نقاش بخصوص الياي الاسترالي للمفخره .والطريقه الصحيحه؟؟

[خيال المفخرة]

مساكم الله بالخير

الكل يعرف انه من يوم تغير الاندكرورز اللي هو المفخره
تغيرت فيه اشياء كثيره حتى صار له ياي ومساعد استرالي خاص ولا نزل بالرمايه الا قبل شهرين
انا مريتهم قبل البارح تقريبا عشان ناوي اركبهم ان شاءلله قالو لي :
انه فيه مقاسات طبعا اخترت انا مقاس الياي الخلفي 2 سم
الامامي 2.50 سم . والشي الغريب انهم قالو لي لازم تغير المساعد الامامي والسبب انه مساعد الوكاله لا يتحمل الياي الاسترالي
السؤال هل هو صدق كلامهم مع العلم ان المساعد سعره 700 ريال
والياي 550 للخلفي وللا امامي
والمشكله سألت كثير ومالقيت احد ركب قدام ورا
اتمنى من الاخوان اللي عنده خبر ولا يعرف احد مركبهم ولا هو مركبهم. يقولي هل هو صدق لازم اغير المساعد الامامي ؟ وهل هو ضمان ونفس جودة اليايات القديمه ؟ ومريح. والشي الثاني هل جودة المساعد الاسترالي اضمن واقوى من الوكاله واريح ولا لا . مع لعلم اني مريتهم قبل ثلاث شهور اللي بشارع التحليه وكان سعره اغلى من كذا . ورجاء لاحد يقولي ركب بالون لاني بركب بالون 900 بس مو كافي ارتفاع الموتر لازم ارفعه شوي بس لاني مجربه الشتاء اللي راح بالبالون واعتبره نازل شوي
وألف شكر لكم

[أبو رغد1]

والله ياخوي خيال
الياي الأسترالي الأمامي مايركب لأن المساعد الأمامي يرد الياي لايطبق في مكانه بسبب كبر في حجمه من تحت الظاهر، ولو أن اليايات تسبب مشكله للمساعد على قولتهم كان تفقعت يايات وراء وويايات الباترولات الأمامية.
لكن عندي لك راي
أنا ركبت كعكات قدام تطبق مضبوط بين الياي والقاعدة من فوق وتثبت بمسامير المساعد ولا فيها قرقعه ولا فيها صوت.
وتقدرتركب المقاس اللي تبي أنا ركبت 2 سم. وفيه ناس ركبوا 4 سم.
والشغله كلها ماتكلف أكثر من 300 ريال.
وكان بغيت أي شي أنا جاهز

[مواااافي]

المشاركة الأصلية كتبت بواسطة أبو رغد1

والله ياخوي خيال
الياي الأسترالي الأمامي مايركب لأن المساعد الأمامي يرد الياي لايطبق في مكانه بسبب كبر في حجمه من تحت الظاهر، ولو أن اليايات تسبب مشكله للمساعد على قولتهم كان تفقعت يايات وراء وويايات الباترولات الأمامية.
لكن عندي لك راي
أنا ركبت كعكات قدام تطبق مضبوط بين الياي والقاعدة من فوق وتثبت بمسامير المساعد ولا فيها قرقعه ولا فيها صوت.
وتقدرتركب المقاس اللي تبي أنا ركبت 2 سم. وفيه ناس ركبوا 4 سم.
والشغله كلها ماتكلف أكثر من 300 ريال.
وكان بغيت أي شي أنا جاهز

ابو رغدا
لو سمحت لي وين ركبتها في الرياض
والمطب تحس انه اقوى من اول
ولو فيها رزالة ممكن صورة لموترك

[خيال المفخرة]

المشاركة الأصلية كتبت بواسطة أبو رغد1

والله ياخوي خيال
الياي الأسترالي الأمامي مايركب لأن المساعد الأمامي يرد الياي لايطبق في مكانه بسبب كبر في حجمه من تحت الظاهر، ولو أن اليايات تسبب مشكله للمساعد على قولتهم كان تفقعت يايات وراء وويايات الباترولات الأمامية.
لكن عندي لك راي
أنا ركبت كعكات قدام تطبق مضبوط بين الياي والقاعدة من فوق وتثبت بمسامير المساعد ولا فيها قرقعه ولا فيها صوت.
وتقدرتركب المقاس اللي تبي أنا ركبت 2 سم. وفيه ناس ركبوا 4 سم.
والشغله كلها ماتكلف أكثر من 300 ريال.
وكان بغيت أي شي أنا جاهز

