هلا شعول
ترا انا عندي نفس مشكلتك, وبعد بحث طويل من كم شهر ومقارنات من يوم ما نزلت الجي 35 في امريكا توصلت لنتيجة اكيدة وهي :
1- ان الكل يشتكي من صرفية البنزين في الانفنيتي. صح المكينة جبارة وخيالية لكن تلهم بنزين بشكل غير طبيعي .
2- والشي الثاني ان القير في الانفنيتي خمس تعشيقات بس وفي الكزس سته واذا انت راعي خطوط وسرعه مثلي الكزس طبعا احسن.
3- النظام الصوتي في الجي من شركة bose المعروفه ب 10سماعات وفيه هارد دسك تقدر تخزن فيه الاغاني (شي روعه) لكن فيه عيب كبير وهو انه مبني كأساس على الابواب الامامية بسماعات عشره انش رائعة المشكلة هي ان الصوت بيدوش مخك لأن اكثر الصوت جاي من السماعات الي عندك قدام (ما فيه توازن بين ورا وقدام) ولما تغير توزيع الصوت للخلف يضعف الصوت وتقل جودته .بينما في الكزس النظام من الحبيب mark levenson طبعا غني عن التعريف من ناحية التوزيع وهو ب 14 سماعة وعيبه بدون هارد دسك .
4- طبعا مسألة الدفع الخلفي نقطه قوية للجي.
5- ما ادري عن جودة الانفنتي بس اكيد مو مثل الكزس العملية عن تجربة وكذلك مسألة السعر عند البيع لصالح الكزس.
6- تتميز الانفنتي بالطابع الرياضي وانا شفت فيديو القومة للجي صراحة صوت المكينة شي يدوخ تقول ما شاء الله فراري. والكزس تتميز بالنعومة والهدوء .
7- بصراحه الكزس توها نازله هالسنة والحين تقول لموزين من كثرها ما شاء الله عند كل اشارة تلقا وحده . لكن الانفنتي احس انه ما راح تنتشر كثير وبتكون سيارة غير شعبية (ميزة).
طبعا الانفنتي انا ما قد شفتها على الطبيعة ولا جربتها لكن معلوماتي عنها من اكثر من موقع ومنتدى وكلها طبعا تجارب علوج وانت طبعا تعرف العلوج ودقتهم ما شاء الله وكلهم تقريبا يصيحون من صرف البنزين.
بقى اقولك وش قررت انا . والله يالغالي انا الظاهر ما راح اشتري ولا وحده من السيارتين. الجي بصراحة سيارة روعه لكن موضوع صرف البنزين خلاني اهون وانا مغمض خاصة بعد تجربة سيئة لي مع الباترول 98 واللي بعدها عرفت قيمة السيارة الاقتصادية وانا تفرق معي لاني امسك خط 1000 كيلو كل اسبوع غير مشاوير الرياض .
نجي لل es . والله تراها موتر ومع كم واحد من الشباب ويمدحونها وكل ما ركبتها اقول خلاص ابشتريها لكن المشكلة اني لما انزل واشوفها من برا اقول صدق كامري شيوخ ثم اتذكر انها دفع امامي واقول والله حرام 150 الف بكامري شيوخ ودفع امامي زدها 50 الف واشتر gs ثم افكر شوي واقول والله حرام 200 الف على gs زدها 45 الف وطقلك بي ام 730 لكن اكتشفت ان شكله بيتغير 2009 يعني ما راح يمديني اتهنا الا طايح كرته . وهذا انا وهذا حالي الى هذه اللحظه عجزت اجزم على موتر .
وزي منت شايف يالغالي انه ما في راسي ولا عند جدتي سالفه لذلك ما عليك من كلامي صل ركعتين استخاره واستخر ربك وتوكل واشتر اللي ترتاحله .
وبالتوفيق
المواضيع المتشابهه للموضوع: هلا شباب سؤال بخصوص الكزس 350 ومقارنتة مع الانفينيتي الجي 35 
