[روحي الأفالون]

مساكم الله بالخير
يا شباب عندي مشكله
مادري المشكله في الفحمات او في السياره اهم شي اني لحد الحين مغير فحماتي ثلاث مرات وسيارتي مامشت إلا 34000 كم
وبالنسبه للمره الأولا رحت للوكاله قالولي بسبب السرعه الزايده خلصت الفحمات بسرعه وكانت ماشيه 12000
والمره الثانيه مشيت فيها لحد 24000 هذا وانا امشي بهداوه
يعني معقوله كل 12000 كم راح اغير فحماتي

[عبدالتواب]

عيجب ! ! !
سيارتي ماشية أربعين والفحمات ما غيرتها وما منها مشكلة

شف مهندس الصيانة بالشركة

[الغريب11]

للاسف مكرر !!!!!!!!

[أسير الهمسات]

شي عجيب فعلاً
أنا سيارتي أحين تمشي في 24 ألف
وكل يوم دعاس فيها رايح بوظبي راد العين 140 كيلو
وولحين ما غيرت فيها فحمات
بس بدلت السفايف مرتين من كثر ما أقبض بريك

[المكيانيكي]

كيف تعرف ان الفحمات خلصت؟ (يعني هل طلع عندك صوت الدسك (الهوبات) او ولعة لمبة البريك او كيف؟
هل تلاحظ عندك على الجنوط الامامية بودرة سوداء؟
ومين اللي ركب لك الفحمات اول مرة (هل فعلا تم تغييرهااو احد غشك ؟
هل الفحمات اصلية؟
وممكن تقولي كيف استعمالك للبريك؟ (يعني هل توقف السيارة من مسافة قصيرة وانت مسرع او بالتدريج؟
جاوبني على هالاسئلة واقول لك وش السبب
اخوي اسير الهمسات
السفايف هي الفحمات عندنا نسميها الفحمات

وعلى فكرة اذا كان كل فحمات الافلون عمرها قصير
فيوجد فحمات هيفي ديوتي(Heavy duty) ركبلها
تحياتي

[مستشار العين]

السفايف او الفحمات على حد قولك هي نفس نوعية السفايف الي في اللكزس وهي من الكربون الطبيعي و لذلك تخلص بسرعة يعني كل 10000 كلم او 12000 كلم بحد اقصى

[الحـ(درب)ـب]

انا غيرتها على 19000
لانها انتهت للأخيييييير

بس عادي مب غاليه
220 مع التركيب

وين المشكله
بس انا أعرف السبب! ليش السفايف بسرعه تنتهي عندي
لاني امشي 200 بشارع مايتجاوز 1200 متر
وتعال شوفني قبل الدوار
وإذا عرف السبب بطل العجب
يعني مافي مشكله اصلا

لو ان ابوي يستعمل السيارة
مارح يغير السفايف إلا على 50 ألف كيلو كخ كخ كخ

[المهذب]

السلام عليكم
بالنسبه لي سيارتي ماشيه فوق ال100الف
وقمت بتبديل الفحمات الأماميه مرتين فقط مع إني ما ارحمها ابد داخل المدينه 120 وطالع وما شاء الله عندنا ما فيه اكثر من الاشارات
حاولو يا شباب تخففوا من الضغط الزائد على الفرامل
او تستخدم القير العادي لأنه افضل بالنسبه للفرامل
ولو تقارنها مع اللومينا سيارتي السابقه تحمد ربك لازم كل شهرين فحمات جديده
وآسف على الاطاله

[رومنسية البدر]

ياجماعه .. الفحمات او السفايف
على حسب مسكاتك للفرامل
يعني لو كنت تمشي 140 وصلت إشارة وقبل مسافة 100 متر تبي توقف .؟ اسمحلي اقولك السفايف بتخلص ب5000 كم

ابتعدوا عن الوقوف المفاجئ
وإذا إنت تمشي 200 لا تمسك بريك عشان توقف بأسرع وقت
كل شي بالهداوه وبالسياسه وبالتدرج يجي معك حلاوه

[رومنسية البدر]

المشاركة الأصلية كتبت بواسطة أسير الهمسات

شي عجيب فعلاً
أنا سيارتي أحين تمشي في 24 ألف
وكل يوم دعاس فيها رايح بوظبي راد العين 140 كيلو
وولحين ما غيرت فيها فحمات
بس بدلت السفايف مرتين من كثر ما أقبض بريك

ههههههههههههههه
للحين ماغريت فحمات بس بدلت سفايف مرتين

حلووووووووووه منك يالأسير

[روحي الأفالون]

جربت كل شي قلتوه ومانفع إلا فحمات هيفي ديوتي(Heavy duty) مين وكيلهن يا المكنيكي

[بـــــــوفــهد]

كم سعر السفايف مع التركيب

اتمنى حد يجاوبنا من الامارات

[خلدوون]

المشاركة الأصلية كتبت بواسطة رومنسية البدر

ياجماعه .. الفحمات او السفايف
على حسب مسكاتك للفرامل
يعني لو كنت تمشي 140 وصلت إشارة وقبل مسافة 100 متر تبي توقف .؟ اسمحلي اقولك السفايف بتخلص ب5000 كم

ابتعدوا عن الوقوف المفاجئ
وإذا إنت تمشي 200 لا تمسك بريك عشان توقف بأسرع وقت
كل شي بالهداوه وبالسياسه وبالتدرج يجي معك حلاوه

بارك الله فيك ، كلام سليم

[أ ف ا ل و ن]

والله يا شباب مشكلت الفحمات أول مره اسمعها !!!
انا سيارتي ماشيه 17 ألف ولا فيه أي مشكله الحمد لله من الفحمات

[المــمـــيــز]

انا ماشيه سيارتي الحين 23000الف


بس ملاحظ انه بعض الاحيان يطلع صوت الفحمات الي قدام