الله يعطيك العافيه يبو رغد
بس الكعكات مافي امل اركبهم بسبب لاني مارتاح لهم ولا اني مقتنع فيهم ابد ابد

والياي الامامي قالو لي انه مايركب الا اذ غيرت المساعد والسبب يقولي انه مايتحمل وصراحه مادري عنهم هل هو عشان مايتحمل ولا عشانه مايركب مادري وش السالفه بالظبط
بس الزبده انه لازم اغير المساعد وصراحه غالي سعره 700 ريال والمشكله انه يقولن انه يخرب بسرعه . واانا اعرف نفسي الموتر اجلده جلد لا بالمسحيات ولا بالطعوس يعني طمرت السيف مثل سلام عليكم

سألت. وصار عندي اكثر من خيار وباخذ رايك ياذيب

فيه ناس قالو انك تركب مساعد جبريل الابيض الامريكي رخيص وزين ومريح
وفيه طريقه انه اللبس الياي تلبيسه وتختار المقاس ولا ادري عن ضمان هالطريقه
والمشكله انا محتار ودي اركبهم بأسرع وقت وبأقل الاسعار وشي مضمون
وتكفا لا تقولي كعكات لانه مافي امل اركبهم
والف شكر لك اخوي بو رغد

[أبو رغد1]

أخوي موافي
أنا ركبتها في ورشة أسمها (ورشة مرات) بالصناعية القديمة جنب ميزان المجد بـ 200 ريال
ومن ناحية المطب كأن المطب قسى شوي لكن مافيه شي كامل إلا وجه الله سبحانه.

وهذي صورة الموتر بعد الرفع من قدام.



وهذي صورة ثاني من بعيد وفيها شوي مهااااايط هههههههههههه



وأي شي تحتاجونه ياشباب أنا جاهز.

[أبو رغد1]

المشاركة الأصلية كتبت بواسطة خيال المفخرة

سألت. وصار عندي اكثر من خيار وباخذ رايك ياذيب

فيه ناس قالو انك تركب مساعد جبريل الابيض الامريكي رخيص وزين ومريح
وفيه طريقه انه اللبس الياي تلبيسه وتختار المقاس ولا ادري عن ضمان هالطريقه
والمشكله انا محتار ودي اركبهم بأسرع وقت وبأقل الاسعار وشي مضمون
وتكفا لا تقولي كعكات لانه مافي امل اركبهم
والف شكر لك اخوي بو رغد

والله شف يالغالي
كان فيك تركيب مساعدات أنا أنصحك بالأسترالي لأنه يتحمل ويمسك الموتر مع المطامر بس تراه قوي وبيصير المطب قاسي شوي
مع ان فيه ناس يقولون انه يتفقع عليهم لكن الناس أشكال

[زيدفهد]

اخوي العزيز انا ركبتها لزم تغير المساعد الامامي وتخدا المساعد الاسترالي ركبتها في محل الرمايه الاي في التخصيصي والورشه عندهم وهدا وهي ركابه

[خيال المفخرة]

المشاركة الأصلية كتبت بواسطة أبو رغد1

والله شف يالغالي
كان فيك تركيب مساعدات أنا أنصحك بالأسترالي لأنه يتحمل ويمسك الموتر مع المطامر بس تراه قوي وبيصير المطب قاسي شوي
مع ان فيه ناس يقولون انه يتفقع عليهم لكن الناس أشكال

فديت خشمك ولله يبو رغد
انا هذا اللي مخوفني وصراحه خساره ان الواحد يركب مساعد 700 ويجلس فتره وينفقع علي
انا بمر بكرا الصناعيه القديمه وبسأل عن مساعد الجبريل الابيض الامريكي
وبشوف هل هو يركب مع الياي الاسترالي ولا لا مع لعلم انه ارخص بكثير من المساعد الاسترالي . وبمر نفس الورشه اللي انت قلت عنها وتمدحها
وبعلمك بكرا وش يصير ان شاءلله

[خيال المفخرة]

