله كيف طبيعي صوت زي كذا في سياره قيمتها كذا وكذا وكذا
صراحة مدري هم زادوا المشكله والا الجو هالأيام هو اللي زادها
بصبر لين الشيبان يقولون خلص البرد والهواء وبشوف لو بقي الصوت وش اسوي
اعطوني حل

[كريمي بريمي]

تبي الصراحة السيارة الي مافيها مثبت سرعة ماتسوى ريال

[حسونه]

منتظرينك يالحاتمي

[الشـدادي]

والله مدري وش المشكله إلي عندك بس أن خابر إن الصوت بس يطلع من قزاز السايق وإن غيرو الجلدة يروح الصوت يمكن المشكله من تركيب القزاز
وسلام

[سيف الشجاعة]

الله يعطيك خيره ويكفيك شره