[نمر إبن أبوه]

السلام عليكم ورحمة الله وبركاته

أولاً : هذي أول مشاركة لي ، أتمنى أكون خفيييف الظل عليكم
ثانياً : أبي فزعتكم وشوركم ونصيحتكم يا أخوان ، أنا ناوي بإذن الله أشتري سيارة ، ولكني محتار وخايف ومتوهق وما أدري وش أكثر سيارة ما أزور فيها الورشة كل يوم ،، أتمنى ما أحد يشره علي لأن اللي يعرف قصتي بيعذرني !!!!!!!!
أنا معي كامري قراندي موديل 2000 ووالله يا شباب إنه ما يمر تقريباً أسبوعين إلا وأنا معسكر عند باب الورشة من صبح الله ،، ديرتي بها مطبات واااجد ( جننتني ) وجننت سيارتي ، لكن عاد ما يصير كل هذي خرابات ، وكل راعي ورشة يطلع لي عيييب غير عن اللي قبله ،، والمشكله إني في ديرة بعيدة عن الوكالة ، والوكالة مثل ماأنتم عارفين يلطعونك إسبوعين علشان بس يعلمونك وش فيها من خراب !!
الخلاصة يالنشامى أنا محتار بين الكامري 2006 والهايلكس 2007 والدادسون 2007 وطبعاً بتستغربون ليه ما قلت كامري 2007 !! لأنها بصراحة مالها شنطة مثل العالم والناس ، وإذا أنت صاحب عائلة ومقاضيك واجد بتتوهق معها ،، وعلى العموم خلونا نشوف أرائكم يمكن نقتنع فيها ..
الفزعة الفزعة يالنشامى لا أحد يبخل علي برأيه وصدقوني سوف أدعوا لكل من ساعدني بفكرة أو رأي لأن فلوسي ماحصلتها إلا بالدين والمرمطة وعلشان كذا محتتتتتتتتتتتتتتتتتتتتتتتتتتتتتتار !!!!!
وشكراً

[* النهيم *]

لا تشل هم اخوي

خذ هايلكس 2007 وانت مرتاح

صراحه هي موتر يعجبك ويصبر ومريح بنفس الوقت

وفيه مقوله تقول
(( لاتفكر لاتحتار غير الهلي لاتختار ))

مع اني اموووووووووووت بالكامري

[خطير!!]

انا عندي راي ثاني بما انك في ديره على قولتك
ولله لا هلي ولا كامري ولا دتسن
لان الكامري ماتدري يمكن تصير زي سيارتك الاولى
ثانينا الهلي والله ماراح ترتاح اسال مجرب صح انها عزم بس وش ابي بالعزم اذا الراحه مو فيها انواع المناقز مع الخط والمطبات على الاقل الدتسن اريح مراتب خاصه السوبر جي ال لانها تختلف بالمراتب عن الجي ال
المهم نصيحتي اذا فلوسك فوق الستين انصحك نصيحه انك تاخذ جيب بافندر لانك في ديره والله اريح لك


تقبل مروري

[نمر إبن أبوه]

يالله حي النشامى : خطير !! / البرق اللامع ،، شكراً على مروركم و جزاكم الله ألف خير ، كفيتوا ووفيتوا وما قصرتوا ،،
لكن هل الهايلكس تصبر أكثر من الكامري ( أكيد ) ؟؟؟؟؟ لأن الضمان واحد !!!!
وأما الجيب فما عطاني الله حبه وأحس إنه ثقييييل في القيادة ..

[مبرمج]

على كلامك اللي قلته .. خذ هايلوكس ..

[همس_الكلام]

خذ هايلكس وريح راسك(هايلكس وبس)
والهيلكس بصبر اكثر من الددسن

[اسير الذكرى]

المشاركة الأصلية كتبت بواسطة مبرمج

على كلامك اللي قلته .. خذ هايلوكس ..

مثل ما قال أخي المبرمج

[نمر إبن أبوه]

مشكورين يا إخوان وما قصرتوا ، أنا أشهد إنكم راعين فزعة ،،
لكن أبسأل عن الهايلكس 2007 للي جربه : كيف راحتك معه في السفر الطويل ؟!! وهل فيه تغير كثير عن الموديلات اللي قبله ،، وشكراً ..