المشاركة الأصلية كتبت بواسطة زيدفهد

اخوي العزيز انا ركبتها لزم تغير المساعد الامامي وتخدا المساعد الاسترالي ركبتها في محل الرمايه الاي في التخصيصي والورشه عندهم وهدا وهي ركابه

الله يعطيك العافيه اخوي
بس سؤالي لك
كم مقاس الياي وهل غيرت الامامي والخلفي وكم مقاساتهم
وشلون راحت الموتر بعد ماغيرتهم ؟؟ حسيت انه مطبه ثقيل ولا كيف
وبكم كلفك
وياليت لو تحط لنا صور
اكون شاكر ومقدر لك اخوي

[زيدفهد]

مقاس الامامي 700والخلفي723السعر الامامي600 الخلفي 550 المساعد الاسترالي1000المطب قاسي شوي الصوره موجوده با التوقيع وشكرا

[fj-10]

اخوي خيال ..

انسب حل لك هو الكعكات قدام بالمقاس اللي تبي والاحسن تاخذ المنيوم وهي الافضل ..

وجربتها على موتري اول ولا فيه اي قساوة او اصوات ... و ورى ركب لك ياي استرالي افضل

لانه مريح مره .. وااذا كانك تحب تدفع دراهم .. عليك بالمساعدات الغاز .. جبارة ومعروفة ..

عيبها تنقز على خفيف .. وهي حسب رائي الافضل .. الكعكات لحد يضحك عليك ..

قيمتها 50 الطقم ( حبتين ) .. وتركيبهن 50 .. ما تكلف الا 100 .. والامر بيدك حبيبي ..

[الدب القطبي]

انا مركب مساعدات رانشو كويك لفت علي سيارتين الاولي جمس سييرا 2009 غمارة والثاني علي اف جي كروزر الصراحة روعه معه فرارين فرار احمر خمس طقات حق ليونة وقساوة المطبات لاحطيته علي خمسه تطامر مطامر كنك راكب شاص واذا حطيته علي 1 كنك راكب لكزس من اليونة والراحة ومعه ريموت كنترول للتحكم بالوضعيات..ويوجد كذلك معه فرار اخر زيت هيدرولك يرفع اقصي ارتفاع له 2 ونص انش وياصل في بعض الحالات ل 3 انش طلبته طلبية خاصة من امريكا ويركب علي الياي حق بلدة يعني الشغلة بس شيل المساعد الاصلي وسقط الرانشو مكانة عن طريق كباسة المخرطة الهيدروليكية بس سعرها الصراحة غويلي لابغيت اطلبها لك ماعندي مشكله تاخذ لها اسوعين بالكثير وهي واصلة ان شاء الله.. بس يعطي للموتر منظر ونصبه ماشاء الله..وهاذا مقطع لليوتوب يبين لك عن فكرته وطريقته..

[راعي النفود]

هلا والله بالربع


صراحة حيرتونا

رايكم رايكم نركب ياي استرالي أمامي وخلفي

عند الرمايه

الله يعطيكم الف عافية

[أبو رغد1]

المشاركة الأصلية كتبت بواسطة راعي النفود

هلا والله بالربع

صراحة حيرتونا

رايكم رايكم نركب ياي استرالي أمامي وخلفي

عند الرمايه

الله يعطيكم الف عافية

أخوي راعي النفود
الحين في ناس ماتبغى كعكات بسبب أنه يقول أني إذا ركبت الكعكه راح ينرص الياي ويكون عليه ضغط وبسبب الضغط هذا يكون المطب قاسي شوي.
وبعضهم يقول أن الكعكات تقرقع ويطلع لها صوت ( صحيح يطلع لها صوت إذا صرت مركبها في الياي الخلفي) لكن الكعكات في الياي الأمامي تكون مثبته بأربع مسامير يعني مافي أمل يحترك ولا حركه.
وبما أن وجهة نظر البعض إنه إذا ركبت كعكات أمامية بيكون المطب قاسي فأنا ما أختلف معه راح يقسى المطب شوي.
وكذلك راح يكون المطب قاسي لو ركبت ياي أسترالي أمامي والياي مايركب إلا بمساعد إسترالي يعني مطب قاسي وسعر وغالي.

وأنا وجهة نظري وش راح يظرني لو ركبت كعكات أمامية بـ 300 ريال بالكثير وبحسب الإرتفاع اللي أنا أبغى وإن ما جازت لي فكيتها فأكون ماخسرت إلا 500 طبعاً المبلغ هذا مع أتعاب الفك والتركيب.

أو أني أركب يايات أسترالية أمامية بـ 550 ومساعدات أسترالية الظاهر بـ 1000(بناءً على كلام زميلنا العضو زيد فهد) وشغل يد يعني التكلفة راح تكون حوالي 1700 ريال وبعدين مايجوز لي أرتفاع الموتر أو مطبه. وأرجع أفكه وأنا خسران وقت ومال.
ومن واقع تجربتي للكعكات أنا عن نفسي أشوف أنها حلوه مع أني كنت من المحاربين لها لكن يوم شفت كيف تركب في الاند الجديد قدام ارتحت (لأنها تثبت بمسامير كما ذكرت سابقاً).
ولو تروح لورشة النويصر ولا بن مرضاح ولا الرماية وتسألهم عن نسبة اللي يركبون كعكات بالمقارنه مع اللي يركبون ياي استرالي ومساعد استرالي راح تشوف الفرق.

وهذا الكلام يمثل رأيي الشخصي ولكل شخص رأيه وقناعاته.

واللي وده يجرب موتري أو يشوفه بالكعكات أنا جاهز.

ولكم تحياتي العذبه

[خيال المفخرة]

المشاركة الأصلية كتبت بواسطة زيدفهد

مقاس الامامي 700والخلفي723السعر الامامي600 الخلفي 550 المساعد الاسترالي1000المطب قاسي شوي الصوره موجوده با التوقيع وشكرا

الله يعطيك لعافيه اخوي
والحين سعرهم اقل 100 ريال
والمساعد 700 ريال
الف شكر لك اخوي
انت قلت لي المقاس انا بي مقاس الارتفاع كم ؟؟؟؟
مع العلم انا اخترت مقاس الامامي 2.50 سم
والخلفي 2 سم

[خيال المفخرة]

المشاركة الأصلية كتبت بواسطة فيروس القطب

اخوي خيال ..

انسب حل لك هو الكعكات قدام بالمقاس اللي تبي والاحسن تاخذ المنيوم وهي الافضل ..

وجربتها على موتري اول ولا فيه اي قساوة او اصوات ... و ورى ركب لك ياي استرالي افضل

لانه مريح مره .. وااذا كانك تحب تدفع دراهم .. عليك بالمساعدات الغاز .. جبارة ومعروفة ..

عيبها تنقز على خفيف .. وهي حسب رائي الافضل .. الكعكات لحد يضحك عليك ..

قيمتها 50 الطقم ( حبتين ) .. وتركيبهن 50 .. ما تكلف الا 100 .. والامر بيدك حبيبي ..

الله يعطيك العافيه ياذيب
بس تدري وش مخوفني من الكعكات انه ماراح تعطيني مثل مايعطي الياي !!! ؟؟؟

الحين لو تلاحظ الياي الاسترالي خاصتا ورا اذ ركبته يمسك الموتر وذكر فيه مساعدات اسمه جبريل ابيض ينركب قدام للبعض السيارات انا ماجربته على الاند . وزينته يمسك الموتر يعني اذ صرت تمشي مع ردميه ( خطوط ترابيه او مسحيه ) يكون وجه الموتر ثابت ولا يلعب
السؤال هل الكعكات تعطيك ثبات من قدام ورساوه ولا يلعب وجه الموتر ويطامر + انها ترفع الموتر رفعه زينه + انها مالها مضار اذ انفقع الكفر الامامي لاني سمعت انها تسبب الانقلاب اذ انفقع الكفر الامامي وانا انسان رجلي ثقيل على الموتر
اتمنى انك تفيدين الله يعطيك العافيه اخوي
والمساعد اللي تقول عنه شكله غالي بالحيل
وانا صراحه ادور السعر الزين

[خيال المفخرة]