[كامري_جي.ال.اي]

السلام عليكم

شف اخوي انا بنصحك باللي اعرفه وانت فكر يابعدي
وبقولك وش ميزات الهايلكس والكامري والددسن

اول شي نبدى في الهيلكس بما انك في قريه او محافظه

ياقلبي الهيلكس صح انه عزم وصح انه ينفع في المطبات والمطانيج ويتحمل ويصلح للبر ونقل الاغراض
وصح ان داخليته حلوه وطلع اريح شوي وخصوصاً ان 2007 تغير نظامه وصار افضل من 2005
ونا سمعة من واحد من خوياي يقول انه ماسك خط سفر وكان يمشي 180 وقدامه صار حادث وفيه تريله ماسكه المسار الايمن يقول عاد انه دبل فرامل ومسك الاكتاف ونزله على التراب ورده للخط بعد ماتعدى الحادث والتريله .. ومعنى كلامه انه صار افضل من 2005 لان اغلب 2005 لا ضربت فرامل قعد يحاوص فيك كانه منفقع فيه كفر وبسرعه ينقلب عند ادنى نزول .. والـ2007 تطور وصار افضل بحيث السلامه

طبعاً انا اكلمك باللي اسمعه لاكن بصراحه ماجربته وربي

ومن ناحية الكشخه ومن ناحية الراحه اللي موب كامله والفخامه . ياخي يناقز في الخط مناقز خفيف ومطبه موب ذيك الراحه مع انهم حاول انهم يخلونه مريح وبعدين ياخي لو تروح لعرس ولا عزيمه او شي على هايلوكس وانت خصوصاً معك عايله ؟ ماحس لها داعي

اما بالنسبه للددسن ( النيسان ) من اولها اقول لك قطع غياره نار وخدمته موب ذيك الخدمه وانحش عنه خصوصاً شكله طلع بايخ

اما بالنسبه للكامري 2006 - 2003

مزايها وعيوبها من حيث اني مستخدم

اول شي قطعها متوافره بكثره . في البيع ماتطرح قيمتها حتى لو ان فيها رفرف مصدوم مثلاً
فخامه ومساحه كبيره انسيابيه وشكلها مثل اللكزس الـ300 كامري الشيوخ .. بعدين عيوبها قليله وخراباتها قليله لاكن انصحك تاخذ 6 سلندر لان الـ4 سلندر بعد فتره تطلع لها حنه ونطلاقتها ضعيفه

وفيها مشكله اغلب الناس يشتكون منها انها تنقص زيت والله اضن ان التنقيص من نفس الزيت موب من الصنع .. لان لها زيوت خاصه فيها . ونا دايم احط لها زيت بتروين 10w30 ماتنقص زيت ولا يحترق بسرعه وخفيف وسلس ع المكينه ولا يتعبها ودايم اغيره لا جى 4000 في الصيف وفي الشتاء 4500

وعندك مشكلة صوة الهواء فوق 140 وما فوق هذي يابعدي من سوء الاستخدام لان جلبها ضعيفه انت لو تمشي 120 مثلاً وتفتح الدريشه تبي تضعف الجلبه وتبداء تهرب هواء خصوصاً الدرايش الاماميه وعلى فكره لها حل . في صيانة وكالة تيوتا اللي في مخرج 17 في صناعية الدايري بالرياض يغيرون لك الجلب حقة الدرايش والفتحه بجلب سميكه وتتحمل ..

اسف على الاطاله واتمنا اني افدتك وافدت الجميع

تحياتي لك

[نمر إبن أبوه]

مشكووووووووووووووووووووووووووووووووووور أخوي العزيز كامري .... والله إنك ما قصرت
الله يجزاك الجنة أنت وكل اللي ساعدني ..
إن شاء الله نرد لكم المساعدة ،،
مشكور مرة ثانية أخوي والله يوفقك ..

[وليد أحمد يوسف]

الهيلكس 2006-2007 سيا رة ممتازه
خذها وانا اخوك بس