المشاركة الأصلية كتبت بواسطة الدب القطبي

انا مركب مساعدات رانشو كويك لفت علي سيارتين الاولي جمس سييرا 2009 غمارة والثاني علي اف جي كروزر الصراحة روعه معه فرارين فرار احمر خمس طقات حق ليونة وقساوة المطبات لاحطيته علي خمسه تطامر مطامر كنك راكب شاص واذا حطيته علي 1 كنك راكب لكزس من اليونة والراحة ومعه ريموت كنترول للتحكم بالوضعيات..ويوجد كذلك معه فرار اخر زيت هيدرولك يرفع اقصي ارتفاع له 2 ونص انش وياصل في بعض الحالات ل 3 انش طلبته طلبية خاصة من امريكا ويركب علي الياي حق بلدة يعني الشغلة بس شيل المساعد الاصلي وسقط الرانشو مكانة عن طريق كباسة المخرطة الهيدروليكية بس سعرها الصراحة غويلي لابغيت اطلبها لك ماعندي مشكله تاخذ لها اسوعين بالكثير وهي واصلة ان شاء الله.. بس يعطي للموتر منظر ونصبه ماشاء الله..وهاذا مقطع لليوتوب يبين لك عن فكرته وطريقته..

فديت القطب كله ولله
بس كم سعره بالله شكله فوق 5 الاف ؟؟؟

[خيال المفخرة]

المشاركة الأصلية كتبت بواسطة أبو رغد1

أخوي راعي النفود
الحين في ناس ماتبغى كعكات بسبب أنه يقول أني إذا

ولكم تحياتي العذبه

فديت خشمك يبو رغد
كلمت ابو علي اللي تعرف ورشتهم
وشكله فاهم الرجال
وقالي فيه اكثر من خيار اللي هو المساعد جبريل بس خساره ماوصل الموديل الخاص بحق 2008
وقالي اقدر ارهم لك مساعدات اماميه حقت مرسدس 450
طبعا انا ماودي بترهيم
وصراحه من كلامك عن الككعات بديت افكر فيهم . لانه يوفرون لي مبلغ كبير يعني اركب ياي استرالي خلفي وبس والامامي كعكات , بس هل الكعكات تعطي مثل الياي يعني رساوه ويمسك الموتر مايلعب وجه مع المسحيات وخطوط الجلد ؟؟؟ هل هو يسبب انقلاب اذ انفقع الكفر الامامي ؟؟؟
بس ياليت تجاوب على بعض الاسائله
وابي استخير وافكر
طبعا مانستغني عن مشورتك يلغالي
وشاكر لك الف شكر

[أبو رغد1]

المشاركة الأصلية كتبت بواسطة خيال المفخرة

وصراحه من كلامك عن الككعات بديت افكر فيهم . لانه يوفرون لي مبلغ كبير يعني اركب ياي استرالي خلفي وبس والامامي كعكات , بس هل الكعكات تعطي مثل الياي يعني رساوه ويمسك الموتر مايلعب وجه مع المسحيات وخطوط الجلد ؟؟؟ هل هو يسبب انقلاب اذ انفقع الكفر الامامي ؟؟؟
بس ياليت تجاوب على بعض الاسائله
وابي استخير وافكر
طبعا مانستغني عن مشورتك يلغالي
وشاكر لك الف شكر

والله شف يالغالي
الموتر ماراح يتغير عليك بشي إلا في الرساه في الخطوط ومع الهواء لأن وجه الموتر أرتفع شوي يعني راح تحس لو يجي هوا مواجهك ولا من جنب أنه يأثر في الموتر وهذا الشي راح يصير معك سواء ركبت ياي استرالي ولا كعكات لان السبب إرتفاع الموتر من قدام.
وبخصوص فقعة الكفر والله هذي ترجع للسواق وحتى لو مافيه كعكات يمكن مايعرف يتصرف مع السيارة وبصراحه ماقد جربت ولا قد حصل معي مثل هالموقف والله يبعدك ويبعدنا والمسلمين أجمعين عن هالمواقف الشينه ويستر على الجميع

وطبعاً الكعكات ماراح تعطيك مثل الياي أبداً وهذا شي أكيد

لأن الغرض من الكعكات: رفع الموتر فقط.
والغرض من الياي: رفع الموتر مع تحمل المطاب وإمتصاصها.

[خليفه محمد]

وعليكم السلالام ورحمه الله وبركاته
ابو بندر ياخويه ممكن تشرحلي شو معنى المساعداات؟؟
الياي عرفته ان اسبرنق فالامارات او اطيي نسميه اما الياي ماعرفته